Amnesty International ៖ ហ្វេសប៊ុកផ្សំគំនិតជាមួយអាជ្ញាធរវៀតណាម បំបីទសេរីភាពនៃការបញ្ចេញមតិ
អង្គការក្រៅរដ្ឋាភិបាល Amnesty International បានធ្វើការចោទប្រកាន់នៅថ្ងៃពុធទី ២២មេសា ក្រុមហ៊ុន ហ្វេសប៊ុកថា បានផ្សំគំនិត ព្រមរួមដៃជាមួយអាជ្ញាធរវៀតណាម ក្នុងការបិទខ្ទប់និងត្រួតត្រាការបញ្ចេញមតិ។ ក្រុមហ៊ុនអាមេរិកទទួលសា្គល់ថា បានបិទខ្ទប់និងលុបសារ នូវសារប្រឆាំងនឹងរដ្ឋាភិបាលកុម្មុយនិស្ត ជាច្រើន។ ហេតុអ្វីបានហ្វេសប៊ុកធ្វើដូច្នេះ ?
ចុះផ្សាយនៅថ្ងៃ៖
ស្តាប់ - ០២:៣៩
សេចក្តីសម្រេចចិត្តរបស់ក្រុមហ៊ុនហ្វេសប៊ុកព្រមធ្វើតាមរដ្ឋាភិបាលកុម្មុយនិស្តវៀតណាម ជារបត់ថ្មីមួយដ៏គ្រោះថ្នាក់ ! នេះបើតាមសេចក្តីថ្លែងការណ៍របស់អង្គការ Amnesty International ដោយគូសបញ្ជាក់ទៀតថា លុបគ្មានអាសូរការបញ្ចេញមតិ ពីសំណាក់អាជ្ញាធរវៀតណាម មិនមែនជារឿងថ្មីទេ ប៉ុន្តែការប្តូរផ្លាស់នយោបាយរបស់ក្រុមហ៊ុនហ្វេសប៊ុក បង្ហាញថាក្រុមហ៊ុនជាអ្នកផ្សំគំនិតចូលត្រួតត្រាសេរីភាពនៃការបញ្ចេញមតិដែរ។
នៅក្នុងសេចក្តីថ្លែងការណ៍ផ្ញើមកភ្នាក់ងារសារព័ត៌មានបារាំង AFP ហ្វេសប៊ុកបានពន្យល់ថា ក្រុមហ៊ុនសម្រេចចាត់វិធានការ លុបចោលនូវរាល់សារណាដែលខ្លឹមសារមិនស្របច្បាប់ ចេញពីប្រព័ន្ធសង្គមរបស់ខ្លួន តាមសំណើរបស់ហាណូយ ក៏ព្រោះតែចង់ឱ្យប្រព័ន្ធសង្គមមួយនេះ អាចបន្តដំណើរការនិងអាចផ្តល់សេវាប្រើប្រាស់ដល់ប្រជាពលរដ្ឋវៀតណាមរាប់លាននាក់ ដែលត្រូវការ។
វៀតណាមមានប្រជាពលរដ្ឋសរុបជាង៩៥លាននាក់ ជាង៥៣លាននាក់ប្រើហ្វេសប៊ុក។ ក្រុមហ៊ុនសហគ្រាសតូចធំ ប្រើប្រព័ន្ធសង្គមនេះជាមធ្យោបាយផ្សព្វផ្សាយពាណិជ្ជកម្មនិងជំនួញខ្លាំងណាស់។
តាំងពីចូលឆ្នាំ២០២០មក អាជ្ញាធរវៀតណាមបានដាក់សម្ពាធលើក្រុមហ៊ុនហ្វេសប៊ុកយ៉ាងខ្លាំង។ ដំបូងឡើងក្រុមហ៊ុន បានបដិសេធដោយឈរលើគោលការណ៍គោរពសេរីភាពនៃការបញ្ចេញមតិ ប៉ុន្តែហាណូយបានប្រើមធ្យោបាយធំពន្យឺតល្បឿនអ៊ីនធ័រនែត ដោយយកលេសជួសជុលបណ្តាញខ្សែកាបក្រោមទឹក។ នៅចន្លោះពីពាក់កណ្តាលខែកុម្ភៈដល់ខែមេសា ប្រព័ន្ធហ្វេសប៊ុកដើរយឺត ស្ទើរលែងមានដំណើរការសោះ នៅទូទាំងប្រទេសវៀតណាម។ នៅទីបំផុត ដើម្បីកុំឱ្យខាតប្រយោជន៍ ហ្វេសប៊ុកក៏ព្រមធ្វើតាមសំណើរបស់រដ្ឋាភិបាលក្រុងហាណូយ ដែលបានបង្កើនការចាប់ខ្លួន និងដាក់ទោសសកម្មជនអ្នកប្រឆាំងតាមប្រព័ន្ធសង្គម កាន់តែច្រើនឡើងៗ តាំងពីឆ្នាំ២០១៦មក។
ការរាតត្បាតរបស់កូវីដ១៩ បានធ្វើឱ្យស្ថានភាពសេរីភាពនៃការបញ្ចេញមតិកាន់ដុនដាបបន្ថែមទៀត។ អាជ្ញាធរបានកោះហៅ អ្នកលេងហ្វេសប៊ុកជាង ៦៥០នាក់ ទៅសួរចម្លើយ ជុំវិញការបង្ហោះសារដែលមានទាក់ទងនឹងវិបត្តិកូវីដ១៩ ឬចំណាត់ការដឹកនាំរបស់រដ្ឋាភិបាល។ នេះបើតាមទិន្នន័យរបស់អង្គការ Amnesty International។ ហាណូយបានពង្រឹងវិធានការរឹតបន្តឹងថ្មីបន្ថែម នៅខែនេះ ដើម្បីដាក់ទោសអ្នករិះគន់តាមអ៊ីនធ័រនែត។ អ្នកប្រើប្រាស់ហ្វេសប៊ុកជាច្រើន បានទទួលការផាកពិន័យនិងខ្លះទៀត បានបង្ខំចិត្តលុបសាររបស់ខ្លួនឯង។ ១០%នៃអ្នកទោសនយោបាយក្នុងពន្ធនាគារវៀតណាម ជាសកម្មជនប្រជាធិបតេយ្យតាមប្រព័ន្ធហ្វេសប៊ុក។ នេះបើតាមអង្គការAmnesty Internationalដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ