ចិនតឿនរំលឹកបារាំងឲ្យលុបចោលកិច្ចសន្យាលក់អាវុធឲ្យតៃវ៉ាន់
ចិនប្រឆាំងរាល់គំនិត លក់សព្វាវុធឲ្យតៃវ៉ាន់។ ក្រៅតែពីអាមេរិក ប្រទេសចិន កាលពី ថ្ងៃ អង្គារទី១២ ឧសភា បានដាស់តឿន ភាគីបារាំងមួយទៀត ឲ្យលុបចោល កិច្ចសន្យាលក់អាវុធទៅឲ្យតៃវ៉ាន់។ សម្រាប់ទីក្រុងប៉េកាំង រាល់កិច្ចសន្យា លក់អាវុធ ទៅឲ្យតៃវ៉ាន់ ដែលដឹកនាំដោយរដ្ឋាភិបាល មានអារិភាពនឹងប្រទេសចិន នឹងអាចបំផ្លាញ ទំនាក់ទំនងបារាំង ចិន។
ចុះផ្សាយនៅថ្ងៃ៖
ស្តាប់ - ០២:១០
សេចក្តីប្រកាសព័ត៌មាន ដែលក្រសួងការបរទេសចិន ផ្ញើទៅឲ្យទីភ្នាក់ងារព័ត៌មានបារាំងAFP កាលពីថ្ងៃអង្គារ បានបញ្ជាក់ថា ចិនបានសំដែងក្តីបារម្ភទៅភាគីបារាំង។ ចិនប្រឆាំងរាល់ការលក់គ្រឿងសព្វាវុធ និងការដោះដូរ ផ្នែកកងទ័ពនិងសន្តិសុខជាមួយ តៃវ៉ាន់។ ដូច្នេះ ចិនដាស់តឿនបារាំងឲ្យ លុបចោល ផែនការលក់អាវុធ ទៅឲ្យតៃវ៉ាន់ ដើម្បីជៀសវាង បំផ្លាញ ទំនាក់ទំនងប្រទេសទាំងពីរ។
តាមកាសែតក្នុងស្រុកតៃវ៉ាន់ នៅក្នុងសេចក្តីប្រកាសព័ត៌មាន កាលពីថ្ងៃ ទី ៧មេសា កងទ័ពជើងទឹក តៃវ៉ាន់ បានលើកឡើងពីផែនការចង់ធ្វើទំនើបកម្ម នាវាចម្បាំង ទាំង ៦គ្រឿង ដែលតៃវ៉ាន់ បានទិញ ពីប្រទេសបារាំង កាលពីឆ្នាំ ១៩៩០។ តាម កាសែតតៃវ៉ាន់ ដដែល កិច្ចសន្យាលើកនេះ មានតម្លៃ ជិត ២៧លានដុល្លារ។
ប្រភពស្និទនឹងសំណុំរឿងនេះ បានបញ្ជាក់ប្រាប់ទីភ្នាក់ងារព័ត៌មានបារាំង ដែរថា ក្រសួងការពារជាតិតៃវ៉ាន់ បានរៀបចំរួចរាល់អស់ហើយ កិច្ចសន្យាទិញសព្វាវុធ ដើម្បីធ្វើទំនើបកម្មប្រព័ន្ធមីស៊ីល របស់នាវាចម្បាំង ដែលតៃវ៉ាន់ ធ្លាប់បានទិញពីបារាំង កាលពី៣០ឆ្នាំមុន។
គិតមកថ្ងៃអង្គារ ភាគីបារាំង នៅមិនទាន់មានប្រតិកម្ម ឆ្លើយតបយ៉ាងណាទៅនឹងការទាមទាររបស់ចិន នៅឡើយទេ។ កាលពី៣០ឆ្នាំមុន កិច្ចសន្យាលក់នាវាចម្បាំង ៦គ្រឿង របស់បារាំង ទៅឲ្យតៃវ៉ាន់ ដែលមានតម្លៃ ២,៨ពាន់លានដុល្លារ បានបណ្តាលឲ្យមានវិបត្តិការទូតដ៏ធ្ងន់ធ្ងរ រវាងចិន និងបារាំង។
តៃវ៉ាន់ ជាសំណុំរឿងរសើប សម្រាប់របបកុម្មុយនិស្តចិន ដែលតែងចាត់ទុកតៃវ៉ាន់ ជាដែនដីកោះមួយរបស់ចិន។ ទីក្រុងប៉េកាំង ធ្លាប់បាន គំរាមរួចហើយថា នឹងយកកោះតៃវ៉ាន់ មកគ្រប់គ្រងវិញ បើទោះបីជាប្រើកម្លាំងយោធា ក៏ដោយ។ ជាមួយគ្នានោះ ចិន បានចេញមុខប្រឆាំងដាច់ខាត រាល់ទំនាក់ទំនងជាផ្លូវការ ដែលប្រទេសដទៃ មានជាមួយ កោះតៃវ៉ាន់ ដែលទីក្រុងប៉េកាំងចាត់ទុក ស្មើនឹងការគាំទ្រ ចលនាបំបែកទឹកដីតៃវ៉ាន់។ ក្រៅពីបារាំង ប្រទេសចិន ធ្លាប់បានគំរាម ព្រមានអាមេរិកផងដែរ នៅក្នុងសំណុំរឿងលក់អាវុធ ទៅឲ្យតៃវ៉ាន់។ ប៉ុន្តែ រដ្ឋបាលលោកដូណាល់ ត្រាំ ហាក់ព្រងើយ មិនខ្វល់ការព្រមានរបស់ចិននោះទេ។ នៅពាក់កណ្តាលឆ្នាំមុន រដ្ឋាភិបាលអាមេរិក ក្រោមភ្លើងខៀវរបស់សភាអាមេរិក ថែមទាំងបានអនុម័តលក់សព្វាវុធ តម្លៃ ២ពាន់លានដុល្លារ ដើម្បីឲ្យកោះតៃវ៉ាន់អាចធ្វើទំនើបកម្មកងទ័ពរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ