ចិនប្រកាសកាត់បន្ថយការនាំចូលសាច់គោពីអូស្ត្រាលី
ប្រទេសចិននឹងផ្អាកការនាំចូលសាច់គោពីក្រុមហ៊ុនអូស្ត្រាលី ចំនួន៤ ចាប់ពីថ្ងៃអង្គារនេះតទៅ។ នៅក្នុងសេចក្តីប្រកាសរបស់ខ្លួន នៅថ្ងៃអង្គារនេះ នាយកដ្ឋានពន្ធគយចិន មិនបានបញ្ជាក់ហេតុផលនៃការកាត់បន្ថយ ការនាំចូលសាច់គោអូស្ត្រាលីនោះទេ។ ប៉ុន្តែ ការសម្រេចចិត្តយ៉ាងដូច្នេះ ធ្វើឡើង នៅក្នុងបរិបទដែល ចិននិងអូស្ត្រាលី កំពុងតានតឹងនឹងគ្នា បន្ទាប់ពី អូស្ត្រាលី ទាមទារឲ្យមានការស៊ើបអង្កេតទៅលើរបៀបដែលចិនគ្រប់គ្រងដោះស្រាយវិបត្តិ នៅគ្រាកើតដំបូង នៃការផ្ទុះជំងឺកូវីដ នៅប្រទេសចិន។
ចុះផ្សាយនៅថ្ងៃ៖
ស្តាប់ - ០២:០៦
នៅក្នុងសេចក្តីប្រកាស ចុះផ្សាយក្នុងវិបសៃតិ៍ នៅថ្ងៃអង្គារ នាយកដ្ឋានពន្ធដារចិនបានប្រកាសផ្អាកការនាំចូលសាច់គោរបស់ក្រុមហ៊ុនអូស្ត្រាលី ចំនួន ៤ ដោយមិនបានបញ្ជាក់ពីមូលហេតុ និងកាលកំណត់។ យ៉ាងណាក៏ដោយ ការសម្រេចនេះធ្វើឡើង នៅមួយខែក្រោយ បន្ទាប់ពី ឯកអគ្គរដ្ឋទូតចិន ប្រចាំទីក្រុងកង់បេរ៉ា ធ្លាប់បានព្រមានពីការធ្វើពហិការបស់ប្រជាជនចិន ទៅលើផលិតផលអូស្ត្រាលី។ អូស្ត្រាលីដែលចូលរួមជាមួយ អាមេរិក ដើម្បីទាមទារឲ្យមានការស៊ើបអង្កេត ទៅលើប្រភពកើតដំបូង នៃកូរ៉ូណាវីរុស នៅប្រទេសចិន។
នៅក្នុងបទសម្ភាសន៍ជាមួយកាសែតក្នុងស្រុកអូស្ត្រាលី នៅចុងខែមេសា ឯកអគ្គរដ្ឋទូតចិន បានចាត់ទុកការទាមទារឲ្យមានការស៊ើបអង្កេតរបស់អូស្ត្រាលី ថា គ្រោះថ្នាក់ នឹងអាចបណ្តាលឲ្យមានពហិការលើផលិតផលអូស្ត្រាលី នៅប្រទេសចិន។ អ្នកតំណាងចិន នៅអូស្ត្រាលី បានព្រមាន ផងដែរថា ឥរិយាបថរបស់អូស្រ្តាលី ក្នុងរយៈពេលយូរអង្វែងនឹងអាចប៉ះពាល់ផងដែរ ដល់ចំនួនសិស្សចិន ដែលត្រូវមករៀននៅសកលវិទ្យាល័យអូស្ត្រាលី។
សម្រាប់រដ្ឋមន្រ្តី ពាណិជ្ជកម្មអូស្ត្រាលី លោក Simon Birmingham ការសម្រេចផ្អាកការនាំចូលសាច់គោអូស្ត្រាលី ទំនងគ្មានជាប់ទាក់ទងបញ្ហាដែលអូស្ត្រាលីទាមទារឲ្យមានការស៊ើបអង្កេតលើកូរ៉ូណាវីរុស នៅចិន ប៉ុន្តែ វាអាចបណ្តាលមកពីបញ្ហាស្លាកសញ្ញា របស់ក្រុមហ៊ុនអូស្ត្រាលីចំនួន ៤ ដែលនាំចូលសាច់គោទៅប្រទេសចិន។ តាមរដ្ឋមន្រ្តីពាណិជ្ជកម្មអូស្ត្រាលី អ្វីដែលគួរឲ្យបារម្ភ គឺត្រង់ថា បញ្ហាសា្លកសញ្ញា នេះ ធ្លាប់កើតឡើង កាលពី១ឆ្នាំមុន ប៉ុន្តែ ហេតុអ្វីបានជាភាគីចិនទើបមកបើកកកាយ រករឿង នៅពេលនេះ។
សូមបញ្ជាក់ថា ការនាំចេញសាច់គោរបស់ក្រុមហ៊ុនចំនួន៤ ដែលចិន ទើបប្រកាសផ្អាកព្យួរ នៅថ្ងៃនេះ មានតម្លៃ ប្រមាណ ១ពាន់លានអឺរ៉ូ ស្មើនឹង៣៥%នៃសាច់គោ សរុប ដែលអូស្ត្រាលី នាំចូលទៅប្រទេសចិន។
ថ្វីត្បិតថា ចិនជាដៃគូពាណិជ្ជកម្មសំខាន់ ធំជាងគេរបស់អូស្ត្រាលី ប៉ុន្តែ ទំនាក់ទំនងរវាងប្រទេសទាំង២មិនសូវជារលូនប៉ុន្មានទេ។ ក្រៅតែបញ្ហាប្រព័ន្ធទូរស័ព្ទ 5Gដែលអូស្រ្តាលី បដិសេធមិនឲ្យតាំងទីនៅអូស្ត្រាលី ដោយសារខ្លាចការឈ្លបយកការណ៍សម្ងាត់ ចិន និងអូស្ត្រាលី កំពុងចោទប្រកាន់គ្នាពីរឿងលក់បង្ខូចថ្លៃ លើផលិតផលស្រូវសាឡី ដែកថែប និងអាលុយមីញ៉ូម។
បើសិន ចិនមានបញ្ហាត្រឹមជាមួយសាច់គោ និងស្រូវសាឡីរបស់អូស្ត្រាលី នោះ សេដ្ឋកិច្ចរបស់អូស្ត្រាលី ទំនងនឹងមិនប្រឈមបញ្ហាធ្ងន់នោះទេ។ ប៉ុន្តែ អ្វីដែលអ្នកជំនាញបារម្ភ គឺភាពតានតឹងចិន អូស្រ្តាលី អាចរាលដាលដល់វិស័យផ្សេងទៀត ដូចជា ការនាំចេញដែក ធ្យូងថ្ម និងការអប់រំ ដែលប្រភពចំណូលសំខាន់របស់សេដ្ឋកិច្ចអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ