វិបត្តិកូវីដជួយឲ្យចិនកាន់តែមានមុខ នៅតំបន់ដើមបូព៌ា
ចុះផ្សាយនៅថ្ងៃ៖
ស្តាប់ - ០៥:១៥
វិបត្តិកូវីដបើកឱកាសចិនពង្រឹងតួនាទី និងពង្រីកមុខមាត់របស់ខ្លួន នៅតំបន់ដើមបូព៌ា។ តាំងពីអេហ្ស៊ីប អ៊ីរ៉ង់ និងអារ៉ាប៊ី សាអូឌីត គេឃើញ ចិនបញ្ជូនជំនួយគ្រឿងបរិក្ខារពេទ្យ និងអ្នកជំនាញសុខភាព ដើម្បីជួយ ប្រទេសក្នុងតំបន់ដើមបូព៌ា ប្រយុទ្ធប្រឆាំងនឹងជំងឺរាតត្បាតកូវីដ។ តំបន់ដើមបូព៌ា ដែលធ្លាប់ជាទីតាំងភូមិសាស្រ្តនយោបាយរបស់រុស្ស៊ី និងអាមេរិក កំពុងធ្លាក់ចូលក្នុងសំណាញ់ទាក់ទាញរបស់មហាអំណាចចិន ដែលប្រើម៉ាស និងជំនួយគ្រឿងបរិក្ខារពេទ្យ ប្រឆាំងកូវីដ ជានយោបាយការទូតថ្មីរបស់ខ្លួន។
រហូតមកដល់ដើមឆ្នាំ ២០២០ នៅមុន ជំងឺរាតត្បាតកូវីដ ជំហររបស់ចិន នៅ តំបន់ដើមបូព៌ា គឺ ដាក់ខ្លួន មិនសូវបញ្ចេញសំឡេង ខាង ផ្នែកនយោបាយប៉ុន្មានទេ ដោយបណ្តោយទុកឲ្យរុស្ស៊ី ពង្រីកឥទ្ធិពលភូមិសាស្រ្តនយោបាយរុស្ស៊ី នៅក្រោយការដកខ្លួន ឬការធ្លាក់ចុះប្រជាប្រិយភាព ជាបន្តបន្ទាប់របស់អាមេរិក នៅតំបន់ដើមបូព៌ា។
មិនចូលរួមធ្វើសង្រ្គាមផ្ទាល់ដូចករណីរុស្ស៊ី ដែលជួយប្រយុទ្ធការពាររដ្ឋាភិបាលស៊ីរី ប៉ុន្តែមិនមែនមានន័យថា វត្តមាន ឬសកម្មភាពរបស់ចិន ចុះខ្សោយ នៅតំបន់ដើមបូព៌ា នោះទេ។ នៅពេល អាមេរិក រុស្ស៊ី ដំឡើងសំឡេងដាក់គ្នា ដោយសារអ៊ីរ៉ង់ ស៊ីរី ឬយេម៉ែន ចិនវិញ គឺគិតតែពីចង់សម្រេចផែនការរបស់ខ្លួន នោះ គឺប្រយោជន៍សេដ្ឋកិច្ច ហើយនិង សម្លឹងដៅអនាគតទីតាំងភូមិសាស្រ្តយោធារបស់ខ្លួន នៅដើមបូព៌ា បើអាចទៅរួច។
នៅក្នុងផលប្រយោជន៍សេដ្ឋកិច្ច ចិនដែលជាប្រទេសនាំចូលប្រេងច្រើនជាងគេក្នុងពិភពលោក បានរក្សាទំនាក់ទំនងល្អ មិនប្រកាន់រើសអើង និងទិញប្រេងពីគ្រប់ប្រទេស មិនថា ប្រទេសទាំងនោះ កំពុងជាសត្រូវនឹងគ្នា ដូចករណី អ៊ីរ៉ង់ និងអារ៉ាប៊ី សាអូឌីត។ ៤០%នៃប្រេងដែលចិនទិញស្តុកទុកក្នុងប្រទេស មានប្រភពមកពីដើមបូព៌ា(ពីកូវ៉ែត អ៊ីរ៉ង់ អារ៉ាប៊ីសាអូឌីត អេមីរ៉ាអារ៉ាប់រួម)។
ចាប់តាំងពីឆ្នាំ ២០១៣ ទំហំវិនិយោគរបស់ចិន នៅដើមបូព៌ា មានច្រើនជាង ម៉ឺនលានដុល្លារ ចាប់តាំងពីចិន ចាប់អនុវត្តគោលនយោបាយមហាសេដ្ឋកិច្ច ផ្លូវមួយ ខ្សែក្រវ៉ាត់មួយ ដែលចិនចង់ភ្ជាប់ផ្លូវសេដ្ឋកិច្ច ពីតំបន់អាស៊ី ទៅអឺរ៉ុប ដោយឆ្លងកាត់ តំបន់ដើមបូព៌ា និងអាហ្វ្រិក។ កំពង់ផែ ធំបី នៅអារ៉ាប៊ី សាអូឌីត អេហ្ស៊ីប និងអូម៉ង់ ដែលក្រុមហ៊ុនរដ្ឋចិនវិនិយោគជាមួយទឹកប្រាក់រាប់ពាន់លានដុល្លារ សុទ្ធតែអមដោយតំបន់ឧស្សាហកម្ម។
សម្រាប់ប្រទេសមួយចំនួននៅតំបន់ដើមបូព៌ា ទំនាក់ទំនងល្អជាមួយ ចិន នឹងធ្វើឲ្យពួកគេបានទទួលផលប្រយោជន៍ ទាំងក្នុងផ្នែក នយោបាយ និងផ្នែកសេដ្ឋកិច្ច ដូចជាការវិនិយោគទឹកប្រាក់រាប់លាន និងការកុម៉្មង់ទិញប្រេងពីចិន។ ម្យ៉ាងទៀត ផ្ទុយពីប្រទេសលោកខាងលិច នាំមុខដោយអាមេរិក និងអឺរ៉ុប ដែលតែងភ្ជាប់លក្ខខណ្ឌសិទ្ធិមនុស្សជាមួយនឹងជំនួយសហការនានា ចិនឯណោះវិញ មិនដែលហារស្តី រិះគន់ របបដឹកនាំផ្តាច់ការ ឬការរំលោភសិទ្ធិមនុស្ស ដូចតួយ៉ាង ដូច នៅអេហ្ស៊ីប អ៊ីរ៉ង់ ឬអារ៉ាប៊ី សាអូឌីតនោះទេ។ រហូតមក ចិនគិតតែធ្វើជំនួញ ដោយមិនខ្វល់បញ្ហានយោបាយ របស់ប្រទេសដៃគូពាណិជ្ជកម្មរបស់ខ្លួន។
វិបត្តិកូវីដ លើកនេះរឹតតែធ្វើឲ្យចិនបានទទួលការកោតសរសើរ ការឱនគោរព ជាបន្តបន្ទាប់ពីបណ្តាប្រទេសនៅតំបន់ដើមបូព៌ា ក្នុងនាមជាប្រទេសគំរូ ដែលមានស្នាដៃ ក្នុងការគ្រប់គ្រង ដោះស្រាយវិបត្តិកូវីដ ដោយជោគជ័យ។ អារ៉ាប៊ី សាអូឌីតជាដើម បានបង្ហាញសាមគ្គីភាពជាមួយ មហាអំណាចចិន ជាមួយនឹងការចុះកិច្ចសន្យាតម្លៃ ២៦៥លានដុល្លារ ដើម្បី ទិញឧបករណ៍តេស្តរកមេរោគកូវីដ និងការបញ្ជូនអ្នកជំនាញពេទ្យចិន ទៅរាជាណាចក្រអារ៉ាប៊ី សាអូឌីត។ ទីក្រុងរីយ៉ាដ ងាកទៅលើកសរសើរចិន នៅក្នុងកាលៈទេសៈ ដែលសម្ព័ន្ធមិត្តអាមេរិកកំពុងរវល់វក់វី ជួបផលវិបាក ដោយសារកូវីដ ១៩។ នៅមុននេះទៀត អារ៉ាប៊ី សាអូឌីត ទើបនឹងមានរឿងថ្នាំងថ្នាក់ជាមួយអាមេរិក ដែលបានគំរាមដកកងទ័ព បើសិន អារ៉ាប៊ី សាអូឌីត មិនព្រម ចុះកិច្ចព្រមព្រៀងជាមួយរុស្ស៊ី ក្នុងការកាត់បន្ថយការផលិតប្រេង ដើម្បីឲ្យប្រេងឡើងថ្លៃឡើងវិញ។
ដោយពង្រឹងទំនាក់ទំនងជាមួយ ចិន អារ៉ាប៊ី សាអូឌីត កំពុងចង់ទាញចំណាប់អារម្មណ៍របស់អាមេរិក ថាកុំឲ្យព្រងើយ មិនយកចិត្តដាក់ខ្លួន ដែលជាសម្ព័ន្ធមិត្ត សក្តានុពលនៅក្នុងតំបន់។ គេអាចថា ផលប្រយោជន៍បានទៅភាគី ទាំងសងខាង ព្រោះថា ចិនក៏ចង់ពង្រឹងណាស់ដែរ វត្តមានរបស់ខ្លួននៅដើមបូព៌ា។
នៅចំពោះមុខជំងឺកូវីដដែលកំពុងរាតត្បាតពាសពេញ ពិភពលោក ចិនមិនត្រឹមតែបង្ហាញ មុខមាត់របស់ខ្លួន ក្នុងនាមជាប្រទេសដែលគ្រប់គ្រងស្ថានការណ៍បានល្អតែប៉ុណ្ណោះទេ ប៉ុន្តែ ចិនកំពុងនាំមុខគេខាងផលិត នាំចេញ ម៉ាស និងគ្រឿងបរិក្ខារពេទ្យ សម្រាប់ប្រយុទ្ធប្រឆាំងនឹងជំងឺកូវីដ នៅក្នុងពិភពលោកទៀតផង។
នៅពេលនយោបាយការបរទេសរបស់ខ្លួនកំពុង ចិញ្ចាចចិញ្ចែង ទីក្រុងប៉េកាំងបានឆ្លៀត ពង្រឹងអំណាចស្រទន់របស់ខ្លួន នៅតំបន់ដើមបូព៌ា ដែលធ្លាប់តែស្ថិតនៅក្រោម ខែលរក្សាសន្តិសុខរបស់អាមេរិក។ ចាប់ដៃសហការជាមួយក្រសួងការពារជាតិ អ៊ីស្រាអែល ដែលជាសម្ព័ន្ធមិត្តរបស់អាមេរិក ដើម្បីបើកផ្លូវឲ្យយន្តហោះ ពិសេសដឹកគ្រឿងបរិក្ខារពេទ្យ និងម៉ាសចំនួន ៣លាន គឺជាឧទាហរណ៍ស្រាប់។
ប្រធានាធិបតីអាមេរិក លោកដូណាល់ ត្រាំមិនលាក់ទេពីចេតនាប្រឆាំងតបតនឹងការគំរាមកំហែងរបស់ចិន ទៅលើផលប្រយោជន៍សេដ្ឋកិច្ច និងភូមិសាស្រ្តនយោបាយ របស់អាមេរិក នៅដើមបូព៌ា។ នៅប៉ុន្មានសប្តាហ៍នេះ ដោយសារបញ្ហាកូវីដ១៩ ដែលកំពុងបំបាក់សេដ្ឋកិច្ចអាមេរិក លោកដូណាល់ ត្រាំ នៅបានគំរាមប្រើនយោបាយដំឡើងពន្ធ លើទំនិញចិន នាំចូលទៅអាមេរិក។
ទីក្រុងប៉េកាំងវិញ បដិសេធការចោទប្រកាន់របស់អាមេរិកដែលថា ចិនជាអ្នកទទួលខុសត្រូវលើការឆ្លងរីករាលដាលជំងឺកូវីដ ពេញពិភពលោក។ មិនត្រឹមប្រកែក ទីក្រុងប៉េកាំង នៅប្រកាន់ជំហរតឹងជាងមុនដោយ រិះគន់វាយបកអាមេរិកវិញ ថា បរាជ័យ នៅចំពោះមុខវិបត្តិកូវីដ។ គេឃើញជំហរបែបនេះដែរ នៅពេល ប្រទេសចិន បានហ៊ានចេញមុខចោទប្រកាន់អាមេរិក ដោយចំហរ ថា ជាអ្នកធ្វើឲ្យមានទុក្ខវេទនា វិបត្តិ មនុស្សធម៌ នៅអ៊ីរ៉ង់សព្វថ្ងៃនេះ។
កាលពីថ្ងៃទី៣០មេសាកន្លងទៅ ប្រធានាធិបតីចិន លោក ស៊ី ជីនពីង នៅបានទូរស័ព្ទ ទៅធានាអះអាងពីការគំាទ្រ ទាំងស្រុងរបស់ចិន ចំពោះរដ្ឋាភិបាលអ៊ីរ៉ង់ ជាពិសេស នៅក្នុងកាលៈទេសៈដែលប្រទេសកំពុងប្រឈមនឹងជំងឺរាតត្បាតកូវីដ ១៩។ រុស្ស៊ី ក៏ជាសម្ព័ន្ធមិត្តរបស់អ៊ីរ៉ង់ដែរ នៅក្នុង ក្របខ័ណ្ឌរក្សាអំណាចរបស់រដ្ឋាភិបាលស៊ីរី។ បុន្តែ វិបត្តិកូវីដ ដែលមិនត្រឹមតែធ្វើឲ្យអាមេរិកបាត់មុខតែមួយ ប៉ុណ្ណោះទេ។ រុស្ស៊ី ដែលគួរបានផលចំណេញពីការធា្លក់កូដរបស់អាមេរិក នៅតំបន់ដើមបូព៌ា ក៏រងគ្រោះ និងត្រូវបាត់មុខ ដោយសារកូវីដសព្វថ្ងៃនេះដែរ។ សរុបមក មានតែចិនប៉ុណ្ណោះ ដែលហាក់ដោះស្រាយ វិបត្តិកូវីដ ដោយជោគជ័យក្នុងប្រទេស និងដែលកំពុងចាត់ចែងផ្លូវដើររបស់ខ្លួននៅដើមបូព៌ា ដោយគ្មានឧបសគ្គ មិនថា នៅផ្នែកនយោបាយថ្នាក់តំបន់ ឬសេដ្ឋកិច្ច នៅក្នុងរយៈពេលយូរអង្វែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ