សមាជិកសភាហុងកុងប្រតាយប្រតប់គ្នា ដោយសារសេចក្តីព្រាងច្បាប់ដែលទោរទៅរកទីក្រុងប៉េកាំង
នៅក្នុងរយៈពេល តែ១០ថ្ងៃ សមាជិកសភាហុងកុង បានប៉ះទង្គិចគ្នាដល់ទៅ២ដង។ នៅព្រឹកថ្ងៃចន្ទទី១៨ឧសភា សមាជិកសភា មកពីខាងក្រុមអ្នកប្រជាធិបតេយ្យ និងសមាជិកសភាដែលគាំទ្រដោយទីក្រុងប៉េកាំង បានវាយប្រតាយប្រតប់គ្នា សាជាថ្មី ដោយសារតែរឿង តែងតាំង ប្រធានគណៈកម្មការដ៏ចម្រូងចម្រាស។ សមាជិកសភាដើម្បីប្រជាធិបតេយ្យ បានស្រែកបរិហាររិះគន់ប៉េកាំងថា កំពុងជាន់ឈ្លី ច្បាប់ហុងកុង។ ទីក្រុងស្វ័យតហុងកុង ដែលកំពុងត្រេកត្រអាលនឹងសេរីភាព លទ្ធិប្រជាធិបតេយ្យ មុននឹងត្រលប់ទៅនៅក្រោមការគ្រប់គ្រងទាំងស្រុងរបស់ប្រទេសចិន នៅ ឆ្នាំ ២០៤៧។
ចុះផ្សាយនៅថ្ងៃ៖
ស្តាប់ - ០២:០៣
នៅសភាហុងកុង ក្រុមអ្នកប្រជាធិបតេយ្យឈ្លោះ វាយប្រតាយប្រតប់គ្នាជាមួយ ក្រុមគាំទ្រដោយទីក្រុងប៉េកាំង ដោយសារ តែរឿងតំណែងប្រធានគណៈកម្មការ ដែលមានតួនាទី ពិនិត្យមើលសេចក្តីព្រាងច្បាប់ជាច្រើន ដែលនៅក្នុងនោះមានផងដែរ សេចក្តីព្រាងច្បាប់ស្តីពីការបង្រ្កាបទៅលើអ្នកដែលមិនគោរព ភ្លេងជាតិរបស់ប្រទេសចិន។
ក្រុមអ្នកប្រជាធិបតេយ្យ ដែលរិះគន់ប្រឆាំងនឹងសេចក្តីព្រាងច្បាប់ខាងលើ បានរារាំង មិនឲ្យមានការបោះឆ្នោត ជ្រើសតាំង ប្រធានគណៈកម្មការ សភា ដែលមានកៅអីទំនេរចោល តាំងពីខែតុលាឆ្នាំមុន។ ដោយសារតែគ្មានប្រធានដឹកនាំគណៈកម្មការ សភាហុងកុង ខកខាន មិនបានបោះឆ្នោត លើច្បាប់អ្វីសោះ តាំងពីខែតុលា។
នៅថ្ងៃចន្ទនេះ ភាពរញ៉េរញ៉ៃចាប់កើតមានឡើង នៅពេល សមាជិកម្នាក់របស់ក្រុមអ្នកប្រជាធិបតេយ្យហែកក្រដាសបោះបាចសាច មុននឹងមានការប្រតាយប្រតប់គ្នា ពេញសភា។ កម្លាំងរក្សាសន្តិសុខសភាហុងកុង វិញ បានព្យាយាមចាប់បំបែក និងរារាំង មិនឲ្យសមាជិកសភាមកពីក្រុមប្រជាធិបតេយ្យ អាចចូលទៅជិត ប្រធានគណៈកម្មការ ដែលក្រុមអ្នកគាំទ្រ ដោយទីក្រុងប៉េកាំងបានជ្រើសតាំងនោះទេ។
កាលពី ១០ថ្ងៃមុន សមាជិកសភា ទាំងពីរក្រុម បានប៉ះទង្គិច គ្នា ម្តងហើយ រហូតធ្វើឲ្យការពិភាក្សា ស្តីពីសេចក្តីព្រាងច្បាប់ នៅគណៈកម្មការ ត្រូវលើកពេលទៅ នៅថ្ងៃទី ២៧ឧសភា។ នៅថ្ងៃចន្ទនេះ សមាជិកសភា គាំទ្រដោយក្រុងប៉េកាំង បានធ្វើនយោបាយចាប់បង្ខំ ដោយបានសម្រេចឯកតោភាគី ជ្រើសរើសសមាជិករបស់ខ្លួន ឲ្យធ្វើជាប្រធានគណៈកម្មការ សភា។
សម្រាប់ក្រុមអ្នកប្រជាធិបតេយ្យហុងកុង សមាជិកសភា គាំទ្រដោយប៉េកាំង កំពុងបន្លំបោកប្រាស់ និងធ្វើសកម្មភាពខុសច្បាប់ទាំងស្រុង។ នៅលើបដារបស់ក្រុមអ្នកប្រជាធិបតេយ្យ នៅថ្ងៃចន្ទនេះ មានសរសេរថា បក្សកុម្មុយនិស្តចិនកំពុងជាន់ឈ្លី ច្បាប់ហុងកុង។
ទីក្រុងប៉េកាំងធ្លាប់បានបង្ហាញយ៉ាងច្បាស់ពីចេតនារបស់ខ្លួន ដែលចង់ឃើញហុងកុង បង្កើតច្បាប់ប្រឆាំងចលនាបះបោរ ច្បាប់ប្រឆាំងនឹងការជេរប្រមាថ ភ្លេងជាតិចិន ហើយនិងការបង្កើតឡើងវិញ កម្មវិធីស្នេហាជាតិ នៅតាមសាលារៀននៅទីក្រុងហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ