ប្រមុខដឹកនាំហុងកុង៖ សេចក្តីព្រាងច្បាប់ធ្វើបត្យាប័នទៅប្រទេសចិន “ស្លាប់បាត់ហើយ”
ប្រមុខដឹកនាំហុងកុង លោកស្រី ការី ឡាំ នៅថ្ងៃអង្គារនេះបានប្រកាសថា សេចក្តីព្រាងច្បាប់ស្តីពីការធ្វើបត្យាប័នជនសង្ស័យទៅប្រទេសចិន ដែលជាដើមហេតុនៃមហាបាតុកម្ម រហូតមកនៅហុងកុង នោះបាន”ស្លាប់”បាត់ទៅហើយ។ ការអះអាងរបស់លោកស្រីការី ឡាំ នៅតែមិនទាន់អាចបញ្ចុះបញ្ចូលក្រុមប្រឆាំង ដែលបានចោទប្រមុខដឹកនាំហុងកុង ថា កំពុងលេងពាក្យ ដើម្បីបិទបាំង ភូតកុហក ប្រជាជនហុងកុង។
ចុះផ្សាយនៅថ្ងៃ៖ កែប្រែថ្ងៃទី៖
២ថ្ងៃក្រោយ មហាបាតុកម្មរបស់ក្រុមប្រឆាំង នៅមុខស្ថានីយ៍រថភ្លើងចិន ក្នុងទឹកដី ហុងកុង ប្រមុខដឹកនាំហុងកុង លោកស្រី ការី ឡាំ ចេញមុខអះអាង នៅថ្ងៃអង្គារនេះ ថា សេចក្តីព្រាងច្បាប់ស្តីពីការធ្វើបត្យាប័នជនសង្ស័យ ទៅប្រទេសចិន ដែលប្រជាជនហុងកុងបានធ្វើបាតុកម្មប្រឆាំង តាំងពីខែ ចុងខែមីនាមកនោះ គឺស្លាប់បាត់ទៅហើយ។
តាមប្រមុខដឹកនាំហុងកុង នៅតែមន្ទិលសង្ស័យ ពីភាពស្មោះត្រង់របស់រដ្ឋាភិបាល និងការបារម្ភដែលថា រដ្ឋាភិបាលអាចត្រលប់មកស្នើច្បាប់ធ្វើបត្យាប័នសាជាថ្មី។ “ប៉ុន្តែ ខ្ញុំសូមបញ្ជាក់ជាថ្មីថា គ្មានផែនការបែបនោះទេ។ ច្បាប់នេះបានស្លាប់ហើយ” នេះជាប្រសាសន៍អះអាងរបស់លោកស្រី ការី ឡាំ។
នៅក្នុងសន្និសីទកាសែត ប្រមុខដឹកនាំហុងកុងដែលទម្លាក់កំហុសលើខ្លួនឯងរហូតមក ទទួលស្គាល់ដែរថា រដ្ឋាភិបាលជួបបរាជ័យទាំងស្រុង ដែលបានប៉ុនប៉ងស្នើឲ្យមានច្បាប់ធ្វើបត្យាប័ន និងថា ទីក្រុងហុងកុង កំពុងជួបប្រទះបញ្ហាប្រឈមដ៏សំខាន់ ជាលើកទី ១ មិនធ្លាប់មាននៅក្នុងប្រវត្តិហុងកុង។ សម្រាប់លោកស្រី ការី ឡាំ មានបញ្ហាធ្ងន់ធ្ងរ ដែលកំពុងចាក់គ្រឹះ ក្នុងសង្គមហុងកុង ដែលមានតាំងពីបញ្ហាសេដ្ឋកិច្ច បញ្ហាសង្គម ហើយនិងការបែកបាក់ខាងនយោបាយ នៅក្នុងសង្គមហុងកុង។
ប្រមុខដឹកនាំហុងកុង បានអំពាវនាវឲ្យប្រជាជនហុងកុង ទុកឱកាស ពេលវេលា និងចូលរួមទាំងអស់គ្នាដើម្បី ជួយស្រោចស្រង់ហុងកុង ចេញពីផ្លូវទាល់ច្រក។ ប៉ុន្តែ លោកស្រីបានបដិសេធមិនចុះចេញពីតំណែង ទៅតាមការទាមទាររបស់ក្រុមបាតុករនោះទេ។ សម្រាប់លោកស្រីការី ឡាំ ការលាលែងពីមុខតំណែង មិនមែនជារឿងសាមញ្ញសម្រាប់មេដឹកនាំអំណាចប្រតិបត្តិ។ ម្យ៉ាងទៀត លោកស្រីនៅចង់បំរើប្រជាពលរដ្ឋហុងកុង។
លោកស្រី ការី ឡាំបាននិយាយយល់ព្រម ផងដែរថា នឹងទទួលជួបចរចា ជាសាធារណៈជាមួយក្រុមនិស្សិតបាតុករ ដោយគ្មានលក្ខខណ្ឌ ប៉ុន្តែ លោកស្រី បដិសេធមិនទម្លាក់ចោល ការចោទប្រកាន់ ទៅលើបាតុករ ដែលត្រូវបានប៉ូលិសចាប់ខ្លួន នៅក្រោយ ការវាយសម្រុកចូល ដោយហិង្សា ទៅក្នុងអគាររដ្ឋសភា កាលដើមខែកក្កដានេះ។
សម្រាប់លោកស្រី ការី ឡាំ ការឈប់ប្តឹងផ្តល់ ជនល្មើសច្បាប់ គឺជារឿងដែលមិនអាចទទួលយកបាន ហើយនិងវាផ្ទុយនឹងច្បាប់ជាមូលដ្ឋានរបស់ហុងកុង។
ក្រុមនិស្សិត និងក្រុមប្រឆាំងនឹងច្បាប់ធ្វើបត្យាប័ន វិញ នៅតែមិនជឿទុកចិត្តសំដីរបស់ប្រមុខដឹកនាំហុងកុង និងនៅតែទាមទារឲ្យលោកស្រី ប្រកាសដកចោលទាំងស្រុងសេចក្តីព្រាងច្បាប់ស្តីពីការធ្វើបត្យាប័នទៅប្រទេសចិន។ ប្រធានចលនានិស្សិតហុងកុង លោក Joshua Wong បានចោទប្រកាន់លោកស្រី ការី ឡាំថា កំពុងលេងពាក្យ ដើម្បីភូតកុហក ប្រជាជនហុងកុង។ ប្រតិកម្មទៅនឹងការប្រកាសរបស់លោកស្រី ការី ឡាំ សមាជិកសភា មកពីគណបក្សប្រឆាំង និយាយថា គេនៅតែមិនយល់ ហេតុអ្វី លោកស្រីការី ឡាំ បដិសេធមិនប្រកាសលុបចោល សេចក្តីព្រាង ប៉ុន្តែ បែរជាទៅប្រើពាក្យស្លាប់ទៅវិញ។ សម្រាប់ សមាជិកក្រុមប្រឆាំង ទៅតាមបច្ចេកទេស សេចក្តីព្រាងច្បាប់ នៅតែមានក្នុងកម្មវិធីរបស់សភា ដែលនឹងអាចត្រូវគេលើកយកមកពិភាក្សា បោះឆ្នោត អនុម័តនៅថ្ងៃណាមួយ នាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ