វិបត្តិសេដ្ឋកិច្ចសកល ធ្វើឲ្យរោងចក្រចិន ចាប់ដំណើរការយឺតៗ
សកម្មភាពរោងចក្រចិននៅតែដើរយឺត បើទោះចិនបើកសកម្មភាពសេដ្ឋកិច្ច ជាង២ខែមកហើយ។ តួលេខផ្លូវការរបស់រដ្ឋចិន នៅថ្ងៃអាទិត្យនេះ បង្ហាញថា ដោយសារតែតម្រូវការកុម្ម៉ង់ នៅបរទេស ធ្លាក់ថយចុះ សកម្មភាព នៅរោងចក្រ ក្នុងប្រទេសចិន នៅខែឧសភា ហាក់ថយចុះបន្តិច បើប្រៀបធៀបនឹងខែមេសា ឬខែមីនា។ ប៉ុន្តែ យ៉ាងណាក៏ដោយ ក៏នៅតែច្រើនជាង៥០ពិន្ទុ ដោយមកពីមានតម្រូវការក្នុងស្រុក។ អ្នកជំនាញសេដ្ឋកិច្ចព្រួយបារម្ភផងដែរពីចំនួនការងារ ដែលអាចថយចុះ នៅពេលរោងចក្រ និងក្រុមហ៊ុនផ្តល់សេវា ថមថយសកម្មភាព ដោយសារតែកូវីដ ១៩។
ចុះផ្សាយនៅថ្ងៃ៖
ស្តាប់ - ០២:០៨
នៅក្រោយរដ្ឋាភិបាលឈប់អនុវត្តវិធានការបិទទីក្រុង រោងចក្រ នៅប្រទេសចិនបានត្រលប់ទៅចាប់ផ្តើមសកម្មភាព បញ្ឆេះម៉ាស៊ីន តាំងពីចុងខែមីនា។ ប៉ុន្តែ នៅតែមិនអាចដំណើរការបាន១០០%ដូចមុន ដោយសារតែកត្តាសេដ្ឋកិច្ចសកល និងជំងឺកូវីដ ដែលនៅសកម្ម នៅឡើយ ទាំងនៅប្រទេសចិន និងនៅក្នុងពិភពលោក។ មន្រ្តីស្ថិតិចិន លោកZhao Qinghe នៅថ្ងៃអាទិត្យ បានលើកឡើងពីចំណុចខ្សោយ នៅក្នុងការនាំចូល និងការនាំចេញ របស់ចិន ជាពិសេស វិស័យឧស្សាហកម្មវាយនភ័ណ្ឌ និងសំលៀកបំពាក់ ចិន ដែលរងប៉ះពាល់ ដោយសារ តម្រូវការពីទីផ្សារបរទេស នៅបន្តធ្លាក់ចុះ។
នៅសប្តាហ៍នេះ អ្នកវិភាគរបស់ក្រុមហ៊ុនហិរញ្ញវត្ថុជប៉ុន Nomura បានវាយតម្លៃថា ដោយសារកំណើនសេដ្ឋកិច្ច របស់បណ្តាប្រទេសមហាអំណាចឧស្សាហកម្ម អាមេរិក និងនៅអឺរ៉ុប ធ្លាក់ថយចុះ ដល់ទៅប្រមាណ ១៥% នៅត្រីមាសទី២នេះ ការនាំចេញរបស់ចិន ក៏ត្រូវ តែធ្លាក់ថយចុះដែរ។ តាមអ្នកជំនាញ ការនាំចេញរបស់ចិន មានសន្ទុះកើនឡើង បានមួយរយៈពេល កាលពី ២ខែមុននេះ ជាពិសេស ក្នុងផ្នែកនាំចេញគ្រឿងបរិក្ខាពេទ្យ សម្រាប់ជំងឺកូវីដ។ ប៉ុន្តែ កំរិតនាំចេញគ្រឿងបរិក្ខាពេទ្យ ឬម៉ាស ហាក់ថយចុះមកវិញ ព្រោះថា ប្រទេសជាច្រើន ជាពិសេសនៅអឺរ៉ុប ចាប់ផ្តើម បើករោងចក្រ ដើម្បីផលិតគ្រឿងបរិក្ខាពេទ្យ និងម៉ាស ក្នុងស្រុកឡើងវិញ ដោយលែងសូវកុម្ម៉ង់ទិញ ពីប្រទេសចិន។
សញ្ញាមិនសូវល្អនៃតួលេខនាំចេញរបស់ចិន នឹងអាចជះផលមិនល្អ ទៅលើការងារធ្វើ នៅប្រទេសចិន ទាំងនៅតាមរោងចក្រ និងនៅក្រុមហ៊ុនផ្តល់សេវា។ គួររំលឹកថា ដើម្បីទប់ស្កាត់ រលកទី ២នៃការឆ្លងរីករាលដាល ជំងឺកូវីដ រដ្ឋាភិបាលចិន នៅបន្ត បិទក្រុមហ៊ុន ដែលធ្វើការទៅលើផ្នែកវប្បធម៌ កីឡា និងឧស្សាហកម្មកំសាន្តសប្បាយ ដែលជាហេតុធ្វើឲ្យមនុស្សជាច្រើន នៅបន្តគ្មានការងារធ្វើ។ សម្រាប់អ្នកជំនាញ គេត្រូវយកចិត្តទុកដាក់ តាមដានបញ្ហានេះ ជាពិសេស នៅពេល រដ្ឋាភិបាលចិនផ្លាស់ប្តូរ គោលដៅក្នុងការបង្កើតការងារធ្វើ ក្នុងស្រុក។ សូមបញ្ជាក់ថា នៅក្នុងសម័យប្រជុំសភាប្រចាំឆ្នាំនៅដើមខែនេះ នាយករដ្ឋមន្រ្តីចិន លោកលី ខឺឈាំង បានលើកឡើងពីទិសដៅបង្កើតការងារថ្មី នៅទីក្រុង ឲ្យបាន៩លាន នៅឆ្នាំ ២០២០នេះ ពោលតិចជាង ឆ្នាំ ២០១៩ ដែលមានដល់ទៅ ១១លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ