ទីលានធានអានមិនឆ្នាំ១៩៨៩៖ តៃវ៉ាន់អំពាវនាវ ឲ្យចិនទទួលស្គាល់កំហុសឆ្គងអតីតកាល
ថ្ងៃទី៤មិថុនា គឺជាថ្ងៃគម្រប់ខួបលើកទី៣១នៃការបង្រ្កាបបាតុកម្ម ទាមទារប្រជាធិបតេយ្យ នៅទីលានធានអានមិន ទីក្រុងប៉េកាំង កាលពីឆ្នាំ១៩៨៩។ ហេតុការណ៍ប្រវត្តិសាស្ត្រ ដែលមានមនុស្សយ៉ាងហោច១ពាន់នាក់ បានស្លាប់បាត់បងជីវិតនេះ ត្រូវបានរដ្ឋាភិបាលចិនហាមឃាត់ មិនឲ្យរំលឹកនិយាយនឹកដល់ទេ។ នៅថ្ងៃទី៤មិថុនានេះ លោកស្រី ឆៃ អ៊ីងវ៉េន ប្រមុខរដ្ឋាភិបាលតៃវ៉ាន់ បានអំពាវនាវ ឲ្យគណបក្សកុម្មុយនីស្តចិន ត្រូវទទួលស្គាល់ការពិត នូវកំហុសឆ្គងរបស់ខ្លួន ក្នុងអតីតកាល និងដើម្បីគោរព ដល់វិញ្ញាណក្ខន្ធរបស់អ្នកស្លាប់។
ចុះផ្សាយនៅថ្ងៃ៖
ស្តាប់ - ០៣:០១
នៅលើទំព័រ Twitter លោកស្រី ឆៃ អ៊ីងវ៉េន បានសរសេរថា « ក្នុងលោកយើងនេះ មួយឆ្នាំមាន៣៦៥ថ្ងៃ តែសម្រាប់ចិនវិញ មានមួយថ្ងៃ ដែលត្រូវគេបំភ្លេចចោល »។ លោកស្រីសរសេរបន្តថា « ល្មមដល់ពេលហើយ ដែលរដ្ឋាភិបាលកុម្មុយនីស្តចិន ត្រូវប្រឈមមុខនឹងការពិត ទទួលស្គាល់នូវកំហុសពីអតីតកាលរបស់ខ្លួន។ តៃវ៉ាន់ក៏ធ្លាប់មានកំហុសឆ្គងក្នុងអតីតកាលដែរ ជាមួយនឹងរបបផ្តាច់ការ តែតៃវ៉ាន់បានទទួលស្គាល់កំហុស ហើយបានធ្វើរបត់ មករកលទ្ធិប្រជាធិបតេយ្យ ក្នុងទសវត្សឆ្នាំ១៩៩០ »។ លោកស្រីប្រមុខរដ្ឋាភិបាលតៃវ៉ាន់បន្ថែមថា លោកស្រីសង្ឃឹមថា ថ្ងៃណាមួយ ចិននឹងនិយាយថា ខ្លួនបានធ្វើដែរ គឺបានទទួលស្គាល់កំហុសអតីតកាល។
សូមរំលឹកថា បាតុកម្មប្រឆាំងអំពើពុករលួយ និងទាមទារលទ្ធិប្រជាធិបតេយ្យ បានផ្ទុះឡើងនៅទីក្រុងប៉េកាំង រវាងពាក់កណ្តាលខែមេសា ឆ្នាំ១៩៨៩។ ទីលានធានអានមិន កណ្តាលក្រុងប៉េកាំង បេះដូងនៃអំណាចនយោបាយបក្សកុម្មុយនីស្តចិន បានក្លាយជាទីប្រជុំនៃក្រុមបាតុកររាប់ម៉ឺននាក់។ នៅយប់ថ្ងៃទី៣មិថុនា ឈានចូលថ្ងៃទី៤មិថុនា កងទ័ពចិនបានបើកប្រតិបត្តិការបង្រ្កាប បំបែកបាតុករយ៉ាងហិង្សាបំផុត។ រហូតមកទល់ពេលនេះ រដ្ឋាភិបាលចិន មិនដែលបានបញ្ចេញតួលេខនៃចំនួនអ្នកស្លាប់ពិតប្រាកដទេ។ ប្រភពផ្សេងៗគ្នា អះអាងថាបាតុករស្លាប់ អាចមានលើសពី១០០០នាក់។
ព្រឹត្តិការណ៍ប្រវត្តិសាស្ត្រនេះ ត្រូវរដ្ឋអំណាចចិន ហាមមិនឲ្យរំលឹកជាដាច់ខាត។ តាមបណ្តាញសង្គម បណ្តាញអ៊ីនធ័រណិតក្នុងស្រុកចិន ការរំលឹកពីព្រឹត្តិការណ៍នេះ អាចប្រឈមនឹងទោសទណ្ឌ។ ឲ្យតែដល់ថ្ងៃនេះម្តងៗ អាជ្ញាធរចិន បានបង្កើនការប្រុងប្រយ័ត្ន រារាំង ឬលុបចោល ព័ត៌មានទាំងអស់ទាក់ទិននឹងហេតុការណ៍នេះ។ ជាក់ស្តែង នៅព្រឹកថ្ងៃទី៤មិថុនា២០២០នេះ អ្នកថតរូបរបស់ភ្នាក់ងារព័ត៌មានបារាំង AFP ម្នាក់ ដែលកំពុងតែថតរូបនៅទីលានធានអានមិន ត្រូវបាននគរបាលចិនហាមឃាត់ និងបញ្ជាឲ្យលប់រូបភាពចោលទាំងអស់។
កាលពីថ្ងៃពុធទី៣មិថុនា ក្រុមប្រឹក្សាកិច្ចការចិនដីគោក របស់តៃវ៉ាន់ បានអំពាវនាវឲ្យរដ្ឋាភិបាលចិនប៉េកាំង ប្រកាសសុំខមាលទោសដោយស្មោះអស់ពីចិត្ត ជាសាធារណៈ។ តែការអំពាវនាវនេះ ត្រូវបានលោក Zhao Lijian អ្នកនាំពាក្យក្រសួងការបរទេសចិន ចាត់ទុកថា វាគ្មានន័យខ្លឹមសារទាល់តែសោះ។
គួរកត់សំគាល់ថា ប្រមាណ៣០ឆ្នាំមកនេះ គឺមានតែនៅហុងកុង និងតៃវ៉ាន់ប៉ុណ្ណោះ ដែលតែងតែមានការជួបជុំរំលឹកវិញ្ញាណក្ខន្ធដល់អ្នកស្លាប់។ តែឆ្នាំនេះ ការជួបជុំគ្នានៅហុងកុង ត្រូវបានអាជ្ញាធរហាមឃាត់ ដោយលើកឡើងអំពីបញ្ហាឆ្លងរាលដាល នូវជម្ងឺកូវីដ១៩។ ទោះជាយ៉ាងនេះក្តី ក្រុមសកម្មជនប្រជាធិបតេយ្យហុងកុង បាននាំគ្នាចែកទៀនសទៅប្រជាជន និងបានអំពាវនាវ ឲ្យគ្រប់គ្នាអុជបំភ្លឺទៀននៅតាមបង្អួចតាមផ្ទះរៀងៗខ្លួន ដើម្បីជាការរំលឹកដល់វិញ្ញាណក្ខន្ធ របស់បាតុករប្រជាធិបតេយ្យ ដែត្រូវទាហានចិនសម្លាប់នៅទីលានធានអានមិន។
នៅថ្ងៃទី៤មិថុនានេះដែរ សភាហុងកុង បានបើកអង្គប្រជុំ ដើម្បីអនុម័តច្បាប់ស្តីពីការគោរពភ្លេងជាតិចិន។ អ្នកដែលមិនគោរពភ្លេងជាតិចិន អាចប្រឈមនឹងទោសជាប់ពន្ធនាគារ៣ឆ្នាំ និងត្រូវពិន័យជាប្រាក់ប្រមាណ៥ម៉ឺនដុល្លារហុងកុង។ បើទោះជាមានការហាមឃាត់ បាតុករហុងកុងជាច្រើនរយនាក់ បានមកជុំគ្នាធ្វើការតវ៉ាប្រឆាំងច្បាប់នេះ នៅខាងមុខអាគារសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ