តៃវ៉ាន់ប្រារព្ធកម្មវិធីGay Pride អបអរសិទ្ធិអ្នកស្រលាញ់ភេទដូចគ្នា តាងនាមឲ្យពិភពលោកទាំងមូល
ជារៀងរាល់ឆ្នាំនៅរវាងចុងខែមិថុនា ដល់ចុងខែកក្កដា នៅតាមប្រទេសនានា គេតែងតែមានប្រារព្ធពិធីដង្ហែរក្បួន ដើម្បីអបអរសិទ្ធិអ្នកស្រលាញ់ភេទដូចគ្នា ឬហៅជាទូទៅថា Gay Pride។ ក៏ប៉ុន្តែឆ្នាំនេះ ដោយសារតែការឆ្លងរាលដាល នូវជំងឺកូវីដ១៩ ការជួបជុំមហាជននៅទីសាធារណៈ ត្រូវបានហាមឃាត់។ ដោយឡែក តៃប៉ិ គឺជាទីក្រុងតែមួយគត់ ដែលមានការប្រារព្ធពិធីនេះ យ៉ាងឱឡាឬក ដោយសារស្ថានភាពឆ្លងរាលដាលកូវីដ១៩នៅទីនោះ ត្រូវបានគ្រប់គ្រងទាំងស្រុង។ អ្នកចូលរួមកម្មវិធីនេះ បានយកឱកាសនេះ ដើម្បីអបអរសិទ្ធិអ្នកស្រលាញ់ភេទដូចគ្នា តាងនាមឲ្យពិភពលោកទាំងមូលតែម្តង។
ចុះផ្សាយនៅថ្ងៃ៖
ស្តាប់ - ០២:៤១
ទីក្រុងតៃប៉ិ កោះតៃវ៉ាន់ បានក្លាយជានិម្មិតរូប នៃការទទួលស្គាល់សិទ្ធិ និងភាពថ្ងៃថ្នូរជាមនុស្ស របស់អ្នកស្រលាញ់ភេទដូចគ្នា និងអ្នកប្តូរភេទទាំងឡាយទូទាំងពិភពលោក។ ដោយបានគ្រប់គ្រងយ៉ាងមានប្រសិទ្ធិភាព នូវការឆ្លងរាលដាលនូវជម្ងឺកូវីដ១៩ អាជ្ញាធរក្រុងតៃប៉ិ បានបើកឲ្យមានការជួបជុំដ៏ធំ ដើម្បីអបអរបុណ្យអ្នកស្រលាញ់ភេទដូចគ្នា នៅថ្ងៃទី២៨មិថុនា។
នៅទីលានសេរីភាព កណ្តាលក្រុងតៃប៉ិ មានមនុស្សរាប់ពាន់នាក់បានចូលរួម ដោយអ្នកខ្លះមានកាន់ទង់ពណ៌ឥន្ធនូ អមដោយសម្លេងតន្ត្រីកងរំពង។ ភាគច្រើននៃអ្នកចូលរួម បានកាន់ក្រដាសបញ្ជាក់ថាខ្លួន មកចូលរួមក្នុងនាមទីក្រុង ឬប្រទេសណាមួយ ដែលមិនអាចប្រារព្ធពិធីនេះបាន ដោយសារតែបញ្ហាជំងឺឆ្លងកូវីដ១៩។
លោក Chen Darien អ្នកសម្របសម្រួលកម្មវិធីជួបជុំនេះ បានលើកឡើងថា ជាទូទៅនៅតៃវ៉ាន់ គេប្រារពកម្មវិធីអបអរសិទ្ធិអ្នកស្រលាញ់ភេទដូចគ្នានេះ នៅចុងខែតុលា។ ក៏ប៉ុន្តែនៅឆ្នាំនេះ ដោយសង្កេតឃើញថា កម្មវិធី Gay Pride ចំនួន៤៧៥នៅទូទាំងពិភពលោក ត្រូវបានលប់ចោលវិញ ដោយសារតែបញ្ហាកូវីដ១៩ ទើបសកម្មជននៅតៃវ៉ាន់ សម្រេចចិត្តរៀបចំ ធ្វើ Gay Pride នៅថ្ងៃទី២៨មិថុនាតែម្តង។ លោកបន្ថែមថា វាគឺជាកិត្តិយស និងមោទនភាពណាស់ សម្រាប់កោះតៃវ៉ាន់តូចមួយ ដែលអាចរៀបចំតាងនាមឲ្យ អ្នកស្រលាញ់ភេទដូចគ្នាទូទាំងពិភពលោក។
គួររំលឹកថា ឆ្នាំនេះ គឺជាខួបទី៥០ នៃការដើរដង្ហែរក្បួន Gay Pride ដំបូងបង្អស់នៅទីក្រុងញូយ៉កនៅឆ្នាំ១៩៧០ ពោលគឺ១ឆ្នាំ ក្រោយកើតមានបាតកម្មហិង្សា នៅStonewall ថ្ងៃទី ២៨ មិថុនា ១៩៦៩។ គួរកត់សំគាល់ដែរថា ប៉ុន្មានឆ្នាំចុងក្រោយនេះ កោះតៃវ៉ាន់ បានធ្វើការបោះពួយ បើកចំហរសង្គម ហើយបានទទួលស្គាល់សិទ្ធិ អ្នកស្រលាញ់ភេទដូចគ្នា និងអ្នកកែភេទ។ កាលពីខែឧសភា ឆ្នាំ២០១៩ សភាតៃវ៉ាន់ បានបោះឆ្នោត សម្រេចបើកឲ្យអ្នកស្រលាញ់ភេទដូចគ្នា អាចរៀបអាពាហ៍ពិពាហ៍ យ៉ាងពេញច្បាប់។ ថ្មីៗនេះទៀត រដ្ឋាភិបាលតៃវ៉ាន់ ទើបតែបានរើសសមាជិកថ្មី ដែលជាមនុស្សប្តូរភេទថែមទៀតផង។
ទោះជាយ៉ាងនេះក្តី នៅតាមប្រទេសឬតំបន់មួយចំនួនផ្សេងទៀត អ្នកស្រលាញ់ភេទដូចគ្នា នៅតែទទួលរងនូវការធ្វើទុក្ខបុកម្នេញ និងការរើសអើងក្នុងសង្គម។ មិនត្រឹមតែគ្មានការការពារពីច្បាប់ប៉ុណ្ណោះទេ ប្រទេសចំនួន១១ បានចាត់ទុកទំនាក់ទំនងផ្លូវភេទ ឬស្នេហារបស់អ្នកស្រលាញ់ភេទដូចគ្នា ថាជាបទឧក្រិដ្ឋ អាចជាប់ទោសប្រហារជីវិតផង ជាក់ស្តែងដូចជា នៅប្រទេសប្រ៊ុយណេ អារ៉ាប៊ីសាអូឌីត អាហ្វហ្កានីស្ថាន និងប៉ាគីស្ថានជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ