តុលាការភូមា ដាក់ទោស យោធា បីនាក់ ក្នុងរឿងសម្លាប់រង្គាលជនជាតិរ៉ូហ៊ីងយ៉ា
ទាហានភូមាបីនាក់ ត្រូវបានតុលាការដាក់ទោស ពីបទធ្វើទុក្ខបុកម្នេញជនជាតិភាគតិចរ៉ូហ៊ីងយ៉ា។ នេះបើតាមប្រភពដំណឹងរបស់យោធាភូមា ចេញផ្សាយនៅថ្ងៃអង្គារទី ៣០មិថុនា។ ជាការកាត់ទោសដ៏កម្រ ប្រព្រឹត្តទៅក្នុងខណៈដែលប្រទេសភូមា កំពុងប្រឈមនឹងតុលាការអន្តរជាតិ ពីបទប្រព្រឹត្តអំពើប្រល័យពូជសាសន៍លើជនជាតិភាគតិចកាន់សាសនាអ៊ីស្លាមរ៉ូហ៊ីងយ៉ានេះផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
នៅឆ្នាំ២០១៧ យោធាភូមាបានបើកប្រតិបត្តិការបោសសម្អាតពូជសាសន៍ ដ៏ហិង្សា ក្នុងទម្រង់ជា កាប់សម្លាប់ រំលោភ ដុតបំផ្លាញផ្ទះសម្បែងជនជាតិរ៉ូហ៊ីងយ៉ារាប់សិបពាន់ភូមិ នៅរដ្ឋរ៉ាឃិន ភាគពាយ័ព្យប្រទេស។ គ្មានតូលេខពិតទេ ប៉ុន្តែអង្គការការពារសិទ្ធិមនុស្សប៉ាន់ស្មានថាមាន ជនជាតិភាគតិចកាន់សាសនាអ៊ីស្លាមមិនតិចពាន់នាក់ទេបានស្លាប់ ហើយអ្នករួចពីស្លាប់ប្រមាណជាង៧៥០០០០នាក់ បានរត់គេចខ្លួនទៅជ្រកកោននៅក្នុងជំរំបណ្តោះអាសន្ននៅបង់ក្លាដែស។
ក្រុមយោធាតែងបដិសេធថាមិនបានធ្វើទុកបុកម្នេញសម្លាប់ជនជាតិរ៉ូហ៊ីងយ៉ាទេ។ តែក្រោយពីបានរកឃើញរណ្តៅកប់ខ្មោចរួម ចំនួន៥នៅក្នុងភូមិមួយ នៅឆ្នាំ២០១៨ អមដោយសក្ខីកម្មរបស់អ្នករួចពីស្លាប់និងវីដេអូជាភស្តុតាង យោធាព្រមបើកអង្កេត និងទទួលស្គាល់ថាមានកង្វះខាតក្តាប់ស្ថានការណ៍មិនបាន និងថាមានកូនទាហានចូលពាក់ព័ន្ធនឹងអំពើហិង្សានោះ។ ទាហានជាច្រើនត្រូវបានបញ្ជូនទៅតុលាការសឹក។ ហើយនៅថ្ងៃអង្គារទី ៣០មិថុនា២០២០នេះ តុលាការបានបញ្ជាក់ដាក់ទោសយោធាបីនាក់ ជុំវិញសំណុំរឿងនេះ។ នេះបើតាមការជូនដំណឹងរបស់អាជ្ញាធរយោធាភូមា ដែលបញ្ជាក់ទៀតថា ការអង្កេតស្តីអំពីការសម្លាប់រង្គាលជនជាតិរ៉ូហ៊ីងយ៉ា នៅភូមិពីរផ្សេងទៀត មិនទាន់ចប់នៅឡើយទេ។
ប៉ុន្តែគួរឱ្យសោកស្តាយ ពុំមានការលម្អិតនិងបញ្ជាក់ អំពីអត្តសញ្ញាណ អំពីកំហុស និងទោសទណ្ឌដែលយោធាទាំងបីរូបត្រូវទទួលទេ។ សវនាការប្រព្រឹត្តទៅដោយបិទទ្វារ រួមរឹតដោយរឿងសម្ងាត់ និងលូកលំ គ្មានឯករាជ្យសោះ។ នេះបើតាមការបរិហាររបស់តំណាងអង្គការការពារសិទ្ធិមនុស្ស Amnesty International នៅភូមា។
កាលពីឆ្នាំ២០១៨ តុលាការបានកាត់ទោសទាហាន៧នាក់ឱ្យជាប់ពន្ធនាគារ១០ឆ្នាំ ពីបទបានសម្លាប់ជាតិរ៉ូហ៊ីងយ៉ា ប៉ុន្តែពួកគេត្រូវបានដោះលែងឱ្យមានសេរីភាពវិញ បន្ទាប់ពីទទួលទោសមិនបានមួយឆ្នាំផង។
ការដាក់ទោសយោធាក្នុងសំណុំរឿងរ៉ូហ៊ីយ៉ានេះ ប្រពឹត្តទៅក្នុងខណៈដែលភូមា កំពុងរងការចោទប្រកាន់នៅតុលាការយុត្តិធម៌អន្តរជាតិ ក្រុងឡាអេ ពីបទប្រល័យពូជសាសន៍។ លោកស្រីអ៊ុងសានស៊ូជី ប្រមុខដឹកនាំភូមា បានធ្វើដំណើរទៅការពារប្រទេសនៅចំពោះមុខតុលាការរបស់អង្គការសហប្រជាជាតិដោយផ្ទាល់ខ្លួនតែម្តង ដោយអះអាងថាទាហានភូមាទំនងជាខុសដោយប្រើកម្លាំងជ្រុល ប៉ុន្តែគ្មានសោះចេតនាបែបប្រល័យពូជសាសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ