អូស្ត្រាលី បិទក្រុងម៊ែលបនសាជាថ្មីដោយសារករណីឆ្លងកូវីដហក់ឡើងខ្លាំងជាលើកទីពីរ
នៅអូស្រា្តលី រដ្ឋអំណាចបានសម្រេចបិទក្រុងម៊ែលបនដែលជាទីក្រុងធំទី២របស់ប្រទេស ដោយសារតែករណីឆ្លងកូវីដ១៩ ហក់ឡើងខ្លាំងសាជាថ្មី។ ពលរដ្ឋរស់នៅក្នុងទីក្រុងម៊ែលបនប្រមាណជា ៥ លាននាក់ ត្រូវបានហាមប្រាមមិនឲ្យចេញពីផ្ទះរយៈពេល ៦ សប្តាហ៍ និងចាប់មានសុពលភាពពីថ្ងៃពុធ ទី៨ កក្កដាស្អែកនេះតទៅ។
ចុះផ្សាយនៅថ្ងៃ៖
ស្តាប់ - ០២:២៦
កំណើនករណីឆ្លងកូវីដ១៩ ដែលចាប់ផ្ទុះឡើងសាជាថ្មីក្នុងទីក្រុងម៊ែលបននៅថ្ងៃអង្គារ ទី៧ កក្កដានេះ បានបង្ខំឲ្យរដ្ឋាភិបាលអូស្ត្រាលីសម្រេចបិទទីក្រុងនេះជាថ្មីម្តងទៀតដោយមិនបង្អែបង្អង់ឡើយ។
អភិបាលរដ្ឋ Victoria លោកដានីញ៉ែល អេនឌ្រូ (Daniel Andrews) បានប្រកាសថានឹងបិទទីក្រុងធំទី២របស់អូស្ត្រាលីនេះរយៈពេល ៦ សប្តាហ៍។ ទន្ទឹមគ្នានេះ លោកបានក្រើនរំឭកដែរថា គ្រប់គ្នាមិនត្រូវឈប់ខ្វល់និងគិតថាវិបត្តិកូវីដត្រូវបានបិទបញ្ចប់ទាំងស្រុងនោះទេ។
នេះរាប់ទុកថាគឺការកើនឡើងខ្លាំងថ្មីនិងជាលើកដំបូងហើយក្នុងប្រទេសអូស្ត្រាលីចាប់តាំងពីគេជឿជាក់ថា វីរុសកូវីដ១៩ អាចត្រូវបានគ្រប់គ្រងនៅទូទាំងប្រទេសតាំងពី៣ខែកន្លងមកហើយ ពោលគឺតាំងពីខែមេសាមក។ រលកទី២ នៃមេរោគកូវីដក្នុងទីក្រុងម៊ែលបននេះ សរបញ្ជាក់ឲ្យឃើញច្បាស់ថាហានិភ័យសុខាភិបាលនៅតែមានបើទោះបីជាគេអាចគ្រប់គ្រងជំងឺកូវីដបានម្តងហើយយ៉ាងណាក្តី។
គួរគូសបញ្ជាក់ជូនថា នៅក្នុងរយៈពេល ២៤ ម៉ោងចុងក្រោយនេះ អាជ្ញាធរអូស្ត្រាលីបានរកឃើញករណីឆ្លងថ្មីនៃជំងឺកូវីដចំនួន ១៩១ ករណីក្នុងក្រុងម៊ែលបន។ ភ្លាមៗក្រោយការរកឃើញនេះ លោកអភិបាលរដ្ឋ Victoria ដានីញ៉ែល អេនឌ្រូ បានមានប្រសាសន៍ថា មនុស្សម្នានឹងមិនត្រូវអនុញ្ញាតឲ្យដើរហើរដោយសេរីដូចធម្មតាទៀតបាននោះទេ។
លោកអភិបាលរដ្ឋរូបនេះបានលើកឡើងថា គ្មាននរណាម្នាក់ចង់រស់នៅក្នុងស្ថានភាពបែបនេះឡើយ ក៏ប៉ុន្តគេមិនអាចមើលស្រាលគ្រោះថ្នាក់បង្កឡើងដោយជំងឺកូវីដ ១៩ បានដូចគ្នា។ ក្នុងពេលបិទទីក្រុង ប្រជាពលដ្ឋនឹងត្រូវហាមប្រាមមិនឲ្យចេញពីផ្ទះលើកលែងតែក្នុងករណីចាំបាច់មួយចំនួនដូចជា ត្រូវធ្វើការ មើលជំងឺ ហាត់ប្រាណ និងទិញម្ហូបអាហារជាដើម។
ចំណែកសិស្សនិស្សិតវិញ ពួកគេនឹងវិលត្រឡប់ទៅអនុវត្តការរៀនសូត្រពីចម្ងាយតាមអនឡាញវិញ ខណៈពេលដែលភោជនីយដ្ឋាននិងហាងកាហ្វេនឹងត្រូវកំណត់ឲ្យបម្រើសេវាដឹកអាហារភេសជ្ជៈឲ្យអតិថជនទៅដល់ផ្ទះ។
គួរជម្រាបជូនថា គិតរហូតមកទល់នឹងពេលនេះ ករណីឆ្លងកូវីដសរុបក្នុងប្រទេសអូស្ត្រាលីមានជិត ៩ ០០០ ករណី និងមានស្លាប់ ១០៦ នាក់។ ករណីឆ្លងថ្មីប្រចាំថ្ងៃសឹងតែគ្រប់ករណីត្រូវបានគេរកឃើញនៅទីក្រុងម៊ែលបន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ