តើជប៉ុន នៅតែជាមហាអំណាចបច្ចេកវិទ្យាទំនើប ដែរឬទេ?
ចុះផ្សាយនៅថ្ងៃ៖
ស្តាប់ - ០៥:៣៤
ឧស្សាហកម្ម និងបច្ចេកវិទ្យាជប៉ុន ត្រូវបានពិភពលោកទទួលស្គាល់គុណភាព ជាច្រើនទសវត្សមកហើយ។ ជប៉ុនបានកសាងខ្លួន ជាមហាអំណាចឧស្សាហកម្ម និងបច្ចេកវិទ្យាទំនើប តែក្នុងរយៈពេលខ្លី ក្រោយចាញ់សង្រ្គាមលោកលើកទី២យ៉ាងដំណំ។ កាលពីក្នុងទសវត្សឆ្នាំ១៩៨០ អ្នកវិភាគសេដ្ឋកិច្ចគ្រប់ៗគ្នា បានសរសើរនិងចាត់ទុកជប៉ុន ជាប្រទេសដែលមានជោគវាសនាដ៏គួរឲ្យស្ញប់ស្ញែង។ គំនិតបង្កើតថ្មីនៃបច្ចេកវិទ្យាជប៉ុន ធ្លាប់បានជះឥទ្ធិពល ពាសពេញពិភពលោក។ ក៏ប៉ុន្តែចាប់តាំងដើមសតវត្សទី២១ បច្ចេកវិទ្យាជប៉ុនហាក់ដូចបាត់មុខ លែងសូវឮឈ្មោះតទៅទៀត ខណៈដែរបច្ចេកវិទ្យាទំនើបសឹងតែទាំងអស់ បានចេញពីសហរដ្ឋអាេមរិក។ តើមកទល់ឆ្នាំ២០២០នេះ ជប៉ុននៅតែត្រូវគេចាត់ទុកថា ជាមហាអំណាចបច្ចេកវិទ្យាទំនើប ទៀតដែរឬទេ?
មានមនុស្សច្រើននាក់ណាស់ ដែលនៅចាំបាននូវ កូនម៉ាញ៉េចាក់កាសែតស្តាប់កាសត្រចៀក យកតាមខ្លួនបាន ឈ្មោះ Sony Walkman។ កូនម៉ាញ៉េតូចដ៏ល្បីរបស់ជប៉ុននេះ បានធ្វើឲ្យមនុស្សម្នាផ្អើលឈូរឆចង់បាន មិនថាចាស់មិនថាក្មេង កាលពីដើមទសវត្សឆ្នាំ១៩៨០។ នេះជាឧទាហរណ៍មួយ ក្នុងចំណោមឧទាហរណ៍ច្រើនរាប់មិនអស់ ដែលបញ្ជាក់ពីភាពជោគជ័យ នៃគំនិតបច្ចេកវិទ្យាទំនើប របស់សហគ្រាសជប៉ុន។
តែប្រមាណ២០ឆ្នាំចុងក្រោយនេះ ការច្នៃប្រឌិតថ្មីនៃបច្ចេកវិទ្យាជប៉ុន ហាក់ដូចជាស្ងាត់បាត់សម្លេង។ តំបន់ Silicone Valley រដ្ឋ California សហរដ្ឋអាមេរិក បានក្លាយជាជង្រុកថ្មី នៃគំនិតច្នៃប្រឌិតបច្ចេកវិទ្យាទំនើប។ Microsoft Google Apple IBM គឺសុទ្ធតែឈ្មោះក្រុមហ៊ុនបច្ចេកវិទ្យាទំនើបរបស់អាមេរិក។ តើវិស័យផលិតកម្ម បច្ចេកវិទ្យារបស់ជប៉ុនបានថយចុះខ្លាំងឬ? តើជប៉ុនបានបាត់បង់តំណែង ជាមហាអំណាចបច្ចេកវិទ្យាហើយមែនទេ?
បើយើងពិនិត្យតាមតួលេខផ្លូវការ កំណើនសេដ្ឋកិច្ចរបស់ជប៉ុន ពិតជាបានចាប់ផ្តើមថយចុះមែន គិតពីចុងទសវត្សឆ្នាំ៩០មក។ ពីឆ្នាំ ១៩៩៩ ដល់ឆ្នាំ២០១៤ កំណើតសេដ្ឋកិច្ចជប៉ុន មានជាមធ្យមប្រមាណ ០,៩% ចំណែកអឺរ៉ុបវិញមាន ១,៥% រីឯសហរដ្ឋអាមេរិកមាន ២,៥%។ ក៏ប៉ុន្តែ បើពិនិត្យលើ កម្រិតរីកចំរើននៃផលិតផលដុលក្នុងស្រុក សម្រាប់ប្រជាជនម្នាក់ៗវិញ គឺជប៉ុនបានកើនឡើងជាមធ្យម០,៨% ខណៈអឺរ៉ុបមាន១% អាមេរិកមាន១,៥%។ នេះមានន័យថា វិស័យផលិតកម្មរបស់ជប៉ុន មិនសូវជាធ្លាក់ចុះប៉ុន្មានទេ។
មតិយល់ឃើញខ្លះ លើកឡើងថា គំរូសេដ្ឋកិច្ចជប៉ុនដែលដំណើរការល្អពីមុននោះ លែងឆ្លើយតបទៅនឹងការវិវឌ្ឍន៍របស់សេដ្ឋកិច្ចសកល នាពេលបច្ចុប្បន្ននេះហើយ។ គឺមានតែសហរដ្ឋអាមេរិកទេ ដែលនាំមុខគេ ក្នុងវិស័យបច្ចេកវិទ្យាទំនើប។ គំរូសេដ្ឋកិច្ចបែប « សេរីនិយមជំនាន់ថ្មី » របស់អាមេរិក បានបើកផ្លូវឲ្យមនុស្សដែលមានទេពកោសល្យ មានគំនិតច្នៃប្រឌិត អាចដំឡើង សម្រេចគម្រោង និងផលិតចេញជាផលិតផលនានា បានយ៉ាងលឿនរហ័ស ក្រោមការឧបត្ថមរបស់សកលវិទ្យាល័យ និងស្ថាប័នហិរញ្ញវត្ថុឯកជន។
ការពិត ជប៉ុនក៏ធ្លាប់បានធ្វើកំណែទម្រង់សេដ្ឋកិច្ច បង្វែរទិសទៅរក ទ្រឹស្តីសេរីនិយមជំនាន់ថ្មីដែរ តែគំរូសេដ្ឋកិច្ចរបៀបនេះ ហាក់ដូចជាមិនចូលធាតុ ជាមួយផ្នត់គំនិតរបស់សហគ្រាសជប៉ុនទេ។ តែយ៉ាងណា មិនមែនមានន័យថា វិស័យបច្ចេកវិទ្យាគំនិតបង្កើតថ្មី របស់ជប៉ុន ត្រូវជាប់គាំងនោះទេ។ ក្រុមហ៊ុនឧស្សាហកម្មធំៗរបស់ជប៉ុន មានដូចជា Toyota Sony Toshiba Canon ជាដើម នៅតែបន្តស្វះស្វែង បង្កើតបច្ចេកវិទ្យាថ្មីៗជានិច្ច បើទោះបីវាមិនស្ថិតនៅលំដាប់ជួរមុខ ដែលគេស្គាល់ច្រើនក៏ដោយ។
វិស័យបច្ចេកវិទ្យាថ្មីរបស់ជប៉ុន មិនសូវមានគេស្គាល់មែន តែមានបច្ចេកវិទ្យាខ្លះ ជប៉ុននៅតែស្ថិតនៅជួរមុខគេ សឹងតែផ្តាច់មុខតែម្នាក់ឯង ដោយអ្នកផ្សេងត្រូវការជាចាំបាច់ មិនអាចខ្វះបាន។ ឧទាហរណ៍ដូចជា ធាតុផ្សំសំខាន់ៗមួយចំនួន ដែលត្រូវការចាំបាច់ ក្នុងការផលិត iPhone ក្រុមហ៊ុន Toray ជំនាញផ្នែកគ្រឿងផ្សំគ្រឿងយន្តលើអាកាស ក្រុមហ៊ុន Fanuc និង Yaskawa ជំនាញផ្នែកគ្រឿងម៉ាស៊ីនរ៉ូបូ និងក្រុមហ៊ុន Horiba ជំនាញផលិតផលិតផលបច្ចេកវិទ្យាវាស់និងវិភាគ ដ៏ឈានមុខគេ។ ក្នុងវិស័យបច្ចេកវិទ្យា ផលិតកម្មវិធីព័ត៌មានវិទ្យា និងល្បែងVideo Game វិញ ជប៉ុននៅតែនាំមុខគេជានិច្ច ជាមួយក្រុមហ៊ុន Sony Enternainment និងក្រុមហ៊ុន Nintindo។
ផលិតផលបច្ចេកវិទ្យាទំនើបរបស់ជប៉ុន មិនសូវល្បីខ្ទរខ្ទារដូចបច្ចេកវិទ្យាអាមេរិកមែន ព្រោះវាជាបច្ចេកវិទ្យាដែលមានចរិកលក្ខណៈបែបជប៉ុន ដែលស្ងប់ស្ងាត់ តែម៉ឺងម៉ាត់ និងអត់ធន់។ ក្នុងប្រវត្តិសាស្ត្រឧស្សាហកម្មនៅជប៉ុន មានពាក្យស្លោកមួយដ៏ល្បី ដែលប្រែថា « ស្មារតីជប៉ុន ចំណេះដឹងប្រទេសលោកខាងលិច »។ ក្នុងន័យនេះ គឺជប៉ុនមិនចំលងបច្ចេកវិទ្យាពីគេ ឬធ្វើតាមគេទាំងស្រុងទេ។ អ្នកជំនាញ វិស្វករជប៉ុនគ្រប់គ្នា មានគំនិតមួយក្នុងខ្លួនគឺត្រូវធ្វើយ៉ាងណា ឲ្យបច្ចេកវិទ្យាដែលខ្លួននាំចូលមក ឬផលិតថ្មី ត្រូវតែឆ្លើយតបទៅនឹងរបត់ និងតម្រូវការរបស់មនុស្សក្នុងសង្គម។
វិស័យស្រាវជ្រាវ និងអភិវឌ្ឍន៍ នៅតែជាអាទិភាពរបស់សហគ្រាសធំៗ នៅជប៉ុន។ តែការបង្កើតបច្ចេកវិទ្យាថ្មីនីមួយៗ ត្រូវឆ្លើយតបទៅនឹងតម្រូវការក្នុងសង្គម និងឈរលើស្មារតី អន្តរកម្ម រវាងវិទ្យាសាស្ត្រ បច្ចេកវិទ្យា និងសង្គមមនុស្ស។ នេះគឺជាអ្វីដែល មានកំណត់នៅក្នុងគោលនយោបាយ វិទ្យាសាស្ត្របច្ចេកទេស របស់រដ្ឋាភិបាលជប៉ុនសម្រាប់ឆ្នាំ២០២១-២០២៥។
ការសិក្សាលំអិត ទៅលើប្រព័ន្ធឧស្សាហកម្ម និងបច្ចេកវិទ្យាជប៉ុន បានធ្វើឲ្យអ្នកវិភាគជាច្រើន យល់ឃើញថា សម្រាប់ជប៉ុន បច្ចេកវិទ្យា ត្រូវតែផ្សារភ្ជាប់ជាមួយសង្គមមនុស្ស។ កម្លាំងការងាររួមគ្នារបស់បុគ្គលិក គ្រប់ជាន់ថ្នាក់ គឺជាផ្នែកមួយមិនអាចខ្វះបាន ដើម្បីស្ថាបនាបច្ចេកវិទ្យាថ្មីមួយ។ ឆ្លងកាត់បទពិសោធន៍ជូរចត់ នៃគ្រោះមហន្តរាយនុយក្លេអ៊ែរ Fukushima Daiichi នៅ២០១១ ក្នុងផ្នត់គំនិតជប៉ុន បច្ចេកវិទ្យាត្រូវតែបំរើដល់សង្គមមនុស្ស ពុំនោះទេ វានឹងគ្មានតម្លៃអ្វីទេ។ វិស័យបច្ចេកវិទ្យាទំនើបរបស់ជប៉ុន អាចប្រហែលជាផលិតបានចំនួនតិច មិនសូវល្បីល្បាញ ដូចបច្ចេកវិទ្យាអាមេរិកមែន តែបច្ចេកវិទ្យាជប៉ុននៅតែនំាំមុខគេ ព្រោះវាជាបច្ចេកវិទ្យាដែល នៅមានមនសិកាមនុស្សនិយម មិនមែនប្រាក់ចំណេញនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ