តៃវ៉ាន់ អំពាវនាវឲ្យប្រទេសសេរី រួមគ្នា ប្រយុទ្ធនឹងការពង្រីកទ្រឹស្តីនយោបាយផ្តាច់ការ របស់ចិនប៉េកាំង
កាលពីថ្ងៃព្រហស្បតិ៍ ទី១៦កក្កដា រដ្ឋាភិបាលតៃវ៉ាន់ បានថ្លែងការអំពាវនាវ សុំឲ្យប្រទេសប្រជាធិបតេយ្យសេរីទាំងអស់ ត្រូវរួមគ្នាប្រយុទ្ធប្រឆាំង នឹងការពង្រឹកទ្រឹស្តីនយោបាយផ្តាច់ការ របស់ចិនប៉េកាំង។ តៃវ៉ាន់ព្រួយបារម្ភថា ជាមួយនឹងច្បាប់សន្តិសុខជាតិ ដែលចិនបានអនុវត្តមកលើដែនដីហុងកុង នឹងអាចក្លាយជាឧបករណ៍ថ្មីមួយ ដើម្បីឲ្យចិនប៉េកាំង អនុវត្តនយោបាយការទូតបែបចាប់ចំណាប់ខ្មាំង ដើម្បីបន្លាចប្រទេសសេរីផ្សេងទៀត មិនឲ្យហ៊ានរិះគន់។
ចុះផ្សាយនៅថ្ងៃ៖
ស្តាប់ - ០២:០៣
លោក Chen Ming Tong រដ្ឋមន្ត្រីការបរទេសតៃវ៉ាន់ បានលើកឡើងថា ច្បាប់ថ្មីស្តីពីសន្តិសុខជាតិ ដែលចិនបានដាក់សង្កត់ ពីលើសិទ្ធិសេរីភាពរបស់ហុងកុងនោះ គឺជាគ្រោះថ្នាក់ធំណាស់ ព្រោះចិនអាចនឹងយកវា ដើម្បីអនុវត្តគោលនយោបាយការទូត តាមរយៈការចាប់ចំណាប់ខ្មាំង។ លោកពន្យល់ថា ជាមួយនឹងវិបត្តិជុំវិញ បញ្ហាក្រុមហ៊ុន Huawei យើងបានឃើញហើយ ថាចិនបានប្រើវិធី ចាប់ជនបរទេសជាចំណាប់ខ្មាំង ហើយចោទថា ធ្វើសកម្មភាពប្រឆាំងរដ្ឋាភិបាល និងផលប្រយោជន៍ចិន។
លោកបន្ថែមថា ច្បាប់សន្តិសុខជាតិរបស់ចិន នឹងបើកដៃ ឲ្យនរគបាលចិន ធ្វើសកម្មភាពតាមដាន ចាប់ចងមនុស្សដោយផ្ទាល់ នៅលើដែនដីហុងកុង និងបញ្ជូនមនុស្សទៅកាន់ចិនដីគោក។ លោករដ្ឋមន្ត្រីការបរទេសតៃវ៉ាន់ អះអាងថា ចិននឹងធ្វើអំពើទាំងនេះ ដើម្បីដាក់សំពាធ ឬបំភ័យរដ្ឋាភិបាលបរទេស មិនឲ្យរិះគន់ចិន។ ជាចុងក្រោយ លោករដ្ឋមន្ត្រីការបរទេសតៃវ៉ាន់ បានអំពាវនាវ ឲ្យប្រទេសប្រជាធិបតេយ្យសេរីទាំងអស់ រួមគ្នាប្រយុទ្ធ យកឈ្នះការពង្រីកទ្រឹស្តីនយោបាយបែបផ្តាច់ការនិយម របស់ចិនប៉េកាំង។
គួរកត់សំគាល់ថា ជាមួយនឹងច្បាប់សន្តិសុខជាតិ របសចិន ដែលចូលជាធរមានកាលពីដើមខែកក្កដានេះ គឺបានធ្វើឲ្យកោះតៃវ៉ាន់មានការបារម្ភជាខ្លាំង ពីវាសនាអនាគត់ខ្លួន។ ចិនតែងតែអះអាងជានិច្ចថា តៃវ៉ាន់គឺជាដែនដីរបស់ចិនតែមួយ ហើយថ្ងៃណាមួយ ចិននឹងយកមកគ្រប់គ្រងវិញ បើទោះបីត្រូវប្រើកម្លាំងក៏ដោយ។ លោកស្រី ឆៃ អ៊ីងវ៉េន ប្រមុខរដ្ឋាភិបាលតៃវ៉ាន់ ធ្លាប់បានប្រកាសថា បើសិនទៅថ្ងៃមុខ ច្បាប់សន្តិសុខជាតិចិន នេះហ៊ានតែប៉ះពាល់ ដល់តៃវ៉ាន់ នោះតៃវ៉ាន់នឹងមិនឈរនៅស្ងៀមឡើយ។
គួរបញ្ជាក់ដែរថា តៃវ៉ាន់ មានករិយាល័យទំនាក់ទំនងពាណិជ្ជកម្ម និង វប្បធម៌មួយរបស់ខ្លួន ប្រចាំនៅហុងកុង។ ក៏ប៉ុន្តែចាប់តាំងពីពាក់កណ្តាលឆ្នាំ២០១៨មក ការិយាល័យនេះ មិនមានប្រធានគ្រប់គ្រងចាត់ចែងទេ ដោយសារតែអាជ្ញាធរហុងកុង មិនបានផ្តល់ទិដ្ឋាការ។ ហុងកុង ដែលពីមុនមក ធ្លាប់មានទំនាក់ទំនងល្អ ជាមួយតៃវ៉ាន់ តែពេលនេះ ហាក់ដូចជាបានងាកទៅរកចិនដីគោក បែរខ្នងដាក់តៃវ៉ាន់ ឲ្យនៅឯកោ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ