ម៉ាឡេស៊ីចាប់បាននិងបញ្ជួនសំរាមខុសច្បាប់១៨៦៤តោន ទៅរូម៉ានីវិញ
ដោយហេតុកូរ៉ូណាវីរុស ព្រំដែនជាច្រើនប្រទេសបានបិទមិនទទួលស្វាគមន៍មនុស្សម្នានិងទេសចរទេ ប៉ុន្តែការបិទព្រំដែននេះមិនអាចរារាំងលំហូរសំរាមនៅលើភពផែនដីឡើយ។ អាជ្ញាធរម៉ាឡេស៊ី ទើបបានទទួលទំនិញ ដែលមិនបានកម្មង់ ដ៏ច្រើនមហិមាមិនធ្លាប់មាន មកពីប្រទេសរ៉ូមានី ចូលមកដល់ផែរបស់ខ្លួន។ ជាសំរាមខុសច្បាប់ហើយ និងពុលខ្លាំងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
បើមើលពីក្រៅ គ្មានអ្វីចម្លែកសោះ ! កុងតឺន័រចំនួន១១០ បានចូលមកតោងក្នុងកំពង់ផែ Tanjung Pelepas របស់ម៉ាឡេស៊ី ដូចជាកុងតឺន័រទំនិញរាប់សិបពាន់ផ្សេងទៀតដែរ។ ប៉ុន្តែវត្ថុនៅខាងក្នុង មិនមែនជាទំនិញធម្មតាទេ គឺជាកម្ទេចដែក ជាសំរាមនៃរោងចក្រផលិតថែកដែប ដែលមានផ្ទុកទៅដោយលោហៈពុលជាច្រើនមុខ ដូចជា សង្កសី សំណ និងកាដមីញ៉ូម។
កុងតឺន័រប្រភេទនេះ មិនត្រឹមតែខុសច្បាប់ទេ តែគ្រោះថ្នាក់ខ្លាំងណាស់ ប៉ុន្តែម៉ាឡេស៊ី និងឥណ្ឌូណេស៊ីជិតខាង រកឃើញកាន់តែច្រើនឡើងៗ និងញយៗឡើង កុងតឺន័រសំរាមខុសច្បាប់ចូលមកក្នុងកំពង់ផែរបស់ខ្លួន តាំងពីចិនបានប្រកាសបិទព្រំដែនមិននាំចូលសំរាម តាំងពីឆ្នាំ២០១៨មក។
សំរាមបានក្លាយជាវិបត្តិមួយដ៏ធ្ងន់ធ្ងរ។ តែនៅលើកនេះ ខុសពីលើកមុនៗ បរិមាណនៃសំរាមដែលនាំចេញមកពីប្រទេសរូមានី មានទំហំធំមហិមាមែនទែន មិនធ្លាប់ជួបប្រទះពីមុនមកទេ។ គឺមានទំហំដល់ទៅ ១៨៦៤តោន។ ដោយគ្មានបង្អង់ អាជ្ញាធរម៉ាឡេស៊ី បានបញ្ចេញប្រតិកម្មតបត ដោយស្នើសុំទៅប៉ូលិសអន្តរជាតិីInterpole ឱ្យបើកអង្កេតអំពីដំណើរមកដល់នៃទំនិញខុសច្បាប់នេះ និងបានស្នើសុំទៅរ៉ូមានី ឱ្យមកជញ្ជូនសំរាមពុលយកទៅវិញ។
នេះមិនមែនជាលើកទីមួយទេ ដែលម៉ាឡេស៊ីធ្វើសំណើបែបបទបញ្ជូនសំរាមត្រលប់ទៅឱ្យប្រទេសដើមវិញ។ កាលពីខែមករា ឆ្នាំ២០២០ មានកុងតឺន័រសំរាមប្លាស្ទិកចំនួន ១៥០ បានចូលមកដល់កំពង់ផែម៉ាឡេស៊ីដោយខុសច្បាប់ ហើយត្រូវបានបញ្ជូនត្រលប់ទៅកាន់អឺរ៉ុបនិងអាមេរិកខាងជើងវិញ។ កាលណោះ ម៉ាឡេស៊ីបានអះអាងបញ្ជាក់យ៉ាងច្បាស់រួចហើយថា ម៉ាឡេស៊ីមិនមិនជាធុងសំរាមរបស់ពិភពលោកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ