ការសិក្សា៖ សត្វ ៣ពាន់លានក្បាលបានរងផលប៉ះពាល់ដោយភ្លើងឆេះព្រៃនៅអូស្ត្រាលី
សត្វរហូតដល់ទៅចំនួនជិត ៣ពាន់លានក្បាល បានស្លាប់ឬក៏រត់ចេញពីទីជម្រកដោយសារតែគ្រោះភ្លើងឆេះព្រៃនៅក្នុងប្រទេសអូស្ត្រាលី។ ជាគ្រោះមហន្តរាយដ៏ធំមិនធ្លាប់មានពីមុនមកនៅអូស្ត្រាលី និងបានកើតឡើងកាលពីចុងឆ្នាំ ២០១៩ ដើមឆ្នាំ ២០២០ កន្លងទៅ។ នេះ បើយោងតាមរបាយការណ៍មួយដែលបានចេញផ្សាយនៅថ្ងៃអង្គារ ទី២៨ កក្កដានេះ។
ចុះផ្សាយនៅថ្ងៃ៖
ស្តាប់ - ០២:៣០
ការសិក្សារបស់អ្នកវិទ្យាសាស្ត្រមកពីសាកលវិទ្យាល័យអូស្រ្តាលីជាច្រើន បានឲ្យដឹងថា សត្វព្រៃដែលរងផលប៉ះពាល់រួមមានថនិកសត្វចំនួន ១៤៣ លានក្បាល សត្វល្មូន ២,៤៦ ពាន់លាន សត្វបក្សី ១៨០ លាន និងកង្កែប ៥១ លានក្បាល។
របាយការណ៍ខាងលើ មិនបានបញ្ជាក់លម្អិតនោះទេ ថាតើមានសត្វប៉ុន្មានក្បាល ដែលបានស្លាប់ដោយសារតែគ្រោះភ្លើងឆេះព្រៃ។ ដោយឡែក នាខណៈពេលនេះ គេកំពុងមានការបារម្ភថាសត្វដែលបានរត់ចេញពីជម្រក អាចកំពុងជួបបញ្ហាដោយសារការខ្វះចំណីអាហារ ទីជម្រក និងត្រូវរងការវាយប្រហារនានាពីសត្រូវ។
គួររំឭកជូនថា អគ្គិភ័យបានបំផ្លាញព្រៃនិងដីព្រៃចំនួន ១១៥ ០០០ គីឡូម៉ែត្រការ៉េនៅទូទាំងប្រទេសអូស្ត្រាលីកាលពីចុងឆ្នាំ ២០១៩ ដើមឆ្នាំ ២០២០។ មនុស្សជាង ៣០ នាក់បានស្លាប់ ហើយផ្ទះសម្បែងរាប់ពាន់ខ្នងត្រូវបានបំផ្លាញក្នុងគ្រោះមហន្តរាយកាលណោះ។
វា គឺជាគ្រោះភ្លើងឆេះព្រៃដ៏ធំនិងមានរយៈពេលយូរជាងគេបំផុតមួយក្នុងប្រវត្ដិសាស្ដ្រទំនើបរបស់អូស្រ្តាលី។ អ្នកវិទ្យាសាស្ដ្របានសន្និដ្ឋានថា អគ្គីភ័យមានសភាពធ្ងន់ធ្ងរជាងពេលណាៗទាំងអស់ ទំនងដោយសាររងឥទ្ធិពលពីការប្រែប្រួលអាកាសធាតុ។
ការសិក្សាមួយនៅក្នុងខែមករាបានប៉ាន់ស្មានថា អគ្គីភ័យបានសម្លាប់សត្វប្រមាណ ១ពាន់លានក្បាល នៅរដ្ឋភាគខាងកើតដែលរងគ្រោះខ្លាំងបំផុត គឺរដ្ឋ New South Wales និង រដ្ឋ Victoria ។ របាយការណ៍ ដែលទើបត្រូវបានចេញផ្សាយនៅថ្ងៃអង្គារនេះ គឺជាការសិក្សាលើកដំបូងបង្អស់ដែលគ្របដណ្តប់តំបន់អគ្គិភ័យនៅទូទាំងទ្វីប។ នេះ បើតាមការលើកឡើងរបស់ ប្រធានដឹកនាំអ្នកវិទ្យាសាស្ត្រអូស្ត្រាលីនៃសាកលវិទ្យាល័យស៊ីដនី អ្នកស្រី លីលី វ៉ាន អ៊ីដិន( Lily van Eeden)។
យ៉ាងណាក៏ដោយ លទ្ធផលនៃការសិក្សាចេញផ្សាយថ្ងៃអង្គារនេះ នៅមិនទាន់ចាត់ទុកថាជារបាយការណ៍ចុងក្រោយនោះទេ។ គេរំពឹងថា របាយការណ៍ផ្លូវការចុងក្រោយនឹងអាចចេញផ្សាយនៅខែសីហាក្រោយ។ ទោះជាបែបនេះក្តី ក្រុមអ្នកសិក្សាបាននិយាយថា ចំនួនសត្វ ៣ ពាន់លានក្បាល ដែលរងផលប៉ះពាល់ទំនងជាមិនមានការផ្លាស់ប្តូរទេ។
គួរជម្រាបជូនថា របាយការណ៍ស្តីអំពីផលប៉ះពាល់ដោយសារភ្លើងឆេះព្រៃនៅអូស្ត្រាលី ចេញផ្សាយនៅថ្ងៃអង្គារនេះ រៀបរៀងដោយក្រុមអ្នកវិទ្យាសាស្ត្រអូស្ត្រាលីមកពីច្រើនសាកលវិទ្យាល័យមានដូចជាសាកលវិទ្យាល័យស៊ីដនី សាកលវិទ្យាល័យ New South Wales សាលកវិទ្យាល័យ Charles Sturt និងក្រុមអភិរក្សបក្សីអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ