បិតាប្រជាធិបតេយ្យតៃវ៉ាន់ ដែលជាបន្លាក្នុងភ្នែកប៉េកាំង ទទួលមរណភាព
លោកលី ទឹងហ៊ុយ Lee Teng-huiអតីតប្រធានាធិបតីតៃវ៉ាន់ ពីឆ្នាំ១៩៨៨-២០០០ បានទទួលមរណភាព នៅថ្ងៃព្រហស្បតិ៍ទី ៣០កក្កដា ២០២០ ក្នុងជន្មាយុ ៩៧ឆ្នាំ។ ឈ្មោះលោក លី ទឹងហ៊ុយ បានចារក្នុងទំព័រប្រវត្តិសាស្ត្រតៃវ៉ាន់ ដោយបានស្តារលទ្ធិប្រជាធិបតេយ្យ នាំកោះឱ្យបានស្គាល់សេរីភាពនិងភាពជឿនលឿន ទាំងត្រូវតស៊ូទល់នឹងគំនាបរបស់ចិនប៉េកាំង។
ចុះផ្សាយនៅថ្ងៃ៖
ស្តាប់ - ០២:១១
តៃវ៉ាន់មានទុក្ខជាទម្ងន់ ចំពោះមរណភាពរបស់អតីតប្រធានាធិបតី លី ទឹងហ៊ុយ ដែលពិភពលោក (លើកលែងតែចិន) ប្រសិទ្ធនាមថា “លោកប្រជាធិបតេយ្យ”។ ប៉ុន្តែប៉េកាំងបានហៅលោកថា ជាជនបង្កបញ្ហា ជាជននាំគ្រោះថ្នាក់ ជាជនបះបោរចង់ផ្តាច់ខ្លួន។
កើតនៅឆ្នាំ១៩២៣ ទទួលការសិក្សានៅជប៉ុន ជំនាញខាងកសិកម្ម លោក លី ទឹងហ៊ុយ ធ្លាប់ជាចៅហ្វាយក្រុងតៃប៉ិ មុននឹងបានឡើងកាន់តំណែងជាអនុប្រធានាធិបតីតៃវ៉ាន់នៅឆ្នាំ១៩៨៤។ ក្លាយជាប្រធានាធិបតីតៃវ៉ាន់ នៅឆ្នាំ១៩៨៨ លោក លី ទឹងហ៊ុយ បានដឹកនាំធ្វើកំណែទម្រង់នយោបាយទ្រង់ទ្រាយបិទបញ្ចប់របបដឹកនាំបែបផ្តាច់ការ និងរៀបចំឱ្យមានការបោះឆ្នោតសភានិងប្រធានាធិបតី តាមគន្លងប្រជាធិបតេយ្យ ដែលលោកបានទទួលជោគជ័យយ៉ាងត្រចះត្រចង់នៅឆ្នាំ១៩៩៦ តែក្រោមក្រសែភ្នែកក្តៅក្រហាយយ៉ាងខ្លាំងរបស់ប៉េកាំង។
ជាប្រធានាធិបតីតៃវ៉ាន់ដំបូងគេបង្អស់ដែលមានកំណើតកើតជានៅតៃវ៉ាន់និងប្រសូតចេញពីការបោះឆ្នោត លោក លី ទឹងហ៊ុយ មិនទទួលស្គាល់គោលការណ៍ចិនតែមួយទេ លោកជាតំណាងចលនាដឹកនាំទាមទារបូរណភាពដែនកោះ ដើម្បីឱ្យក្លាយជារដ្ឋមួយស្មើភាពគ្នានឹងចិន និងទទួលស្គាល់ដោយអន្តរជាតិ។ តៃវ៉ាន់ក្រោមការដឹកនាំរបស់លោកលី ទឹងហ៊ុយ សម្គាល់ដោយភាពតានតឹងយ៉ាងជាមួយប៉េកាំង រហូតដល់ថ្នាក់ចិនបានបាញ់មីស៊ីលសំដៅច្រកសមុទ្ទតៃវ៉ាន់ផង។ ភាពតានតឹងឡើងកាន់តែខ្លាំងនៅពេលលោកលី បានទៅជាន់ទឹកដីសហរដ្ឋអាមេរិក ហើយអាមេរិកបានបញ្ជូននាវាផ្ទុយយន្តហោះមកការពារតៃវ៉ាន់។
លោក មៃប៉ុមបេអូ បានលំអោនកាយគោរពអបអរស្នាដៃរបស់លោក លី ទឹងហ៊ុយ ដែលបានចូលរួមចំណែកបិទបញ្ចប់របបផ្តាច់ការ ស្ថាបនាប្រទេសឱ្យបានស្គាល់ភាពរុងរឿង។ ចំណែកលោកស្រី ប្រធានាធិបតីកំពុងកាន់អំណាច សៃត៍ អ៊ីងវ៉េន យល់ថាតៃវ៉ាន់បានបាត់បង់ឥស្សរជនដែលគ្មាននរណាអាចមកជំនួសបាន។ លោកស្លាប់លឿនជ្រុលទាំងមិនបានឃើញតៃវ៉ាន់បានទទួលសេរីភាពពីចិន។ នេះបើតាមប្រតិកម្មខ្លះរបស់ពលរដ្ឋ។ ប៉ុន្តែមរណភាពរបស់មេដឹកនាំផ្តាច់ខ្លួន មិនមែនជាដំណឹងអាក្រក់សម្រាប់មនុស្សមួយចំនួននៅចិនដីគោកឡើយ នេះបើតាមសារព័ត៌មានផ្លូវការចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ