អូស្ត្រាលីបង្ហាញច្បាប់បង្ខំឱ្យ Goole និងហ្វេសប៊ុក បង់ប្រាក់ឱ្យអ្នកកាសែត
អូស្ត្រាលីវិញ បានបង្ហាញពង្រាងច្បាប់មួយ នៅថ្ងៃសុក្រទី ៣១កក្កដា ២០២០ បង្ខំឱ្យក្រុមហ៊ុន Google និង Facebook ផ្តល់ថវិកាដល់ក្រុមបណ្តាញសារព័ត៌មានអូស្ត្រាលីណាដែល ក្រុមហ៊ុនអ៊ីនធ័រនែតទាំងពីរ បានខ្លឹមសារអត្ថបទរបស់ពួកគេទៅចុះផ្សាយ។ ក្រុមហ៊ុនយក្សទាំងពីរប្រឆាំងយ៉ាងខ្លាំងនឹងគំនិតផ្តួចផ្តើមរបស់រដ្ឋាភិបាលអូស្ត្រាលីនេះ។
ចុះផ្សាយនៅថ្ងៃ៖
ស្តាប់ - ០២:៣៧
អូស្ត្រាលីបានចាប់ផ្តើមចរចាបង្កើត “ក្រមច្បាប់បង្ខំឱ្យក្រុមហ៊ុនអ៊ីនធ័រនែតបង់ប្រាក់ដល់បណ្តាញសារព័ត៌មាន” ដើម្បីស្ថាបនាទំនាក់ទំនងល្អរវាងប្រព័ន្ធឃោសនាព័ត៌មានកំពុងជួបការលំបាកហិរញ្ញវត្ថុនិងក្រុមហ៊ុនអ៊ីនធ័រនែត តាំងពី១៨ខែមកហើយ តែពុំអាចជម្រុះភាពមិនចុះសម្រុងនឹងគ្នាបានទេ។ ក្រៅអំពីបង្ខំឱ្យក្រុមហ៊ុនអ៊ីនធ័រនែត បង់ប្រាក់ដល់សារព័ត៌មាន ជាថ្នូរនឹងការផ្សព្វផ្សាយខ្លឹមសាររបស់កាសែត គម្រោងច្បាប់ក៏មានចែងអំពីបញ្ហាយកទិន្នន័យរបស់អ្នកប្រើប្រាស់ តម្លាភាពនៃកម្មវិធី និងពេលស្វែងរក។ បើតាមរដ្ឋមន្ត្រីក្រសួងហិរញ្ញវត្ថុអូស្ត្រាលីលោក Josh Frydenberg គ្រប់ក្រុមហ៊ុនអ៊ីនធ័រនែតដែលផ្សាយខ្លឹមសារចេញពីសារព័ត៌មានអូស្ត្រាលីត្រូវគោរពច្បាប់នេះទាំងអស់ ប៉ុន្តែក្នុងដំណាក់កាលដំបូង គម្រោងច្បាប់ដាក់បង្ខំខ្លាំងតែលើក្រុមហ៊ុនពីរ គឺ Google និង Facebook ដែលមានបានជាងគេផង និងមានឥទ្ធិពលខ្លាំងជាងគេទៀតនៅលើពិភពលោក។
គ្រាន់តែរដ្ឋាភិបាលអូស្ត្រាលីបង្ហើបគម្រោងច្បាប់ភ្លាម អគ្គនាយកក្រុមហ៊ុន Google និង Facebook នៅអូស្ត្រាលីនិងនូវែលហ្សេឡង់ បានសម្តែងការខកចិត្ត និងចាត់ទុកវិធានការរបស់រដ្ឋាភិបាលអូស្ត្រាលីថាជារារាំងសេដ្ឋកិច្ចឌីជីថល និងប៉ះពាល់យ៉ាងខ្លាំងដល់សេវាកម្មប្រើប្រាស់របស់អូស្ត្រាលី។ Google និង Facebook ប្រឆាំងជារហូតមកនឹងវិធានការចែករំលែកចំណូលពាណិជ្ជកម្មដល់បណ្តាញសារព័ត៌មាន ដោយព្រមានថាប្រសិនបើក្រុមហ៊ុនពិតជាត្រូវបង់ថ្លៃទៅឱ្យអ្នកកាសែតមែន នោះក្រុមហ៊ុនអាចនឹងធ្វើពហិការមិនផ្សាយខ្លឹមសាររបស់បណ្តាញអូស្ត្រាលីទេ។
ប៉ុន្តែពង្រាងច្បាប់ក៏មានចែងហាមឃាត់មិនឱ្យក្រុមហ៊ុនអ៊ីនធ័រនែតរើងអើងសារព័ត៌មាន។ ក្រុមហ៊ុនអ៊ីនធ័រនែតមាន៤៥ថ្ងៃសម្រាប់ចរចាបង់ប្រាក់ឱ្យអ្នកកាសែត បើពុំនោះទេក្រុមហ៊ុននឹងពិន័យជាប្រាក់ចំនួន ១០លានដុល្លារអូស្ត្រាលី ឬ១០%នៃប្រាក់ចំណូលរកបាននៅក្នុងប្រទេស។
សម្រាប់រដ្ឋាភិបាលអូស្ត្រាលី មានរដ្ឋាភិបាល និងភ្នាក់ងារមានសមត្ថកិច្ចជាច្រើន កំពុងចាប់អារម្មណ៍ខ្លាំងលើគំនិតផ្តួចផ្តើមនេះ ដែលនឹងក្លាយជាគោលការណ៍គ្រឹះរបស់ពិភពលោក ព្រោះតាំងពីសម័យអ៊ីនធ័រនែតចូលមក បណ្តាញសារព័ត៌មានបែបចាស់គំរិល រងវិបត្តិសេដ្ឋកិច្ច ចំណូលពាណិជ្ជកម្មរត់ទៅខាងហ្វេសប៊ុកនិង Google ក្រុមហ៊ុនអ៊ីនធ័រនែតផ្សេងៗទៀត។
កម្មវត្ថុនៃគម្រោងច្បាប់មិនមែន ដើម្បីការពារសារព័ត៌មានអូស្ត្រាលីក្នុងការប្រឈមនឹងគូប្រកួតប្រជែងទេ តែជាបង្កើតបរិយាកាស ផ្តល់សំណាងនិងឱកាសស្មើៗគ្នាដល់គ្រប់ប្រព័ន្ធឃោសនា។ នេះបើតាមរដ្ឋមន្ត្រីក្រសួងហិរញ្ញវត្ថុអូស្ត្រាលីដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ