អូស្ត្រាលី ដាក់ចេញបំរាមគោចរនៅក្រុងម៊ែលបនដើម្បីទប់ស្កាត់ការរីករាលដាលកូវីដ
ប្រឈមនឹងការរីករាលដាលកាន់តែខ្លាំងនៃជំងឺកូវីដ១៩ ប្រទេសអូស្ត្រាលីនៅថ្ងៃអាទិត្យ ទី២ សីហានេះ បានប្រកាសដាក់ចេញនូវវិធានការជាច្រើននៅទីក្រុងមែលប៊ន។ ក្នុងចំណោមវិធានការទាំងនោះរួមមានជាអាទិ៍ ការដាក់បម្រាមគោចរពេលយប់ និងការហាមឃាត់ពិធីរៀបអាពាហ៍ពិពាហ៍ជាលើកដំបូងក្នុងអំឡុងពេលមានវិបត្តិកូវីដ។
ចុះផ្សាយនៅថ្ងៃ៖
ស្តាប់ - ០២:១៩
ទោះបីជាបានចាត់វិធានការបិទក្រុងម៊ែលបនតាំងពីដើមខែកក្កដាយ៉ាងណាក៏ដោយ ក៏ម៊ែលបន ដែលជាទីក្រុងធំទី២ របស់អូស្ត្រាលី នៅតែមានករណីឆ្លងកូវីដថ្មីច្រើនគួរឲ្យបារម្ភដដែល។ ដោយហេតុនេះហើយទើបអាជ្ញាធរអូស្ត្រាលី បានសម្រេចដាក់បម្រាមគោចរពេលយប់ក្នុងទីក្រុងម៊ែលបនចាប់ពីម៉ោង ៨ យប់ដល់ម៉ោង ៥ ព្រឹក រយៈពេល ៦ សប្តាហ៍។
ក្នុងពេលប្រកាសពី “ស្ថានភាពគ្រោះថ្នាក់” នៅម៊ែលបនដែលជាទីក្រុងស្ថិតក្នុងរដ្ឋ Victoria អភិបាលរដ្ឋនេះគឺលោកដានីញ៉ែល អេនឌ្រូ (Daniel Andrews) បានមានប្រសាសន៍ថា វិធានការរឹតត្បិតនៅក្នុងទីក្រុងម៊ែលបននឹងឈានទៅដល់ដំណាក់កាលទី ៤ រហូតដល់ថ្ងៃទី ១៣ ខែកញ្ញាខាងមុខ ដោយសារតែអត្រាចម្លងមេរោគកូវីដ១៩ នៅក្នុងសហគមន៍មានចំនួនខ្ពស់ខ្លាំងពេក។
ស្ថិតនៅក្រោមវិធានការដំណាក់កាលទី៤ ចាប់ពីយប់ថ្ងៃអាទិត្យនេះទៅ អ្នករស់នៅក្នុងទីក្រុងម៊ែលបននឹងត្រូវគេកំណត់ឲ្យធ្វើលំហាត់ប្រាណបានតែមួយម៉ោងប៉ុណ្ណោះក្នុងមួយថ្ងៃ និងមិនឲ្យលើសចម្ងាយប្រាំគីឡូម៉ែត្រពីផ្ទះរបស់ពួកគេឡើយ។ ក្នុងគ្រួសារមួយ មានតែមនុស្សម្នាក់ប៉ុណ្ណោះដែលអាចចេញទៅទិញទំនិញចាំខាច់ក្នុងមួយថ្ងៃៗ។
សិស្សនិស្សិតភាគច្រើននៅទីក្រុងម៊ែលបន នឹងត្រូវវិលត្រឡប់ទៅអនុវត្តការរៀនសូត្រពីចម្ងាយតាមអនឡាញសាជាថ្មីចាប់ពីពាក់កណ្តាលអធ្រាត្រថ្ងៃពុធសប្តាហ៍ខាងមុខ។ ចំណែកឯ សាលាមត្តេយ្យនិងមណ្ឌលថែទាំវិញ នឹងត្រូវបិទទ្វារចាប់ពីថ្ងៃព្រហស្បតិ៍ ទន្ទឹមពេលដែលពិធីមង្គលការក៏នឹងត្រូវបានហាមឃាត់ផងដែរ។
បន្ថែមលើនេះ លោកអភិបាលរដ្ឋ Victoria ដានីញ៉ែល អេនឌ្រូដា មានឲ្យដឹងដែរថា ចំណាត់ការរឹតបន្តឹងផ្សេងទៀត ដែលទាក់ទងនឹងកន្លែងធ្វើការ នឹងត្រូវប្រកាសនៅថ្ងៃចន្ទស្អែក និងបានបង្ហើបទៀតថា អាជីវកម្មដែលមិនចាំបាច់នឹងប្រឈមទៅនឹងការបិទទ្វារ។
គូរគូសបញ្ជាក់ជូនថា គិតត្រឹមថ្ងៃអាទិត្យ ទី២ សីហានេះ ករណីឆ្លងកូវីដសរុបនៅក្នុងប្រទេសអូស្ត្រាលីមានចំនួនជិត ១៨ ០០០ នាក់ និងមានអ្នកស្លាប់ ២០៨ នាក់ក្នុងចំណោមប្រជាជនសរុបទាំងអស់ ២៥ លាននាក់។ នៅទីក្រុងម៊ែលបន ករណីឆ្លងកូវីដថ្មីត្រូវគេរាយការណ៍ថាមានចំនួនរាប់រយករណីជារៀងរាល់ថ្ងៃ ហើយរហូតមកទល់នឹងពេលនេះ ករណីឆ្លងកូវីដនៅទីក្រុងម៊ែលបនមាន ៦៧១ ករណី និងមានស្លាប់ ៧ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ