ហេតុអ្វីមហាសេដ្ឋីប្រេង ដូចជាអេមីរ៉ាតអារ៉ាប់រួម ត្រូវការថាមពលនុយក្លេអ៊ែរ?
ចុះផ្សាយនៅថ្ងៃ៖
ស្តាប់ - ០៤:៣៩
នៅថ្ងៃសៅរ៍ទី១សីហាកន្លងទៅ អេមីរ៉ាតអារ៉ាប់រួមបានប្រកាសដាក់ឲ្យដំណើរការម៉ាស៊ីនប្រតិករទី១ របស់មជ្ឈមណ្ឌលថាមពលនុយក្លេអ៊ែរ ដែលអេមីរ៉ាតអារ៉ាប់រួម បានសម្ពោធកាត់ខ្សែបូ តាំង ពីឆ្នាំ ២០១១។ អេមីរ៉ាតអារ៉ាប់រួមប្រកាសដាក់ឲ្យដំណើរការមជ្ឈមណ្ឌលថាមពលនុយក្លេអ៊ែរ នៅបន្ទាប់ពីបានបាញ់បង្ហោះដោយជោគជ័យ យានអវកាសទៅស្រាវជ្រាវភពព្រះអង្គារ កាលពីថ្ងៃទី២០កក្កដាកន្លងទៅ។ ជាច្រើនឆ្នាំមកនេះ ប្រទេសមហាសេដ្ឋីប្រេងបានវិនិយោគ ទឹកប្រាក់រាប់ពាន់លានដុល្លារ ទៅលើការអភិវឌ្ឍបច្ចេកវិទ្យា ដើម្បីអាចចូលចុះជាមួយក្រុមប្រទេសមហាអំណាច អវកាស និងនុយក្លេអ៊ែរ។
នៅក្នុងរយៈពេលមិនដល់២សប្តាហ៍ អេមីរ៉ាត អារ៉ាប់រួម ប្រទេសមហាសេដ្ឋីប្រទេស ដ៏តូច នៅឈូងសមុទ្រពែរ្ស បានបង្កើតព្រឹត្តិការណ៍ពីរ ដែលទាក់ទាញចំណាប់អារម្មណ៍របស់សហគមន៍អន្តរជាតិ។ នៅថ្ងៃទី២០ កក្កដា អេមីរ៉ាតអារ៉ាប់រួម បានក្លាយជាប្រទេសអារ៉ាប់ដំបូងគេ ដែល បានបាញ់បង្ហោះដោយជោគជ័យ យានអវកាសឲ្យទៅសិក្សាស្រាវជ្រាវ ភពព្រះអង្គារ មិនចាញ់មហាអំណាចចិន និងអាមេរិក។ នៅថ្ងៃសៅរ៍ទី១សីហាកន្លងទៅ អេមីរ៉ាតអារ៉ាប់រួមបានប្រកាសដាក់ឲ្យដំណើរការជាផ្លូវការ មជ្ឈមណ្ឌលថាមពលនុយក្លេអ៊ែរ ដំបូងគេ នៅពិភពអារ៉ាប់។
ទៅតាមគម្រោង មជ្ឈមណ្ឌលថាមពលនុយក្លេអ៊ែរស៊ីវិលរបស់អេមីរ៉ាតអារ៉ាប់រួម ដែលសាងសង់ឡើងដោយសហគ្រាសថាមពលនុយក្លេអ៊ែរអេមីរ៉ាតអារ៉ាប់រួម ជាមួយ ក្រុមហ៊ុនកូរ៉េខាងត្បូង នឹងមានបំពាក់ម៉ាស៊ីនប្រតិករចំនួន ៤ ទៅថ្ងៃអនាគត ដែលនឹងអាចមានសមត្ថភាពផលិតអគ្គិសនី ចំនួន ៥ ៦០០ ម៉េហ្គាវ៉ាត់ សម្រាប់បម្រើសេចក្តីត្រូវការ២៥ភាគរយរបស់ប្រជាជន។
អេមីរ៉ាតអារ៉ាប់រួម ដែលមានប្រជាជនសរុប ជិត ១០លាននាក់ ត្រូវការថាមពលផ្សេង ក្រៅពីប្រេង និងឧស្ម័នដែលខ្លួនមាន សម្រាប់ផលិតអគ្គិសនី ដើម្បីឆ្លើយតបនឹងតម្រូវការដែលចេះតែកើនឡើង ដោយសារតែការប្រើម៉ាស៊ីនត្រជាក់ រាប់លានគ្រឿង សម្រាប់ទប់ទល់នឹងអាកាសធាតុក្តៅខ្លាំងនៅប្រទេសអារ៉ាប់មួយនេះ។
ជាមហាសេដ្ឋីប្រេង អេមីរ៉ាតអារ៉ាប់រួម មានធនធានគ្រប់គ្រាន់ដើម្បីផលិតអគ្គិសនីតាមតម្រូវការប្រើប្រាស់ក្នុងប្រទេស។ ប៉ុន្តែ ចាប់តាំងពីការកកើតរដ្ឋ អេមីរ៉ាតអារ៉ាប់រួម ដែលជាបណ្តុំបញ្ចូលគ្នា នៃរាជបុរីអេមីរ៉ាតចំនួន ៩ចូលគ្នា កាលពីឆ្នាំ ១៩៧១ មកម្ល៉េះ អេមីរ៉ាតអារ៉ាប់រួមបានសន្សំគំនិតបណ្តុះបណ្តាលបច្ចេកវិទ្យា សម្រាប់មហិច្ឆតានុយក្លេអ៊ែរ។ រាជបុត្រស្នងរាជ្យរបស់អាប៊ូដាប៊ី ទទួលបន្ទុកផ្នែកអវកាស និងសន្តិសុខ អះអាងថា រោងចក្រនុយក្លេអ៊ែរនៅ បារ៉ាកាស ដែលស្ថិតនៅប៉ែកពាយ័ព្យ របស់ប្រទេស គឺការបោះជំហានថ្មីរបស់អេមីរ៉ាតអារ៉ាប់រួម ក្នុងការអភិវឌ្ឍថាមពលនុយក្លេអ៊ែរស៊ីវិល។
កាតា ប្រទេសជិតខាង ដែលអេមីរ៉ាតអារ៉ាប់រួម លែងរាប់រក តាំងពីឆ្នាំ ២០១៧ ចាត់ទុកមជ្ឈមណ្ឌលថាមពលនុយក្លេអ៊ែរ នៅបារ៉ាកាស ថា អាចបំពុលបរិស្ថាន និងការគំរាមកំហែងសន្តិភាពក្នុងតំបន់។
នៅក្នុងបរិបទដែលកំពុងកើតមានភាពតានតឹង នៅក្នុងតំបន់ អ្នកតំណាងរបស់អេមីរ៉ាតអារ៉ាប់រួម នៅទីភ្នាក់ងារថាមពលបរិមាណូ អន្តរជាតិក៏បាននិយាយធានាថា កម្មវិធីនុយក្លេអ៊ែររបស់អេមីរ៉ាតអារ៉ាប់រួម មានគោលដៅស៊ីវិល គ្មានបង្កប់ដោយមហិច្ឆតាយោធានោះទេ។ អេមីរ៉ាតអារ៉ាប់រួម នៅបានអះអាងថា ខ្លួនបានគោរព បទដ្ឋាន និងសហការជាប់ជាប្រចាំ ជាមួយទីភ្នាក់ងារថាមពលនុយក្លេអ៊ែរអន្តរជាតិ ដែលអេមីរ៉ាតអារ៉ាប់រួមបានបើកទ្វារទទួលយកក្រុមអ្នកអធិការកិច្ច ឲ្យទៅតាមដាន សកម្មភាពនៅក្នុងមជ្ឈមណ្ឌលថាមពលនុយក្លេអ៊ែរនៅបារ៉ាកាស។
មជ្ឈមណ្ឌលថាមពលនុយក្លេអ៊ែរ របស់អេមីរ៉ាតអារ៉ាប់រួម ធ្វើឡើងសម្រាប់គោលដៅស៊ីវិល ប៉ុន្តែ មិនមែនក្នុងគោលដៅយោធានោះទេ។ ពាក្យនេះ គេធ្លាប់លឺប្រទេសអភិវឌ្ឍកម្មវិធីនុយក្លេអ៊ែរ និយាយជាច្រើនមកហើយ ដូចជាអ៊ីរ៉ង់ជាដើម ដែលត្រូវប្រទេសមហាអំណាចមិនជឿទុកចិត្ត និងចាប់ឲ្យចុះកិច្ចព្រមព្រៀង មិនប្រព្រឹត្តកម្មវិធីនុយក្លេអ៊ែរយោធា ជាថ្នូរនឹងការដកទណ្ឌកម្មសេដ្ឋកិច្ចអន្តរជាតិ។
មជ្ឈមណ្ឌលថាមពលនុយក្លេអ៊ែររបស់អេមីរ៉ាតអារ៉ាប់រួម ស្ថិតនៅជាប់ឆ្នេរ ត្រើយម្ខាងរបស់អ៊ីរ៉ង់ ដែលជាគូប្រជែងភូមិសាស្រ្តនយោបាយរបស់អេមីរ៉ាតអារ៉ាប់រួម និងបណ្តាប្រទេសអារ៉ាប់ផ្សេងទៀត។ អ៊ីរ៉ង់ និងអេមីរ៉ាត់អារ៉ាប់រួម ដែលចូលរួមជាមួយ អារ៉ាប៊ី សាអូឌីត កំពុងប្រជែងដណ្តើមឥទ្ធិពលគ្នា ក្នុងតំបន់ តាមរយៈ ការគាំទ្រ ភាគីជម្លោះប្រដាប់អាវុធ នៅក្នុងសង្រ្គាមយេម៉ែន ឬនៅស៊ីរីជាដើម។ បើសិនអ៊ីរ៉ង់កំពុងមានបង្កើនសមត្ថភាពនុយក្លេអ៊ែរយោធា នៅក្រោយ អាមេរិកដកខ្លួនពីកិច្ចព្រមព្រៀង តើគេអាចជឿបានយ៉ាងម៉េចថា អេមីរ៉ាតអារ៉ាប់រួម ដែលជាគូប្រជែងរបស់អ៊ីរ៉ង់ អាចអត់ធ្មត់ មានតែកម្មវិធីនុយក្លេអ៊ែរស៊ីវិលបានយ៉ាងម៉េច?
សម្រាប់អ្នកជំនាញ អេមីរ៉ាតអារ៉ាប់រួម ដែលមានធនធានហិរញ្ញវត្ថុកប់ពពក បានមកពីការលក់ប្រេង និងឧស្ម័ន ប្រាកដជាមិនចង់អន់ថយ បាក់មុខនោះទេ។ នៅពេលដែល អេមីរ៉ាតអារ៉ាប់រួមប្រទេសអភិរក្សនិយម នៅតែចង់ពង្រីកកិត្យានុភាព និងកាន់តែដើរតួនាទីសំខាន់នៅតំបន់ ដូចជាប្រលូកខ្លួនក្នុងសង្រ្គាមនៅលីប៊ី ស៊ីរី និងយេម៉ែន អេមីរ៉ាតអារ៉ាប់រួមច្បាស់ជាត្រូវគិតគូរផ្តោតសំខាន់ទៅលើបច្ចេកវិទ្យា ទាំងឡាយណាដែលអាចជួយខ្លួនឲ្យក្លាយជាមហាអំណាចនុយក្លេអ៊ែរយោធាមួយនឹងគេដែរ ទៅថ្ងៃអនាគត នោះបើទោះជាអេមីរ៉ាតអារ៉ាប់រួម ដែលមានផ្ទៃដី តែ ៨៣០០០គីឡូម៉ែត្រការ៉េ និងមានប្រជាជនមិនដល់១០លាននាក់ផងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ