អាមេរិកនឹងបញ្ជូនមន្រ្តីថ្នាក់ខ្ពស់បំផុតទៅបំពេញទស្សនកិច្ចនៅតៃវ៉ាន់
អាមេរិកបានប្រកាស កាលពីថ្ងៃអង្គារម្សិលមិញថា រដ្ឋមន្រ្តីក្រសួងសុខាភិបាលអាមេរិកនឹងទៅបំពេញទស្សនកិច្ចនៅតៃវ៉ាន់ នៅក្នុងពេលឆាប់ៗខាងមុខនេះ។ ដំណើរទស្សនកិច្ចថ្នាក់រដ្ឋមន្រ្តីអាមេរិក ទៅកាន់តៃវ៉ាន់នេះ គឺជារឿងមួយដ៏កម្រ ហើយវាកើតឡើងនៅក្នុងបរិបទនៃភាពតានតឹង រវាងអាមេរិក និងចិន ហើយវាអាចបញ្ឆេះកំហឹងចិន ធ្វើឲ្យទំនាក់ទំនង រវាងប្រទេសទាំងពីរកាន់តែតានតឹងខ្លាំងជាងនេះទៅទៀត។
ចុះផ្សាយនៅថ្ងៃ៖
នៅក្នុងសេចក្តីប្រកាសព័ត៌មាន ចេញផ្សាយកាលពីថ្ងៃអង្គារ ក្រសួងសុខាភិបាលអាមេរិកបានបញ្ជាក់ថា ដំណើរទស្សនកិច្ចរបស់លោករដ្ឋមន្រ្តី អាឡិច អាហ្សារ ទៅកាន់តៃវ៉ាន់ នាពេលខាងមុខនេះ គឺជាដំណើរទស្សនកិច្ចថ្នាក់ខ្ពស់បំផុតមិនធ្លាប់មាន ចាប់តាំងពីឆ្នាំ១៩៧៩ ឆ្នាំដែលអាមេរិកបានផ្លាស់ប្តូរទំនាក់ទំនងការទូត ពីការទទួលស្គាល់តៃវ៉ាន់ជារដ្ឋ ទៅភ្ជាប់ទំនាក់ទំនងជាមួយចិនដីគោកវិញ។
ក្រសួងការបរទេសតៃវ៉ាន់ក៏បានបញ្ជាក់ផងដែរ អំពីគម្រោងដំណើរទស្សនកិច្ចនេះ ហើយថា នៅក្នុងអំឡុងទស្សនកិច្ចនេះ ដែលគេនៅមិនទាន់បញ្ជាក់ពីកាលបរិច្ឆេទច្បាស់លាស់នៅឡើយ លោកអាឡិច អាហ្សារ ក្រៅពីជួបជាមួយសមភាគីនៅក្រសួងសុខាភិបាលតៃវ៉ាន់ ព្រមទាំងមន្រ្តីជំនាញខាងសុខាភិបាលមួយចំនួនទៀត ក៏នឹងជួបផងដែរជាមួយលោកស្រីប្រធានាធិបតី ឆៃ អ៊ីងវេន។
ជាផ្លូវការ ដំណើរទស្សនកិច្ចរបស់លោកអាឡិច អាហ្សារ គឺធ្វើឡើង ក្នុងក្របខណ្ឌកិច្ចសហប្រតិបត្តិការក្នុងវិស័យសុខាភិបាល និងដើម្បីជាការបង្ហាញនូវការគាំទ្រចំពោះតៃវ៉ាន់ នៅក្នុងការដោះស្រាយវិបត្តិកូវីដ១៩។ ក៏ប៉ុន្តែ រដ្ឋាភិបាលក្រុងប៉េកាំងប្រហែលជានឹងមិនសំឡឹងឃើញត្រឹមកិច្ចសហប្រតិបត្តិការក្នុងវិស័យសុខាភិបាលប៉ុណ្ណឹងទេ។
តាមការពិតទៅ តាំងពីដើមរៀងមក យើងសង្កេតឃើញថា រាល់ដំណើរទស្សនកិច្ចរបស់មន្រ្តីអាមេរិកទៅតៃវ៉ាន់ ឬគ្រប់សកម្មភាពផ្សេងទៀត ដែលអាចបង្ហាញពីទំនាក់ទំនងជារដ្ឋនិងរដ្ឋ គឺតែងតែធ្វើឲ្យចិនខឹងសម្បារ។
នៅក្នុងពេលបច្ចុប្បន្ននេះ ទំនាក់ទំនង រវាងចិន និងអាមេរិក កំពុងតែស្ថិតក្នុងភាពតានតឹងយ៉ាងខ្លាំងស្រាប់ ហើយតានតឹងស្ទើរតែគ្រប់វិស័យទាំងអស់ រាប់ចាប់តាំងពីវិបត្តិហុងកុង បញ្ហាកូវីដ១៩ សង្គ្រាមពាណិជ្ជកម្ម បច្ចេកវិទ្យា រហូតដល់វិស័យយោធានៅសមុទ្រចិនខាងត្បូង។
ដំណើរទស្សនកិច្ចទៅតៃវ៉ាន់ដោយមន្រ្តីអាមេរិកថ្នាក់ខ្ពស់ដ៏កម្រ នៅក្នុងបរិបទតានតឹងខ្លាំងបែបនេះ ប្រាកដជានឹងធ្វើឲ្យចិនរឹតតែខឹងសម្បារខ្លាំងឡើងថែមទៀត ហើយចិនប្រហែលជានឹងអាចសំឡឹងឃើញសកម្មភាពនេះថាចេតនាមួយរបស់លោកដូណាល់ ត្រាំ ក្នុងការធ្វើឲ្យប៉ះពាល់ដល់នយោបាយ « ចិនមួយ » ដែលជាបញ្ហាដ៏រសើបបំផុតមួយ សម្រាប់រដ្ឋាភិបាលក្រុងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ