អាហ្វហ្កានីស្ថានប្រជុំសម្រេចរឿងអ្នកទោសតាលីបង់ ដើម្បីបើកផ្លូវឆ្ពោះទៅរកដំណោះស្រាយសន្តិភាព
នៅអាហ្វហ្កានីស្ថាន មានការប្រជុំធំយ៉ាងសំខាន់ នៅថ្ងៃសុក្រ ទី៧សីហា ដើម្បីសម្រេចថា គួរដោះលែង ឬមិនដោះលែង អ្នកទោសឧក្រិដ្ឋតាលីបង់ ចំនួនប្រហែល៤០០នាក់។ អ្នកទោសទាំងនេះ គឺជាបុគ្គលមេៗ និងមានបាត់ដៃប្រឡាក់ឈាម ដែលបានចូលរួមវាយប្រហារភេរវកម្ម សម្លាប់មនុស្ស ស៊ីវិលនិងទាហាន អស់ជាច្រើននាក់។ រដ្ឋមន្ត្រីការបរទេសអាមេរិក Mike Pompeo បានលើកឡើងថា ការដោះលែងនេះ ជាកាយវិការលំបាក តែគួរធ្វើដើម្បីបើកផ្លូវឆ្ពោះទៅរកដំណោះស្រាយសន្តិភាព។
ចុះផ្សាយនៅថ្ងៃ៖
នៅរដ្ឋធានីកាប៊ូល ឥស្សរជននិងព្រឹទ្ធាចារ្យ ប្រមាណ ៣ ២០០ នាក់ ត្រូវជួបប្រជុំគ្នាតាមប្រពៃណី ហើយត្រូវដោះស្រាយបញ្ហាលំបាកមួយធំ នោះគឺត្រូវសម្រេចចិត្តថា ត្រូវដោះលែង ឧក្រិដ្ឋជនអ្នកទោសតាលីបង់ឬយ៉ាងណា។ អ្នកទោសទាំងនេះ គឺមនុស្សក្នុងចំណោមបុគ្គលគ្នីគ្នារបស់តាលីបង់ ដែលក្រុមតាលីបង់ទាមទារចង់បានឱ្យដោះលែងជាខ្លាំង។
បើតាមបញ្ជីឈ្មោះទីភ្នាក់ងារសារព័ត៌មានបារាំងAFP ទទួលបាន គឺពួកគេទាំងនេះ ភាគច្រើនជាអ្នកបានចូលរួមក្នុងគម្រោងវាយប្រហារភេរវកម្មធំៗនិងសំខាន់ៗនៅអាហ្វហ្កានីស្ថាន និងនៅបរទេស។ ឧទាហរណ៍ជាក់ស្តែង ត្រួសៗ គឺទង្វើបាញ់ប្រហារលើទាហានបារាំងឆ្នាំ២០១២, ការវាយប្រហារបង្កប់គ្រាប់បែកក្នុងឡាន ក្បែរស្ថានទូតអាល្លឺម៉ង់ នៅកាប៊ូល ឆ្នាំ២០១៧, ការប្រហារសំដៅលើក្រុមសន្តិសុខអង់គ្លេស ឆ្នាំ២០១៨ ដែលបណ្តាលឱ្យស្លាប់ទាហានអាមេរិក ជាច្រើននាក់ផង។
រដ្ឋមន្ត្រីការបរទេសអាមេរិក លោក Mike Pompeo បានអំពាវនាវ នៅថ្ងៃសុក្រថាសូមឱ្យថ្នាក់ដឹកនាំនិងឥស្សរជនអាហ្វហ្កានីស្ថាន មានការយោគយល់ ហើយសម្រេចដោះលែងអ្នកទោសតាលីបង់ទាំងនោះ។ ប្រមុខការទូតអាមេរិក គឺបានយល់ច្បាស់ណាស់ថា ការដោះលែងនេះ ជាសកម្មភាពមួយ ដែលលំបាកខ្លាំង ហើយដែលមនុស្សភាគច្រើនផង មិនសូវចង់ធ្វើទេ។ ចំពោះលោក Mike Pompeo គឺគេគួរធ្វើដើម្បីបើកផ្លូវឆ្ពោះទៅរកការបញ្ចប់ហិង្សា និងបញ្ចប់សង្គ្រាម។
ក្នុងកិច្ចព្រមព្រៀងចរចាស្វែងរកសន្តិភាពនៅអាហ្វហ្កានីស្ថាន កាលពីខែកុម្ភៈ រវាងតាលីបង់និងសហរដ្ឋអាមេរិក គឺក្រុមឧទ្ទាមតាលីបង់ទាមទារដោះលែងគ្នីគ្នារបស់គេប្រមាណ៥ពាន់នាក់ ។ ការចរចានេះ ធ្វើច្រើនលើក លំបាកតឹងតែង ស្មុគស្មាញ ខ្លាំង ពេលខ្លះក៏ត្រូវខកលើកពេលទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ