លោកប្រាយុទ្ធ ចាន់អូចា ថាប្រជាជនថៃទូទៅមិនគាំទ្រ បាតុកម្មទាមទារប្រជាធិបតេយ្យទេ
លោកប្រាយុទ្ធចាន់អូចា ប្រមុខរដ្ឋាភិបាលថៃ បានថ្លែងកាលពីថ្ងៃទី១៣សីហាម្សិលមិញថា ប្រជាជនថៃភាគច្រើនទូទៅ គឺមិនពួកគេចាត់ថា ចលនាបាតុកម្មទាមទារប្រជាធិបតេយ្យ ដែលកំពុងបង្ករភាពអាណាធិបតេយ្យនៅទីក្រុងបាងកកនេះ គឺជារឿងដែលមិនអាចទទួលយកបានទេ។ ការថ្លែងបែបនេះ របស់លោកនាយករដ្ឋមន្ត្រីថៃ គឺបន្ទាប់ពីប៉ុន្មានថ្ងៃចុងក្រោយនេះ មានបាតុកម្មកាន់តែខ្លាំង ដែលទាមទារឲ្យរំលាយរដ្ឋសភា ព្រមទាំងធ្វើកំណែទម្រង់របបរាជានិយមថៃ ថែមទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ចេញពីប្រជុំគណៈរដ្ឋមន្ត្រីនៅថ្ងៃព្រហស្បតិ៍ទី១៣សីហា លោកប្រាយុទ្ធ ចាន់អូចា បាននិយាយទៅកាន់អ្នកកាសែតថា ប្រជាជនថៃទូទៅ មិនជឿទុកចិត្ត និងមិនគាំទ្រ ចំពោះបាតុកម្មទាមទារប្រជាធិបតេយ្យ ដែលកើតមានក្នុងពេលកន្លងមកនេះទេ។ លោកបន្តថា រដ្ឋាភិបាលសង្ឃឹមថា ពួកអ្នកធ្វើបាតុកម្មទាំងនោះ នឹងគ្មានបំណងបង្កភាពចលាចលក្នុងសង្គម ព្រោះថាបញ្ហានេះ គឺជារឿងគ្រោះថ្នាក់ ហើយប្រជាជនថៃជាទូទៅមិនអាចទទួលយកបានទេ។
សូមបញ្ជាក់ថា ប៉ុន្មានខែមកនេះ បើទោះបីជាមានវិធានការរិតត្បិត ដើម្បីបង្កាការឆ្លងរាលដាល ជំងឺកូវីដ១៩ក្តី តែនៅទីក្រុងបាងកក គេសង្កេតឃើញថាមានការជួបជូបជុំ បាតុកម្ម ដើម្បីទាមទារលទ្ធិប្រជាធិបតេយ្យ សឹងតែមិនលោះថ្ងៃ។ បាតុកម្ម ដែលជាទូទៅ មានការចូលរួម ពីក្រុមយុវជនសិស្សនិស្សិតជាច្រើនពាន់នាក់។
ជាក់ស្តែងកាលពីថ្ងៃចន្ទ ទី១០សីហា មនុស្សប្រមាណ៤០០០នាក់ ភាគច្រើនជាយុវជន សិស្សនិស្សិតបានជួបជុំគ្នានៅទីលានCampus នៃសកលវិទ្យាទីក្រុងបាងកក។ ក្រុមបាតុករ បានទាមទារ១០ចំណុចធំៗ ដែលក្នុងនោះមានជាអាថិ គឺ ទាមទារឲ្យរំលាយរដ្ឋសភា និងកែប្រែរដ្ឋធម្មនុញ្ញ ដើម្បីរៀបចំការបែងចែកអំណាច ធ្វើយ៉ាងណាកុំឲ្យក្រុមយោធា អាចក្តោបក្តាប់អំណាចតែម្នាក់ឯង។ បាតុករក៏ទាមទារផងដែរ ឲ្យធ្វើកំណែទម្រង់របបរាជានិយមថៃ លុបចោលមាត្រា១១២ នៃរដ្ឋធម្មនុញ្ញ ដែលចែងអំពីទោសប្រមាថព្រះចេស្តាព្រះមហាក្សត្រ ហើយនឹងត្រូវជជែកឡើងវិញ អំពីការគ្រប់គ្រងទ្រព្យសម្បតិ្តរបស់ព្រះមហាក្សត្រថៃ។ ក្រោយការទាមទារចំណុចទាំងនេះ សាស្ត្រាចារ្យសកលវិទ្យាល័យ ប្រមាណ១៤០នាក់ ទូទាំងប្រទេសថៃ បានរួមគ្នាធ្វើញតិ គាំទ្រការទាមទាររបស់បាតុករប្រជាធិបតេយ្យ។
ដោយឡែក នៅថ្ងៃព្រហស្បតិ៍ទី១៣សីហា នៅខាងមុខសកលវិទ្យាល័យថាម៉ាសាត ទីក្រុងបាងកក មានមនុស្សជាច្រើនរយនាក់ បានមកជួបជុំគ្នាធ្វើបាតុកម្មគាំទ្ររបបរាជានិយមថៃ និងបានទាមទារឲ្យរដ្ឋាភិបាល ត្រូវតែផ្តន្ទាទោសពួកបាតុករ ដែលហ៊ានប្រមាថមើលងាយស្ថាប័នព្រះមហាក្សត្រ។
គួររំលឹកថា ថៃគឺជាប្រទេសមានរបបរាជានិយម អាស្រ័យរដ្ឋធម្មនុញ្ញ តែនរណាក៏ដឹងដែរ ថាការពិតជាក់ស្តែង ស្ថាប័នព្រះមហាក្សត្រថៃ មានអំណាចនិងឥទ្ធិពលយ៉ាងខ្លាំង។ ស្ថាប័នព្រះមហាក្សត្រ មានក្រុមកងទ័ពថៃ ដែលតាមការពារ និងបានរៀបចំរដ្ឋប្រហារជាច្រើនលើកច្រើនសារ ដើម្បីទំលាក់រដ្ឋាភិបាលប្រជាធិបតេយ្យណា ដែលងាកឆ្ងាយចេញពីព្រះមហាក្សត្រ។ មាត្រាច្បាប់ប្រមាថព្រះចេស្តាព្រះមហាក្សត្រ ថ្វីបើមិនសូវជាត្រូវបាន គេយកមកអនុវត្តក្តីនាពេលបច្ចុប្បន្ននេះ តែរដ្ឋាភិបាលលោកប្រាយុទ្ធ ចាន់អូចា បានប្រើច្បាប់ថ្មី ដើម្បីតាមដាន រារាំងរាល់ការរិះគន់នៅតាមបណ្តាញសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ