ថៃ៖ ផារីត ជីវ៉ារ៉ាក់ មេចលនាយុវជនប្រជាធិបតេយ្យម្នាក់ទៀត ត្រូវនគរបាលចាប់ខ្លួន
នរគបាលក្រុងបាងកក បានបញ្ជាក់ឲ្យដឹងថា លោក ផារីត ជីវ៉ារ៉ាក់ មេចលនាយុវជនប្រជាធិបតេយ្យ ត្រូវបាននគរបាលចាប់ឃាត់ខ្លួន ទៅតាមដីកាបង្គាប់របស់តុលាការ នៅថ្ងៃទី១៤សីហា នៅទីក្រុងបាងកក។ នេះគឺជាការចាប់ខ្លួន មនុស្សទី៣ហើយ ក្នុងចំណោមអ្នកលេចធ្លោខ្លាំង នៅក្នុងចលនាបាតុកម្មទាមទារប្រជាធិបតេយ្យនៅក្នុងប្រទេសថៃ នៅរវាងប្រមាណ៧ថ្ងៃចុងក្រោយនេះ។ ចលនាបាតុកម្ម ដែលកាន់តែរីកធំទៅៗ ប៉ុន្មានថ្ងៃចុងក្រោយនេះ ដែលបានទាមទារឲ្យរំលាយរដ្ឋសភា កែប្រែរដ្ឋធម្មនុញ្ញ និងធ្វើកំណែទម្រង់ក្នុងស្ថាប័នព្រះមហាក្សត្រថៃ។
ចុះផ្សាយនៅថ្ងៃ៖
ស្តាប់ - ០២:២៥
លោក ស៊ុមប្រាសុង យិនតុម ស្នងការរងនគរបាលក្រុងបាងកក បានបញ្ជាក់ប្រាប់អ្នកកាសែតបារាំង AFP ថា លោក ផារីត ជីវ៉ារ៉ាក់ ពិតជាត្រូវបានចាប់ខ្លួនមែន ក្រោមបទចោទប្រកាន់ ទាក់ទិននឹងសកម្មភាពបាតុកម្មអាណាធិបតេយ្យ កាលពីថ្ងៃទី១៨កក្កដា កន្លងទៅ។ នៅក្នុងវីដេអូមួយ ផ្សាយផ្ទាល់តាមបណ្តាញសង្គមFacebook គេឃើញនគរបាល បានអានសាលដីកាចាប់ខ្លួន ចំពោះមុខលោក ផារីត ជីវ៉ារ៉ាក់ មុននឹងចាប់ក្រៀកបញ្ជូនចូលទៅក្នុងរថយន្តនគរបាល។
សូមបញ្ជាក់ថា លោកផារីត ជីវ៉ារ៉ាក់ គឺជាប្រធានដឹកនាំម្នាក់ នៅក្នុងសហជីពនិស្សិតទីក្រុងបាងកក។ លោកបានក្លាយជាមនុស្សលេចធ្លោខ្លាំង ប៉ុន្មានខែមកនេះ តាមរយៈការជួបជុំធ្វើបាតុកម្ម ដែលមានសិស្សនិស្សិត យុវជនថៃ ចូលរួមជាច្រើនពាន់នាក់។
ក្រោយដំណឹងនៃការចាប់ខ្លួននេះ មានយុវជនជាច្រើននាក់ មាននាំគ្នាទៅជួបជុំនៅខាងមុខស្នងការដ្ឋាននគរបាលក្រុងបាងកក ជាទីដែល លោកផារីត ជីវ៉ារ៉ាក់ ត្រូវគេដាក់ឃុំ។ ដោយឡែក នៅឯទីលានក្នុងសកលវិទ្យាល័យជូឡាឡុងកន សិស្សនិស្សិតជាច្រើនរយនាក់ ក៏បានជួបជុំគ្នាដែរ ដើម្បីទាមទារឲ្យមានការដោះលែងសកម្មជនប្រជាធិបតេយ្យទាំងអស់។
សូមរំលឹកថា កាលពីថ្ងៃទី៧សីហា នគរបាលក្រុងបាងកក បានចុះចាប់ខ្លួនសកម្មជនចលនាប្រជាធិបតេយ្យចំនួន២នាក់រួចទៅហើយ ម្នាក់ជាមេធាវី ម្នាក់ទៀតជាប្រធានដឹកនាំម្នាក់ នៅក្នុងសហជីពនិស្សិត។ ២៤ម៉ោងក្រោយមក អ្នកទាំង២ត្រូវបានគេដោះលែងមកវិញ ជាថ្នូរនឹងការដំកល់ប្រាក់ធានាឲ្យនៅក្រៅឃុំ ដើម្បីរងចាំថ្ងៃសវនាកា។
សម្ព័ន្ធ “យុវជនសេរី” ដែលជាក្រុមយុវជនសកម្មជាងគេ ក្នុងការបំផុសបំផុលបាតុកម្ម ប៉ុន្មានសប្តាហ៍មកនេះ បានចេញលិខិតប្រកាសមួយ ដោយបានទាមទារឲ្យអាជ្ញាធររដ្ឋាភិបាល ត្រូវតែបញ្ឈប់ជាបន្ទាន់ នូវសកម្មភាពសំឡុត គំរាមកំហែង ទៅលើសិទ្ធិសេរីភាពនយោបាយ និងការបញ្ចេញមតិ។ ចលនានេះ បានអំពាវនាវ ឲ្យប្រជាជនថៃគ្រប់មជ្ឈដ្ឋាន ចូលរួមធ្វើបាតុកម្មធំមួយ នៅថ្ងៃអាទិត្យទី១៦សីហា។
គួរកត់សំគាល់ថា ចលនាបាតុកម្មនៅទីក្រុងបាងកក បានឡើងសន្ទុះជាខ្លាំង។ ថ្ងៃទី១០សីហា មានយុវជន និស្សិតចូលរួមដល់ទៅ៤០០០នាក់។ ចលនានេះ ទាមទារឲ្យរំលាយរដ្ឋសភា បោះឆ្នោតជាថ្មី ធ្វើកំណែទម្រង់រដ្ឋធម្មនុញ្ញដើម្បីពង្រឹងលទ្ធិប្រជាធិបតេយ្យនិងការបែងចែកអំណាច និងជាពិសេសនោះ គឺយុវជនទាមទារឲ្យធ្វើកំណែទម្រង់ក្នុងស្ថាប័នព្រះមហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ