មន្ត្រីរដ្ឋាភិបាលជប៉ុនទៅគោរពវិញ្ញាណក្ខន្ធនៅវិហារយ៉ាស៊ូគូនីជាលើកដំបូងចាប់តាំងពីឆ្នាំ២០១៦
ក្នុងឱកាសខួប ៧៥ ឆ្នាំនៃការចាញ់សង្រ្គាមលោកលើកទី២ នៅថ្ងៃសៅរ៍នេះ មន្រ្តីរដ្ឋាភិបាលជប៉ុន ៤ រូបបានទៅគោរពវិញ្ញាណក្ខន្ធនៅវិហារយ៉ាស៊ូគូនី ជាលើកដំបូងរាប់ចាប់តាំងពីឆ្នាំ ២០១៦មក។ សម្រាប់ជប៉ុន វិហារយ៉ាស៊ូគូនីគឺជាទីសក្ការៈបូជាមួយ តែសម្រាប់ប្រទេសជិតខាងជប៉ុនដូចជាចិននិងកូរ៉េខាងត្បូងជាដើម យ៉ាស៊ូគូនី គឺជានិមិត្តរូបនៃមហិច្ឆតាយោធានិយមរបស់ទីក្រុងតូក្យូកាលពីអតីតកាល។
ចុះផ្សាយនៅថ្ងៃ៖
ស្តាប់ - ០២:២៣
រដ្ឋមន្រ្តីក្រសួងអប់រំលោក កូអ៊ីឈី ហាជីដា (Koichi Hagiuda) ជាមន្រ្តីម្នាក់ក្នុងចំណោមមន្ត្រីរដ្ឋាភិបាលជប៉ុនទាំង ៤ រូប ដែលបានធ្វើដំណើរទៅគោរពវិញ្ញាណក្ខន្ធនៅវិហារយ៉ាស៊ូគូនី។ លោកហាជីដា បានប្រាប់ក្រុមអ្នកយកព័ត៌មានថា លោកធ្វើដូច្នោះគឺដើម្បីឧទ្ទិសដល់វិញ្ញាណក្ខន្ធទាហានជប៉ុនដែលបានពលីជីវិតដើម្បីជាតិក្នុងសម័យសង្គ្រាម។
ចំណែកឥស្សរជននយោបាយជាន់ខ្ពស់ជប៉ុនបីនាក់ទៀត គឺរដ្ឋមន្រ្តីបរិស្ថានលោក ស្ហ៊ីនជីរ៉ូ កូអ៊ីហ្ស៊ូមី (Shinjiro Koizumi) រដ្ឋមន្រ្តីក្រសួងមហាផ្ទៃលោក សានែ តាកាអ៊ីឈី (Sanae Takaichi) និងលោក សីអ៊ីឈី អេតូ (Seiichi Eto) ជារដ្ឋមន្រ្តីទទួលបន្ទុកកិច្ចការព្រំដែន។
ដោយឡែក នាយករដ្ឋមន្ត្រីជាតិនិយមជប៉ុន លោក ស្ហ៊ីនហ្សូ អាបេ មិនបានធ្វើដំណើរទៅកាន់វិហារយ៉ាស៊ូគូនីដោយផ្ទាល់ឡើយ ក្នុងឱកាសប្រារព្ធខួប ៧៥ឆ្នាំ នៃការចាញ់សង្គ្រាមលោកលើកទី២ នាថ្ងៃសៅរ៍ទី១៥ សីហានេះ។
យោងតាមប្រព័ន្ធផ្សព្វផ្សាយក្នុងស្រុកជប៉ុន ដើម្បីជាការគោរពដល់វិញ្ញាណក្ខន្ធទាហានជប៉ុន លោកអាបេ បានបញ្ជូនក្រដាសប្រាក់សម្រាប់បុណ្យទានទៅកាន់វិហារយ៉ាស៊ូគូនី។ លោកអាបេ បានធ្វើដំណើរទៅវិហារយ៉ាស៊ូគូនីចុងក្រោយបង្អស់នៅខែធ្នូ ឆ្នាំ ២០១៣ ដើម្បីជាការកត់សម្គាល់នៃការឡើងកាន់អំណាចរបស់លោកក្នុងឆ្នាំទី១។
កាលណោះ ទាំងចិននិងទាំងកូរ៉េខាងត្បូង សុទ្ធតែបាននាំគ្នាបញ្ចេញប្រតិកម្មដោយកំហឹងតបនឹងដំណើរទៅកាន់វិហារយ៉ាស៊ូគូនីរបស់លោកអាបេ ហើយចាប់ពីពេលនោះមកនាយករដ្ឋមន្តី្រជប៉ុនរូបនេះ មិនដែលទៅវិហារយ៉ាស៊ូគូនីទៀតឡើយ។
គួររំឭកជូនថា ស្ថិតនៅកណ្តាលទីក្រុងតូក្យូ វិហារយ៉ាស៊ូគូនី គឺជាទីតាំងបញ្ចុះសពរបស់អតីតទាហានជប៉ុនប្រមាណ ២លាននាក់កន្លះ ដែលបានបាត់បង់ជីវិតក្នុងសម័យសង្គ្រាមដែលក្នុងនោះក៏មានដែរសាកសពអតីតមេទ័ពជប៉ុន ១៤ រូប ដែលត្រូវបានកាត់ឲ្យជាប់ទោសពីបទឧក្រិដ្ឋកម្មសង្គ្រាមក្នុងសង្គ្រាមលោកលើកទី២។
ហេតុដូចនេះហើយទើបចិន កូរ៉េខាងត្បូង និងកូរ៉េខាងជើង ដែលធ្លាប់ត្រូវបានជប៉ុនឈ្លានពានក្នុងសម័យសង្គ្រាម តែងតែផ្ទុះកំហឹងខ្លាំងនៅពេលដែលមន្ត្រីរដ្ឋាភិបាលជប៉ុនទៅគោរពវិញ្ញាណក្ខន្ធនៅវិហារយ៉ាស៊ូគូនី។
គួរជ្រាបទៀតថា ការធ្វើដំណើរទៅកាន់វិហារយ៉ាស៊ូគូនីរបស់រដ្ឋមន្ត្រីជប៉ុនចំនួន៤រូប នៅឆ្នាំនេះ ធ្វើឡើងជួបចំពេលមានភាពតានតឹងរវាងជប៉ុន និងកូរ៉េខាងត្បូងដែលជាប្រទេសមួយធ្លាប់រងគ្រោះពីអំពើឃោរឃៅផ្នែកយោធាក្នុងសម័យសង្គ្រាមពីសំណាក់ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ