ជនភៀសខ្លួនរ៉ូហ៊ីងយ៉ា បារម្ភខ្លាចឆ្លងកូវីដ១៩ ចូលក្នុងជំរំនៅក្រុង ស៊ីថ្វេ រដ្ឋរ៉ាឃីន
ជនភៀសខ្លួនរ៉ូហ៊ីងយ៉ា នៅក្នុងរដ្ឋរ៉ាឃីន ភាគខាងលិចភូមា កំពុងព្រួយបារម្ភ ខ្លាចក្រែងជម្ងឺកូវីដ១៩ ឆ្លងចូលរាលដាល ដល់ក្នុងជំរំដែលមានមនុស្សរស់នៅកកកុញ។ ការព្រួយបារម្ភនេះ គឺបន្ទាប់ពីមានដំណឹងថា កាលពីសប្តាហ៍កន្លងទៅ គេបានរកឃើញមានអ្នកឆ្លងកូវីដ១៩ ចំនួន៤៨នាក់ នៅក្នុងទីក្រុងស៊ីថ្វេ ដែលជាទីប្រជុំជនធំរបស់រដ្ឋរ៉ាឃីន។
ចុះផ្សាយនៅថ្ងៃ៖
ស្តាប់ - ០២:៣៦
យោងតាមអង្គការ Amnesty International មានជនភៀសខ្លួនរ៉ូហ៊ីងយ៉ា ចំនួនយ៉ាងហោច ១៣ម៉ឺននាក់ ដែលរស់នៅតាមជំរំបណ្តោះអាសន្ន ជាច្រើនកន្លែង ក្បែរក្រុងស៊ីថ្វេ ទីក្រុងធំរបស់រដ្ឋរ៉ាឃីន។ លក្ខខណ្ឌរស់នៅរបស់ប្រជាជនរ៉ូហ៊ីងយ៉ា ទាំងនោះ គឺស្ថិតនៅក្នុងភាពលំបាក តោកយ៉ាក វេទនាជាទីបំផុត។ ជម្ងឺកូវីដ១៩ កំពុងតែគម្រាម ជំរំជនភៀសខ្លួនទាំងនោះ គ្រប់ពេលវេលា។
ក្នុងសប្តាហ៍កន្លងទៅ អាជ្ញាធរសុខាភិបាលភូមា បានរកឃើញអ្នកឆ្លងកូវីដ១៩ ចំនួន៤៨នាក់ នៅក្នុងទីក្រុងស៊ីថ្វេ។ អាជ្ញាធរភូមា បានចុះទៅត្រួតពិនិត្យ នៅក្នុងជំរំមួយកន្លែង ឈ្មោះThae Chaung កាលពីសប្តាហ៍កន្លងទៅ ដើម្បីប្រាប់ពីវិធីបង្កា ដោយការរក្សាចំងាយពីគ្នា និងបានចែកម៉ាស និងទឹកអាល់កុលលាងសំអាតដៃ ទៅឲ្យប្រជាជនរ៉ូហ៊ីងយ៉ា។ តែយ៉ាងណា វាជារឿងដែលពិបាកធ្វើណាស់ ព្រោះក្នុងជំរំខ្លះ មនុស្ស១០គ្រួសារ រស់នៅជុំគ្នា ក្នុងផ្ទះខ្ទមតូចមួយក៏មាន។
ចាប់តាំងពីថ្ងៃសុក្រកន្លងទៅ អាជ្ញាធររដ្ឋរ៉ាឃីន បានចេញបញ្ជា ហាមឃាត់ការចេញដើរហើរពេលយប់ ហើយមធ្យោបាយធ្វើដំណើរសាធារណៈទាំងអស់ត្រូវផ្អាក។ ថ្លែងប្រាប់អ្នកយកព័ត៌មានបារាំង AFP បុរសជនជាតិរ៉ូហ៊ីងយ៉ាម្នាក់ បានលើកឡើងថា ជនភៀសខ្លួនរ៉ូហ៊ីងយ៉ា បានសំងំនៅក្នុងខ្ទមរៀងៗខ្លួន មិនហ៊ានចេញទៅណាទេ ដោយខ្លាចទទួលការពិន័យ ពីអាជ្ញាធរភូមា។ លោកថា បើសិនជាគេតម្រូវឲ្យសំងំនៅក្នុងជំរំយូរតទៅទៀត នោះមានន័យថា ប្រជាជនរ៉ូហ៊ីងយ៉ា ពិតជាត្រូវការជំនួយស្បៀងអាហារ ជាចាំាបាច់បំផុត ពុំនោះទេនឹងដាច់ពោះស្លាប់មិនខាន។
លោក Hla Maung Oo ប្រធានជំរំ Mrauk-U ដែលមានអ្នកឆ្លងកូវីដ១៩ ចំនួន៣នាក់នោះ បានថ្អូញថ្អែរថា ជនភៀសខ្លួនទាំងអស់ មិនដឹងជាត្រូវទៅរស់នៅឯណាទេ ព្រោះអាជ្ញាធរភូមា បានហាមឃាត់ពួកគេ មិនឲ្យធ្វើដំណើរត្រលប់ទៅភូមិស្រុកវិញ។ លោកកំពុងបារម្ភថា ក្នុងករណីមានអ្នកឆ្លងកូវីដ១៩ក្នុងជំរំកាន់តែច្រើន អាជ្ញាធរភូមា អាចនឹសម្រេចបិទទ្វារជំរំ ហើយផ្អាកការចែកជំនួយមនុស្សធម៌ស្បៀងអាហារ។
សូមបញ្ជាក់ថា ក្រៅពីជនជាតិរ៉ូហ៊ីងយ៉ា ប្រមាណ១៣ម៉ឺននាក់ នៅតាមជំរំក្បែរក្រុងស៊ីថ្វេនេះ គឺមានជនរ៉ូហ៊ីងយ៉ា ប្រមាណ៧៥ម៉ឺននាក់ផ្សេងទៀត ដែលកំពុងស្ថិតនៅក្នុងជំរំ ក្នុងតំបន់ Cox-Bazar ក្នុងទឹកដីបង់ក្លាដែស។ រហូតមកទល់ពេលនេះ នៅមិនទាន់មានដំណោះស្រាយជាក់ស្តែងណាមួយ ដើម្បីអនុញ្ញាតឲ្យពួកគេ អាចត្រលប់ទៅភូមិស្រុកវិញនៅឡើយទេ។ អង្គការសហប្រជាជាតិ បានត្រឹមតែចាត់ទុកថា យោធាភូមា បានធ្វើសកម្មភាពបោសសំអាត និងប្រល័យពូជសាសន៍ មកលើប្រជាជនរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ