ថៃ ផ្អាកការទិញនាវាមុជទឹកបាតសមុទ្រពីចិន ចំនួន២គ្រឿង ដោយសារវិបត្តិសេដ្ឋកិច្ចនិងការតវ៉ា
លោកប្រាយុទ្ធ ចានអូចា នាយករដ្ឋមន្ត្រីថៃ និងជារដ្ឋមន្ត្រីការពារជាតិផងនោះ បានបញ្ជាទៅកាន់កងទ័ពជើងទឹកថៃ ឲ្យចរចាជាមួយភាគីចិន ដើម្បីផ្អាកការទិញនាវាមុជទឹកបាតសមុទ្រ ចំនួន២គ្រឿង ដែលថែមានគម្រោងទិញពីចិន។ ការសម្រេចរបស់លោកនាយករដ្ឋមន្ត្រីថៃនេះ គឺបានធ្វើ បន្ទាប់ពីមានការរិះគន់ និងតវ៉ាពីសំណាក់ប្រជាជនថៃ ដែលធ្វើបាតុកម្ម ប៉ុន្មានសប្តាហ៍មកនេះ។ មិនត្រឹមតែប៉ុណ្ណោះ វិបត្តិកូវីដ១៩ បានធ្វើឲ្យសេដ្ឋកិច្ចថៃ ត្រូវធ្លាក់ចុះជាខ្លាំង។
ចុះផ្សាយនៅថ្ងៃ៖
ស្តាប់ - ០២:១៨
លោក អានុឆា ប៊ូរ៉ាប៉ាឆៃស៊ី អ្នកនាំពាក្យរដ្ឋាភិបាលថៃ បានបញ្ជាក់ឲ្យដឹង នៅថ្ងៃទី៣១សីហាថា លោកនាយករដ្ឋមន្ត្រី ប្រាយុទ្ធ ចាន់អូចា បានប្រាប់ទៅកងទ័ពជើងទឹកថៃ ថាត្រូវចរចាជាមួយភាគីចិន ដើម្បីពន្យារពេលទិញនាវាមុជទឹកចិន២គ្រឿង យ៉ាងហោចចំនួន១ឆ្នាំ។ អ្នកនាំពាក្យរូបនេះ បានបន្ថែមថា លោកប្រាយុទ្ធ ចាន់អូចា បានយល់និងដឹង ពីការបារម្ភរបស់ប្រជាជនថៃ ទាក់ទិនទៅនឹងបញ្ហាសេដ្ឋកិច្ច ដែលលំបាកខ្លាំងនាពេលនេះ ដោយសារតែកូវីដ១៩។
គួរបញ្ជាក់ថា ថៃគឺជាប្រទេសដំបូងគេ ដែលបានសម្រេច បញ្ជាទិញនាវាមុជទឹកបាតសមុទ្រ ផលិតដោយចិន ចំនួន៣គ្រឿង កាលពីឆ្នាំ២០១៥។ កិច្ចសន្យាទិញនាវាទី១ បានបិទបញ្ចប់សព្វគ្រប់ហើយ កាលពីឆ្នាំ២០១៧ ដោយភាគីចិន នឹងប្រគល់ឲ្យនៅឆ្នាំ២០២៣។ ចំណែក២គ្រឿងទៀត ដែលមានតម្លៃសរុប ប្រមាណ៧២៤លានដុល្លារនោះ ទើបតែត្រូវបានអនុគណកម្មការសភាថៃ សម្រេចយល់ព្រមឲ្យទិញ កាលពីដើមខែសីហានេះ។
តែយ៉ាងណា ការសម្រេចទិញនាវាមុជទឹកនេះ ត្រូវបានរងនូវការរិះគន់ជាខ្លាំង ពីសំណាក់ប្រជាជនថៃ ក៏ដូចជាអ្នកនយោបាយ និងអ្នកជំនាញវិភាគសង្គម។ មតិមួយចំនួនបានលើកឡើងថា ថាថៃគ្មានអ្វីចាំបាច់ ត្រូវមាននាវាមុជទឹកបាតសមុទ្រទេ ព្រោះដែនសមុទ្រថៃក៏មិនសូវជាជ្រៅ ហើយមួយទៀត ថៃក៏មិនមានវិវាទដែនសមុទ្រចោទឡើង ដូចប្រទេសផ្សេងទៀតក្នុងតំបន់ឡើយ។
មួយវិញទៀត ការសម្រេចកាលពីដើមខែសីហា ឲ្យទិញនាវាមុជទឹកបាទសមុទ្រ២គ្រឿងចុងក្រោយ នេះ គឺវាស្ថិតក្នុងកាលៈទេសៈមួយដែលថៃ កំពុងមានវិបត្តិសេដ្ឋកិច្ចធ្ងន់ធ្ងរ ដោយសារតែវិបត្តិកូវីដ១៩។ នៅត្រីមាសទី២ឆ្នាំ២០២០នេះ សេដ្ឋកិច្ចថៃ បានដើរថយក្រោយដល់ទៅ១២,២%។
ជាងនេះទៀត មហាបាតុកម្មទាមទារលទ្ធិប្រជាធិបតេយ្យ កំពុងតែពុះកញ្ជ្រោលខ្លាំង ជាច្រើនសប្តាហ៍មកហើយ ដោយបាតុករ ភាគច្រើនជាសិស្សនិស្សិតយុវជនថៃ បានទាមទារឲ្យធ្វើកំណែទម្រង់រដ្ឋធម្មនុញ្ញ ស្តារលទ្ធិប្រជាធិបតេយ្យ និងកាត់បន្ថយអំណាចឥទ្ធិពលរបស់ស្ថាប័នព្រះមហាក្សត្រ។ ការបោះបង់ចោលគម្រោងទិញនាវាមុជទឹកចិន ក៏ជាចំណុចទាមទារមួយ របស់បាតុករដែរ។ នៅលើបណ្តាញសង្គម ក្រុមអ្នកតវ៉ារិះគន់ បានចែកចាយឃ្លាថា « ប្រជាជនថៃ មិនត្រូវការនាវាមុជទឹកបាតសមុទ្រទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ