ផ្លាកប្រជាជន ដែលបាតុករថៃបានដាក់ ត្រូវបាននគរបាលថៃ ដកចេញដើម្បីធ្វើជាភស្តុតាងដាក់ពាក្យប្តឹង
កាលពីថ្ងៃអាទិត្យ ទី២០កញ្ញាកន្លងទៅ ក្រុមបាតុករយុវជនថៃ បានរួមគ្នាចាក់ស៊ីម៉ង់ ដាក់តាំង « ផ្លាកប្រជាជន » នៅទីលានសាណាមហ្លួង ក្បែរព្រះបរមរាជវាំងក្រុងបាងកក។ នៅលើផ្លាកនោះ មានចារ្យអក្សរថា ប្រទេសថៃជារបស់ប្រជាជនថៃ មិនមែនជាកម្មសិទ្ធិផ្តាច់មុខ របស់ព្រះមហាក្សត្រទេ។ តែកាលពីថ្ងៃចន្ទទី២១កញ្ញា ផ្លាកនេះ ត្រូវបានសមត្ថកិច្ចនគរបាលថៃ គាស់ចេញវិញ និងបានអះអាងថា យកទៅទុកធ្វើជាភស្តុតាង ដើម្បីប្តឹងចាប់បាតុករដែលធ្វើសកម្មភាពនេះ ដោយគ្មានការអនុញ្ញាត។
ចុះផ្សាយនៅថ្ងៃ៖
ស្តាប់ - ០២:៥២
ស៊ីម៉ង់ត៍ មិនទាន់រឹងស្រួលបួលផង « ផ្លាកប្រជាជន » ដែលយុវជនបាតុករថៃ បានដាក់វានៅលើទីលានសាណាមហ្លួង ត្រូវបានគាស់ចេញវិញហើយ។ លោក ជីរ៉ាផាត់ ភូមិជីត អ្នកនាំពាក្យស្នងការនគរបាលក្រុងបាងកក បានប្រាប់អ្នកយកព័ត៌មានបារាំងថា សមត្ថកិច្ចនគរបាល បានគាស់យកផ្លាកនេះទៅទុក ដើម្បីធ្វើជាភស្តុតាង នៅក្នុងការប្តឹងទៅតុលាការ ព្រោះក្រុមមនុស្សដែលបាន ចាក់ស៊ីម៉ង់ដាក់តាំងផ្លាកនេះ គឺធ្វើដោយគ្មានការអនុញ្ញាត ព្រោះទីតាំងនោះជាទីទាំងប្រវត្តិសាស្ត្រ។
អ្នកនាំពាក្យរូបនេះ បញ្ជាក់ថា អតីតសកម្មជននយោបាយរាជានិយមថៃម្នាក់ ក៏បានដាក់ពាក្យប្តឹងផងដែរ ទៅលើមេចលនាបាតុកម្មចំនួន៣នាក់ ដោយយោងទៅលើច្បាប់ប្រឆាំងនឹងការប្រមាថ ព្រះចេស្តាព្រះមហាក្សត្រ។ ជនជាប់ចោទអាចប្រឈមនឹងទោស ជាប់ពន្ធនាគារ រយៈពេល១៧ឆ្នាំ។
សូមរំលឹកថា កាលពីចុងសប្តាហ៍កន្លងទៅ យុវជនថៃជាច្រើនម៉ឺននាក់ ដោយមានការការចូលរួមគាំទ្រ ពីក្រុមអាវក្រហមថៃផងនោះ បានជួបជុំគ្នាធ្វើបាតុកម្ម ទាមទារលទ្ធិប្រជាធិបតេយ្យ ធ្វើកំណែទំរង់រដ្ឋធម្មនុញ្ញ និងធ្វើកំណែទម្រង់ស្ថាប័នព្រះមហាក្សត្រ។ នៅថ្ងៃអាទិត្យ ក្រុមបាតុករ បានចាក់ស៊ីម៉ង់ត៍ ដាក់តាំងផ្លាកប្រជាជន នៅលើទីលានសាណាមហ្លួង ដែលនៅលើផ្លាកនោះ មានចារអក្សរថា៖ ប្រទេសថៃជារបស់ប្រជាជនថៃ មិនមែនជាកម្មសិទ្ធិផ្តាច់មុខ របស់ព្រះមហាក្សត្រទេ។
គួរកត់សំគាល់ថា ការដែលក្រុមបាតុករ បានដាក់ផ្លាកប្រជាជន ជាមួយនឹងចំណារបែបនេះ គឺជាការពើងទ្រូង ដ៏ក្លាហាន ហ៊ានតតាំងនឹងស្ថាប័នព្រះមហាក្សត្រថៃ ដែលនេះគឺជារឿងដ៏កម្រងបំផុត។ តែយ៉ាណា ការដែលនគរបាលបានចុះមកគាស់ផ្លាកនេះចេញវិញ នៅថ្ងៃបន្ទាប់ គឺជាសញ្ញបង្ហាញថា ស្ថាប័នព្រះមហាក្សត្រ មិនចុះចាញ់ឡើយ។ លោកស្រី Christine Cabasset អ្នកស្រាវជ្រាវនៅវិទ្យាស្ថានសិក្សាអាស៊ីអាគ្នេយ៍ នៅក្រុងបាងកក បានលើកឡើងថា ក្រុមអ្នកមានអំណាច ដែលស្និទនឹងរបបយោធា ព្រមទាំងព្រះបរមរាជវាំង ទំនងប្រហែលជាមិនចុះញ៉ម និងកម្លាំងតវ៉ារបស់ប្រជាជនថៃទេ។
ដោយឡែក លោកផារីត ជីរ៉ារ៉ាក់ មេចលនាយុវជន បានអះអាងថា ទោះសមត្ថកិច្ចដកផ្លាកប្រជាជនចេញវិញ ក៏វាមិនប៉ះពាល់ ដល់កម្លាំងនៃការតវ៉ារបស់យុវជនថៃ ដែលស្រេកឃ្លានចង់បានប្រជាធិបតេយ្យដែរ។ លោកបន្ថែមថា ក្រុមយុវជន នឹងផលិតគំរូផ្លាកនេះឲ្យបានច្រើន ហើយចែកគ្រប់គ្នា យកទៅដាក់នៅគ្រប់ទីកន្លែង ទូទាំងប្រទេសថៃ។ នៅថ្ងៃព្រហស្បតិ៍ទី២៤កញ្ញា នឹងមានបាតុកម្មធំមួយទៀតនៅបាងកក ហើយនៅថ្ងៃទី១៤តុលា នឹងមានមហាបាតុកម្មធំទូទាំងប្រទេសតែម្តង។ ដោយឡែក នៅលើបណ្តាញសង្គម Twitter វិញ សារទាមទារឲ្យរំលាយមាត្រា១១២ ស្តីពីទោសប្រមាថព្រះចេស្តាព្រះមហាក្សត្រ #abolish 112 ត្រូវគេចែកចាយខ្លាំងជាងគេបំផុត នៅថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ