តៃវ៉ាន់សំខាន់ប៉ុណ្ណាទើបចិនក្តោបជាប់មិនលែងទោះត្រូវប្រថុយនឹងសង្រ្គាម?
ចុះផ្សាយនៅថ្ងៃ៖
ស្តាប់ - ០៥:៣២
នៅក្នុងមួយរយៈកាលចុងក្រោយនេះ គេសង្កេតឃើញភាពតានតឹង រវាងចិន និងតៃវ៉ាន់ បានកើនឡើងយ៉ាងខ្លាំងគួរឲ្យកត់សម្គាល់ ដែលជាហេតុធ្វើឲ្យមានការព្រួយបារម្ភខ្លាចមានការរាលដាលទៅជាការប្រឈមមុខដាក់គ្នាខាងយោធា រវាងមហាអំណាចទាំងពីរ គឺចិន និងអាមេរិក។ តើតៃវ៉ាន់មានសារៈសំខាន់ប៉ុណ្ណាសម្រាប់ចិន ? ហេតុអ្វីបានជាចិនចចេសចង់ក្តោបយកតៃវ៉ាន់មិនលែង បើទោះជាត្រូវប្រឈមនឹងសង្គ្រាមជាមួយអាមេរិកបែបនេះ?
ជាទូទៅ យើងឃើញថា ការផ្តាច់ទឹកដីទៅបង្កើតរដ្ឋឯករាជ្យ គឺតែងតែជាបញ្ហារសើបសម្រាប់គ្រប់ប្រទេសទាំងអស់ មិនថាចិន ឬក៏ប្រទេសណាមួយផ្សេងទៀតនោះទេ។ ក៏ប៉ុន្តែ ក្នុងករណីតៃវ៉ាន់ ដែលនៅក្នុងការពិតជាក់ស្តែងជាប្រទេសមួយដាច់ពីចិនអស់រយៈពេលជាង ៧០ឆ្នាំមកហើយនោះ តែចិននៅតែមិនព្រមឲ្យរបូតពីដៃ គឺដោយសារតែសម្រាប់របបដឹកនាំក្រុងប៉េកាំង តៃវ៉ាន់មានសារៈសំខាន់ខ្លាំង សំខាន់ទាំងខាងចំណងប្រវត្តិសាស្រ្ត សំខាន់ទាំងខាងផ្នែកភូមិសាស្រ្តនយោបាយបច្ចុប្បន្ន។
និយាយពីប្រវត្តិសាស្រ្ត តៃវ៉ាន់មិនត្រឹមតែធ្លាប់ជាដែនដីមួយរបស់ចិននោះទេ ក៏ប៉ុន្តែ រឹតតែសំខាន់ជាងនេះទៅទៀត តៃវ៉ាន់គឺជាអ្នកស្នងរបបសាធារណរដ្ឋចិន ដែលធ្លាប់ជាអ្នកកាន់អំណាចនៅចិន ចាប់តាំងពីក្រោយការធ្វើបដិវត្តន៍ផ្តួលរំលំរបបរាជានិយម នៅឆ្នាំ១៩១១ ហើយក្រោយមក បានក្លាយជាគូសត្រូវដ៏ធំមួយរបស់បក្សកុម្មុយនិស្តចិន នៅក្នុងអំឡុងសង្រ្គាមស៊ីវិល ពីឆ្នាំ១៩២៧ ដល់ឆ្នាំ១៩៤៩។
នៅឆ្នាំ១៩៤៩ បក្សកុម្មុយនិស្តចិនបានទទួលជោគជ័យ ឡើងកាន់អំណាចនៅចិន ចំណែករដ្ឋាភិបាលសាធារណរដ្ឋចិនវិញបានរត់គេចខ្លួនទៅបោះទីតាំងនៅកោះតៃវ៉ាន់ ក៏ប៉ុន្តែ នៅតែបន្តប្រកាសតាំងខ្លួនជារដ្ឋាភិបាលស្របច្បាប់របស់ចិនដដែល។
នៅពេលនោះ បក្សកុម្មុយនិស្តចិនបានកាន់កាប់អំណាចក៏ពិតមែន ក៏ប៉ុន្តែ សង្រ្គាមស៊ីវិលនៅតែមិនទាន់បញ្ចប់ ហើយនៅក្នុងឆាកអន្តរជាតិ ត្រូវមានចិនដល់ទៅពីរ គឺសាធារណរដ្ឋប្រជាមានិតចិន នៅចិនដីគោក និងសាធារណរដ្ឋចិន នៅកោះតៃវ៉ាន់ ដោយម្ខាងៗសុទ្ធតែប្រកាសតាំងខ្លួនជារដ្ឋាភិបាលស្របច្បាប់តែមួយគត់របស់ចិនទាំងមូល។
អ្វីដែលធ្វើឲ្យបក្សកុម្មុយនិស្តចិនកាន់តែអាម៉ាស់ទៅទៀត គឺនៅត្រង់ថា បើទោះបីជាបានជោគជ័យកាន់អំណាចគ្រប់គ្រងដែនដីស្ទើរតែទាំងមូលហើយក៏ដោយ ក៏ប៉ុន្តែ សាធារណរដ្ឋចិន នៅតែទទួលបាននូវការទទួលស្គាល់តាមផ្លូវការទូត ដោយបណ្តាប្រទេសភាគច្រើន ហើយពិសេសជាងនេះទៅទៀត អាសនៈចិននៅឯអង្គការសហប្រជាជាតិ រួមទាំងអាសនៈជាសមាជិកអចិន្រ្តៃយ៍នៃក្រុមប្រឹក្សាសន្តិសុខផង ត្រូវស្ថិតនៅក្រោមការកាន់កាប់របស់តៃវ៉ាន់ រហូតទាល់តែដល់ឆ្នាំ១៩៧១ ទើបអាសនៈទាំងនេះ ត្រូវបានគេប្រគល់មកឲ្យសាធារណរដ្ឋប្រជាមានិតចិនវិញ។
ដូច្នេះ គេអាចនិយាយបានថា ជម្លោះ រវាងចិន និងតៃវ៉ាន់ ក្នុងពេលបច្ចុប្បន្ននេះ គឺជាការអូសបន្លាយនៃសង្រ្គាមស៊ីវិល តាំងពីជាង ៧០ឆ្នាំមុន។ សង្រ្គាមស៊ីវិល ដែលបើនិយាយទៅតាមលក្ខណៈបច្ចេកទេស នៅមិនទាន់បញ្ចប់ជាស្ថាពរនៅឡើយ ដោយសារតែមិនមានការចុះកិច្ចព្រមព្រៀងសន្តិភាព ឬបទឈប់បាញ់ រវាងភាគីជម្លោះទាំងពីរ។
សម្រាប់បក្សកុម្មុយនិស្តចិន តៃវ៉ាន់គឺប្រៀបដូចជាសង្រ្គាមបដិវត្តន៍ដែលមិនទាន់ចប់ចុងចប់ដើម ហើយឯករាជ្យរបស់តៃវ៉ាន់ គឺជារឿងដ៏រសើបបំផុត ដែលអាចធ្វើឲ្យរង្គោះរង្គើទៅដល់គ្រឹះនៃអំណាចរបស់មេដឹកនាំក្រុងប៉េកាំង។
បន្ថែមពីលើនេះទៅទៀត បើមើលទៅលើស្ថានភាពភូមិសាស្រ្តនយោបាយបច្ចុប្បន្ន ការទុកបណ្តោយឲ្យតៃវ៉ាន់ក្លាយជារដ្ឋឯករាជ្យពេញទី ក៏អាចនឹងបង្កជាបញ្ហាប្រឈមខាងយុទ្ធសាស្រ្តដ៏ធ្ងន់ធ្ងរមួយផងដែរ សម្រាប់ចិន។
តៃវ៉ាន់ គឺជាកោះ ដែលស្ថិតនៅកៀកនឹងចិនបំផុត ដោយត្រូវពុះចែកដោយច្រកសមុទ្រ ចម្ងាយត្រឹមតែប្រមាណជា ១៣០គីឡូម៉ែត្រប៉ុណ្ណោះពីគ្នា។ លើសពីនេះទៅទៀត តៃវ៉ាន់ គឺជាសម្ព័ន្ធមិត្តចាស់ឆ្នាំរបស់សហរដ្ឋអាមេរិក។
យើងដឹងថា ក្រោយការឡើងកាន់អំណាចរបស់បក្សកុម្មុយនិស្តចិន នៅឆ្នាំ១៩៤៩ សហរដ្ឋអាមេរិកនៅតែបន្តទទួលស្គាល់សាធារណរដ្ឋចិន ឬតៃវ៉ាន់ថាជារដ្ឋាភិបាលស្របច្បាប់របស់ចិន រហូតទាល់តែដល់ឆ្នាំ១៩៧៩ ទើបផ្លាស់ប្តូរមកទទួលស្គាល់ចិនដីគោកវិញ ក៏ប៉ុន្តែ បើទោះបីជាយ៉ាងនេះក៏ដោយ អាមេរិកនៅតែបន្តចេញមុខការពារតៃវ៉ាន់ និងបំពាក់អាវុធឲ្យតៃវ៉ាន់ រហូតមកទល់នឹងពេលបច្ចុប្បន្ននេះ។
ដូច្នេះ សម្រាប់ចិន ដែលកំពុងតែក្លាយទៅជាមហាអំណាចជាគូប្រជែងដ៏ចម្បងមួយរបស់សហរដ្ឋអាមេរិកសព្វថ្ងៃនេះ តៃវ៉ាន់ជារដ្ឋឯករាជ្យពេញលេញ ហើយជាសម្ព័ន្ធមិត្តរបស់សហរដ្ឋអាមេរិក នឹងត្រូវក្លាយទៅជាការគំរាមកំហែងដ៏ធ្ងន់ធ្ងរមួយ សម្រាប់សន្តិសុខជាតិចិន ពីព្រោះថា តៃវ៉ាន់អាចនឹងត្រូវក្លាយទៅជាទីតាំង ដែលគូប្រជែងរបស់ចិនយកទៅប្រើ ដើម្បីធ្វើជាមូលដ្ឋានទ័ព មកឡោមព័ទ្ធចិន។
ហេតុផលចម្បងៗទាំងនេះហើយ ដែលធ្វើឲ្យចិន តែងតែការពារដាច់ខាត់នូវនយោបាយ “ចិនមួយ” ដែលកំណត់ថា តៃវ៉ាន់ គឺជាដែនដីមួយរបស់ចិន ហើយតែងតែប្រកាន់ជំហរយ៉ាងមុតមាំ ប្រឆាំងដាច់ខាតមិនឲ្យតៃវ៉ាន់ប្រកាសឯករាជ្យ។
តាមការពិត កន្លងមក គេសង្កេតឃើញថា រដ្ឋាភិបាលក្រុងប៉េកាំងហាក់ដូចជាមិនសូវផ្តោតអាទិភាពខ្លាំងលើការដណ្តើមយកតៃវ៉ាន់មកគ្រប់គ្រងវិញនោះទេ ដោយសុខចិត្តទទួលឲ្យតៃវ៉ាន់ស្ថិតក្នុងស្ថានភាពបច្ចុប្បន្ន គឺស្ថិតក្រោមការគ្រប់គ្រងដោយរដ្ឋអំណាចមួយដាច់ដោយឡែកពីចិន ដោយគ្រាន់តែមិនប្រកាសឯករាជ្យផ្លូវការ។ ក៏ប៉ុន្តែ ចាប់តាំងពីក្រោយពេលដែលលោកស៊ី ជីនពីង ឡើងកាន់អំណាច គេសង្កេតឃើញថា ចិនបានបង្ហាញនូវជំហរតឹងរ៉ឹងជាងមុន ដោយធ្លាប់បានប្រកាសជាសាធារណៈថា ចំពោះតៃវ៉ាន់ ចិននឹងរក្សានូវគ្រប់ជម្រើសទាំងអស់ ក្នុងនោះក៏មានដែរ ការប្រើកម្លាំងទ័ព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ