អាជ្ញាធរវៀតណាម ចាប់ខ្លួនស្ត្រីអ្នកនិពន្ធ និងជាអ្នកកាសែតប្រឆាំងម្នាក់
អាជ្ញាធរវៀតណាម បានប្រកាសឲ្យដឹង កាលពីថ្ងៃពុធ ទី៧តុលា ថាខ្លួនបានចាប់ខ្លួន ស្ត្រីអ្នកនិពន្ធនិងជាអ្នកកាសែតប្រឆាំងម្នាក់ ឈ្មោះ ផាំ ទាន់ ត្រាង ពីបទធ្វើសកម្មភាពប្រឆាំងរដ្ឋវៀតណាម។ សូមបញ្ជាក់ថា ស្ត្រីរូបនេះ ត្រូវបានគេស្គាល់ថា គឺជាអ្នកនិពន្ធ និងអ្នកកាសែត ដែលតែងតែបានសរសេរសៀវភៅ និងអត្ថបទនានា បរិហារអំពី អំពើហិង្សា ការប្រើអំណាចផ្តាច់ការ របស់អាជ្ញាធរវៀតណាម និងការធ្វើទារុណកម្មទៅលើអ្នកកាសែត នៅវៀតណាម។ ការចាប់ខ្លួននេះ គឺបានធ្វើឡើង នៅក្រោយបន្តិច បន្ទាប់ពីមានកិច្ចប្រជុំប្រចាំឆ្នាំ រវាងវៀតណាម និងសហរដ្ឋអាមេរិក ស្តីអំពីការគោរពសិទ្ធិមនុស្ស។
ចុះផ្សាយនៅថ្ងៃ៖
ស្តាប់ - ០២:១៧
លោកស្រី ផាំ ទាន់ ត្រាង (Pham Doan Trang) ត្រូវបានអាជ្ញាធរវៀតណាម ចុះទៅចាប់ឃាត់ខ្លួន នៅថ្ងៃអង្គារ ទី៦តុលា នៅផ្ទះជួលរបស់លោកស្រីក្នុងក្រុងហូជីមិញ។ ក្រសួងសន្តិសុខសាធារណៈវៀតណាម បានបញ្ជាក់ថា លោកស្រីត្រូវជាប់ចោទ ពីបទធ្វើសកម្មភាព ប្រឌិតភស្តុតាង ផ្សព្វផ្សាយព័ត៌មានមិនពិត ដើម្បី « ប្រឆាំងនឹងសាធារណៈរដ្ឋសង្គមនិយមវៀតណាម »។ ទោសនេះ អាចត្រូវជាប់ពន្ធនាគារ រយៈពេល២០ឆ្នាំ។
សូមបញ្ជាក់ថា ឈ្មោះរបស់លោកស្រី ផាំ ទាន់ ត្រាង ត្រូវបានគេស្គាល់ជាទូទៅ ថាជាស្ត្រីមួយរូប ដែលមានសេចក្តីក្លាហាន ហ៊ានសរសេរ រិះគន់ បរិហារមន្ត្រីមានអំណាច និងអាជ្ញាធរកុម្មុយនីស្តវៀតណាម ដែលរំលោភបំពានដីធ្លី របស់ប្រជាជនក្រីក្រ ធ្វើទារុណកម្មមនុស្ស គម្រាមសំឡុតអ្នកកាសែត និងធ្វើទុក្ខបុកម្នេញទៅលើអ្នកស្រលាញ់ភេទដូចគ្នា នៅវៀតណាម។ លោកស្រីធ្លាប់ធ្វើជាអ្នកកាសែត ឲ្យបណ្តាញសារព័ត៌មានរដ្ឋវៀតណាមផងដែរ។
កាលពីឆ្នាំ ២០១៦ លោកស្រី ត្រូវបានគេចាប់ខ្លួនម្តងហើយ នៅពេលដែលលោកស្រី កំពុងធ្វើដំណើរចង់ទៅជួបលោកបារ៉ាក់អូបាម៉ា ដែលទៅធ្វើទស្សនកិច្ចនៅទីក្រុងហាណូយ កាលគ្រានោះ។ លោកស្រីធ្លាប់បានអះអាងថា លោកស្រី ត្រូវបានអាជ្ញាធរវៀតណាម ធ្វើទារុណកម្ម វាយដំលើរូបរាងកាយ ថែមទៀតផង។
កាលពីឆ្នាំ២០១៩ លោកស្រី បានសម្រេចលាចេញពីក្រុមប្រឹក្សានិពន្ធនាយកឯករាជ្យមួយ បន្ទាប់ពីក្រុមនគរបាលវៀតណាម បានធ្វើទារុណកម្ម ចាប់បង្ឃាំង គម្រាមសំឡុតទៅលើមិត្តរួមការងាររបស់លោកស្រី។ ក្រោយមក លោកស្រីបានសរសេរផ្សព្វផ្សាយលិខិតមួយជាសាធារណៈ ដែលលិខិតនោះ មានចំណងជើងថា « ក្នុងករណីដែលខ្ញុំត្រូវគេចាប់ដាក់គុកបាត់ទៅ! »។ ក្នុងអត្ថបទនោះ លោកស្រី បានអំពាវនាវ ឲ្យប្រជាជនវៀតណាមទាំងអស់ត្រូវរួមគ្នា តស៊ូដើម្បីទទួលបាននូវការបោះឆ្នោតតាមបែបប្រជាធិបតេយ្យពិតប្រាកដា ជាជាងការសំងំយកសុខ ដើម្បីសេរីភាពខ្លួនឯងរៀងៗខ្លួនៗ។ ឆ្នាំ២០១៩ដែរ អង្គការ អ្នករាយការណ៍គ្មានព្រំដែន បានប្រគល់ពានរង្វាន់ពិសេសជូនលោកស្រី ក្នុងនាមអ្នកតស៊ូដើម្បីសេរីភាពសារព័ត៌មាន។
ក្រោយដំណឹងចាប់ខ្លូនលោកស្រី ផាំ ទាន់ ត្រាង នេះ អង្គការ Human Rights Watch (HRW) បានលើកឡើងថា នេះជារឿងអយុត្តិធម៌បំផុត ហើយអាជ្ញាធរវៀតណាម ត្រូវតែដោះលែងលោកស្រីជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ