តុលាការស្រីលង្កា បង្គាប់ឲ្យបញ្ជូនត្រលប់ទៅវិញ នូវសំរាមនាំចូលពីអង់គ្លេស២៤២កុងទឺណឺ
តុលាការឧទ្ធរណ៍ក្រុងកូឡុំបូ រដ្ឋធានីស្រីលង្កា បានចេញសាលក្រមមួយ កាលពីថ្ងៃពុធ ទី១៤តុលា ដោយបានបង្គាប់ឲ្យបញ្ជូនត្រលប់ទៅវិញ នូវសំរាមចំនួន២៤២កុងទឺណឺ ដែលត្រូវបានគេនាំចូលមកពីប្រទេសអង់គ្លេស។ បើតាមប្រភពពីតុលាការស្រីលង្កា សម្រាមទាំងនោះ មានលាយឡំទៅដោយសារធាតុប្លាស្ទិក កាកសំណល់មន្ទីរពេទ្យ ព្រមទាំងមានបំណែកនៃសាកសពមនុស្សផងដែរ។
ចុះផ្សាយនៅថ្ងៃ៖
ស្តាប់ - ០២:៥១
កាកសំណល់ជាច្រើនពាន់តោន នៅក្នុងកុងទឺណឺចំនួន២៤២ នៅកំពង់ផែក្រុងកូឡុំបូ នឹងត្រូវបញ្ជូនយកត្រលប់ទៅប្រទេសដើមវិញ គឺប្រទេសអង់គ្លេស។ ចៅក្រុមតុលាការឧទ្ធរណ៍ស្រីលង្កា ក៏បានបង្គាប់ឲ្យបើកការស៊ើបអង្កេត ឈានទៅផ្តន្ទាទោស លើក្រុមហ៊ុន និងក្រុមមនុស្ស ដែលជាអ្នកទទួលបន្ទុក ការនាំកាកសំណល់ខុសច្បាប់ទាំងនេះ ចូលមកស្រីលង្កា។
សូមរំលឹកថា យោងតាមអាជ្ញាធរស្រីលង្ការ ប្រជាជនបាននាំគ្នាត្អូញត្អែរ ពីក្លិនស្អុយសាយភាយចេញពីកុងទឺណឺ ដែលគេទុកចោលនៅកំពង់ផែកូឡុំបូ ជាច្រើនខែ។ កុងទឺណឺទាំងនោះ ត្រូវបានម្ចាស់ក្រុមហ៊ុនអះអាងថា ជាសំរាមកាកសំណល់ ដែលបាននាំចូលដើម្បីយកមកកែច្នៃ។ ប៉ុន្តែ ក្រោយការត្រួតពិនិត្យរបស់អាជ្ញាធរ គេឃើញកាកសំណល់ទាំងនោះ មានលាយឡំទៅដោយសារធាតុប្លាស្ទិក កាកសំណល់ចេញពីមន្ទីរពេទ្យ ក្រណាត់ជូតឈាមនិងលាងរបួស ព្រមទាំងបំណែកនៃសាកសពមនុស្ស ថែមទៀតផង។
អង្គការក្រៅរដ្ឋាភិបាលឈ្មោះ មជ្ឈមណ្ឌលដើម្បីបរិស្ថាន និងយុត្តិធម៌ (CEJ) ដែលជាអ្នកដាក់ពាក្យប្តឹងទៅតុលាការ បានអបអរសាទរ ចំពោះការសម្រេចរបស់តុលាការ ដែលបានបញ្ជារឲ្យបញ្ជូនកាកសំណល់ដ៏គ្រោះថ្នាក់ទាំងនេះ ឲ្យត្រលប់ទៅប្រទេសអង់គ្លេសវិញ ព្រមទាំងឈានទៅផ្តន្ទាទោស ក្រុមមនុស្សដែលរកស៊ីមុខរបរ នាំចូលកាកសំណល់គ្រោះថ្នាក់ ដោយខុសច្បាប់នេះ។
គួររំលឹកថា កាលពីចុងខែកញ្ញា អាជ្ញាធររដ្ឋាភិបាលស្រីលង្កា ក៏បានចេញបញ្ជា ឲ្យដឹកត្រលប់ទៅវិញ នូវសំរាមចំនួន២៦០តោន ក្នុងកុងទឺណឺចំនួន២១ ដែលនាំចូលពីអង់គ្លេស ក្នុងរវាងឆ្នាំ២០១៧ ដល់ខែមីនាឆ្នាំ២០១៨។ នៅក្នុងលិខិតប្រកាសប្រាប់អាជ្ញាធរគយព្រំដែន ក្រុមហ៊ុនដឹកជញ្ជូនអះអាងថា ជាកាកសំណល់ពូក និងកម្រាលព្រំចាស់ៗ តែធាតុពិត គឺជាកាកសំណល់សរីរាង្គវេជ្ជសាស្ត្រ ដែលប្រមូលចេញពីមន្ទីរពេទ្យ។
គួរកត់សំគាល់ថា ប្រទេសអាស៊ីមួយចំនួន តែងបានក្លាយជាអ្នករងគ្រោះ ដោយការនាំចូល នូវកាកសំណល់គ្រោះថ្នាក់ ពីប្រទេសអ្នកមាន។ ដោយសារតែ អត្រាតម្លៃចំណាយខ្ពស់ ក្នុងការកែច្នៃឬកំទេចចោលកាកសំណល់ទាំងនោះ មានក្រុមហ៊ុនខ្លះបានបែកគំនិត ដឹកជញ្ជូនវា យកទៅចោលនៅតាមប្រទេសអាស៊ី ដោយឃុបឃិតជាមួយមន្ត្រីអាជ្ញាធរពុករលួយនៃប្រទេសទាំងនោះ។ កាលពីខែវិច្ឆិកា ឆ្នាំ២០១៩ តុលាការបារាំងបានផ្តន្ទាទោសជាប្រាក់ពិន័យ ចំនួន១៩២០០០អឺរ៉ូ ទៅលើក្រុមហ៊ុនដេញថ្លៃដឹកជញ្ជូនសំរាមមួយ ដែលបានបញ្ជូនសំរាមគ្រោះថ្នាក់ចំនួន២០កុងទឺណឺទៅប្រទេសម៉ាឡេស៊ី។ សំរាមទាំងនោះត្រូវបានអាជ្ញាធរម៉ាឡេស៊ីបញ្ជូនត្រលប់មកបារាំងវិញភ្លាម។ ដូចគ្នាដែរ តាំងតែពីខែមិថុនាឆ្នាំ២០១៩ អាជ្ញាធរឥណ្ឌូណេស៊ី ក៏បានសម្រេចបញ្ជូនកាកសំណល់គ្រោះថ្នាក់ ជាច្រើនរយកុងទឺណឺ ឲ្យត្រលប់ទៅប្រទេសដើមវិញដែរ មានសហរដ្ឋអាមេរិក អូស្ត្រាលី ហុងកុង និងអង់គ្លេសជាដើម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ