អ្នកប្រជាធិបតេយ្យថៃធ្វើបាតុកម្មសាជាថ្មី នៅថ្ងៃខួបរំលឹកចលនាបះបោររបស់និស្សិតឆ្នាំ១៩៧៣
នៅថ្ងៃពុធទី ១៤តុលា ប្រជាជនថៃ ភាគច្រើនជាយុវជន ជាច្រើនពាន់នាក់ បានធ្វើបាតុកម្មសាជាថ្មី នៅទីក្រុងបាងកក ដើម្បីទាមទារឲ្យមានការធ្វើកំណែទម្រង់នយោបាយ ឈានទៅរកលទ្ធិប្រជាធិបតេយ្យ ព្រមទាំងជម្រុះចោល នូវអំណាចឥទ្ធិពល របស់ស្ថាប័នព្រះមហាក្សត្រថៃ។ ថ្ងៃទី១៤ តុលា ក៏គឺជាថ្ងៃរំលឹកខួប នៃចលនាងើបបះបោររបស់និស្សិតថៃ នៅឆ្នាំ១៩៧៣ ដែលក្នុងហេតុការណ៍នោះ សមត្ថកិច្ចថៃបានសម្លាប់និស្សិត ប្រមាណ១០០នាក់។
ចុះផ្សាយនៅថ្ងៃ៖
ស្តាប់ - ០២:៣៧
បាតុករប្រជាធិបតេយ្យថៃជាច្រើនពាន់នាក់ បានប្រមូលគ្នាធ្វើបាតុកម្ម ជាថ្មីទៀត នៅកណ្តាលក្រុងបាងកក ក្បែរវិមានប្រជាធិបតេយ្យ។ ក្រុមបាតុករ មានបំណងនាំគ្នាដើរពីវិមានប្រជាធិបតេយ្យ ឆ្ពោះទៅកាន់វិមានរដ្ឋាភិបាល ក៏ប៉ុន្តែផ្លូវដើរត្រូវបានរារាំង ដោយរនាំង ព្រមទាំងរថយន្តក្រុងធំៗ។ សមត្ថកិច្ចនគរបាល យ៉ាងហោច១៥០០០នាក់ ត្រូវបានដាក់ពង្រាយ ជុំវិញកន្លែងដែលបាតុករជួបជុំគ្នា។
នៅរសៀលថ្ងៃពុធទី១៤តុលាដែរ ក្បួនរថយន្តព្រះមហាក្សត្រថៃ ព្រះចៅវិជ្ជរ៉ាឡុងកន ត្រូវបើកឆ្លងកាត់ផ្លូវ ក្បែរក្រុមបាតុករ។ ក៏ប៉ុន្តែ ក្រុមបាតុករបានអំពាវនាវ ឲ្យគ្រប់គ្នារក្សាភាពថ្លៃថ្នូរ ហាមស្រែកជេរប្រមាថ ដោយពាក្យអសុរស។ លោក អាណន់ នំផា មេក្រុមបាតុករម្នាក់ បានអះអាងប្រាប់អ្នកយកព័ត៌មានបារាំងថា បាតុករទាំងអស់ គ្មានបំណងឈ្លោះប្រកែក ឬប៉ះទង្គិចដោយហិង្សា ជាមួយសមត្ថកិច្ចឡើយ។ តែលោកទទួលស្គាល់ថា ធម្មតាទេ ការស្រែក ឬប្រើពាក្យសម្តី រករឿងគ្នាទៅវិញទៅមក គឺជារឿងមិនអាចចៀសផុតឡើយ។
គួរកត់សំគាល់ថា នៅមិនឆ្ងាយប៉ុន្មាន ពីក្រុមបាតុករប្រជាធិបតេយ្យ ក៏មានការជួបជុំរបស់ក្រុមបាតុករពាក់អាវលឿង ដែលគាំទ្ររដ្ឋាភិបាល និងរបបរាជានិយម ជាច្រើននាក់ផងដែរ។ នៅលើចិញ្ចើមផ្លូវម្ខាងម្នាក់ បាតុករខ្លះ បានស្រែកជេរ បោះសម្តីឲ្យគ្នាទៅវិញទៅមក។ លោក ស៊ីរី កាសេមសាវ៉ាត់ បាតុករអាវលឿងម្នាក់ បានប្រាប់អ្នកយកព័ត៌មានបារាំងថា ពួកយុវជនមិនអាចផ្តួលរំលំរបបរាជានិយមថៃ ជាទីសក្ការៈ ដែលមានចំណាស់ជាង៧០០ឆ្នាំមកហើយនោះទេ។
សូមរំលឹកផងដែរថា កាលពីថ្ងៃអង្គារទី១៣តុលាក្រុមបាតុករប្រជាធិបតេយ្យ ជាច្រើនពាន់នាក់ ក៏បានធ្វើបាតុកម្មដែរ។ នៅពេលរសៀល សមត្ថកិច្ចបានព្យាយាមបំបែកហ្វូងបាតុករ ដើម្បីបើកផ្លូវ ឲ្យក្បួនរថយន្តព្រះមហាក្សត្របើកឆ្លងកាត់ បង្ករឲ្យមានការប៉ះទង្គិចគ្នាធ្ងន់ធ្ងរ។ បាតុករចំនួន២១នាក់ ត្រូវបានចាប់ឃាត់ខ្លួន។ នៅពេលក្បួនរថយន្តព្រះមហាក្សត្របើកឆ្លងកាត់ បាតុករជាច្រើនពាន់នាក់ បានលើកដៃម្រាមបី ដោយយកតម្រាប់តាមភាពយន្តហូលីវូដរឿង Hunger Games ជាសញ្ញាតវ៉ា ប្រឆាំងនឹងអំណាចផ្តាច់ការកៀបសង្កត់ ធ្វើបាបអ្នកតូចតាច។
ដោយឡែក យោងតាមប្រភពខ្លះ បាតុកម្មរបស់ក្រុមប្រជាធិបតេយ្យ នៅថ្ងៃទី១៤តុលានេះ ហាក់មានចំនួនមនុស្សចូលរួមតិចជាងការរំពឹងទុក។ លោក ធិទិណាន់ ភុងស៊ុធីរ៉ាក់ សាស្ត្រាចារ្យវិទ្យាសាស្ត្រនយោបាយ នៅសកលវិទ្យាល័យជូឡាឡុងកន បានលើកឡើងថា ក្រុមយុវជនទំនងជាគិតស្មានថាខ្លួនមានកម្លាំងខ្លាំង អាចប្រមូលបានការគាំទ្រដោយងាយៗ ដោយមិនចាំបាច់ មានកម្មវត្ថុនយោបាយជាក់ច្បាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ