យុវជនថៃរាប់ពាន់នាក់ ធ្វើបាតុកម្ម មិនខ្លាចច្បាប់ថ្មី ដែលហាមឃាត់ការជួបជុំ
កាលពីល្ងាចថ្ងៃព្រហស្បតិ៍ទី១៥តុលា យុវជន សិស្សនិស្សិត និងប្រជាជនថៃជាច្រើនពាន់នាក់ បានជួបជុំគ្នាធ្វើបាតុកម្ម នៅកណ្តាលទីក្រុងបាងកក បើទោះបីជានៅពេលព្រឹក រដ្ឋាភិបាលថៃ បានចេញថ្មីមួយ ដែលហាមឃាត់ការជួបជុំគ្នា លើសពី៥នាក់។ ក្រៅពីស្រែកទាមទារ ឲ្យលោកប្រាយុទ្ធ ចាន់អូចា ចុះចេញពីតំណែង បាតុករ បានស្រែកទាមទារឲ្យអាជ្ញាធរថៃ ដោះលែងយុវជនថៃជាង២០នាក់ ដែលគេចាប់ខ្លួនកាលពីព្រឹកថ្ងៃព្រហស្បតិ៍។
ចុះផ្សាយនៅថ្ងៃ៖
ស្តាប់ - ០២:២៥
ក្រិត្យច្បាប់ថ្មី របស់រដ្ឋាភិបាលថៃ ដែលហាមឃាត់ការជួបជុំ ចាប់ពី៥នាក់ឡើងទៅ និងការហាមឃាត់ការសរសេររិះគន់រដ្ឋាភិបាលនៅតាមបណ្តាញសង្គម ហាក់មិនបានធ្វើឲ្យយុវជនបាតុករថៃ ខ្លបខ្លាចនោះឡើយ។ នៅព្រលប់ថ្ងៃព្រហស្បតិ៍ មនុស្សជាច្រើនពាន់នាក់ បានមកជួបជុំគ្នា អង្គុយនៅលើផ្លូវក្នុងសង្កាត់ រ៉ាតឆាប្រាសុង ដែលជាសង្កាត់ជំនួញដ៏សំខាន់ កណ្តាលក្រុងបាងកក បើទោះបីជាត្រូវប្រឈម តតាំងជាមួយសមត្ថកិច្ចក៏ដោយ។
ក្នុងចំណោមបាតុករ គឺមានភាគច្រើន ជាសិស្សវិទ្យាល័យពាក់ឯកសណ្ឋាន មាននិស្សិត និងប្រជាជនសាមញ្ញខ្លះផងដែរ។ ពួកគេបានស្រែកទាមទារ ឲ្យលោកប្រាយុទ្ធ ចាន់អូចា ត្រូវចុះចេញពីតំណែង។ យុវជនបាតុករ ក៏បានស្រែកទាមទារឲ្យសមត្ថកិច្ច ដោះលែងមិត្តភ័ក្រ្តរបស់ពួកគេ ជាង២០នាក់ ដែលត្រូវបានចាប់ឃាត់ខ្លួន ក្នុងវេលាព្រឹកថ្ងៃព្រហស្បតិ៍ នៅខាងមុខវិមានរដ្ឋាភិបាល។
សូមបញ្ជាក់ថា ក្នុងចំណោមយុវជនដែលត្រូវគេចាប់ខ្លួន គឺមាន លោក Pharit Chivarak លោក Anon Numpha និងកញ្ញា Panusaya Sithijirawattanakul។ នៅវេលាល្ងាច នៅលើទំព័រFacebook របស់លោក Anon Numpha គេឃើញមានសារមួយសរសេរថា លោកត្រូវបានសមត្ថកិច្ចថៃ ចាប់បញ្ជូនតាមឧត្ថម្ភាគចក្រ យកទៅដាក់ឃុំនៅឯទីក្រុងឈាងម៉ៃ។
យោងតាមការចុះផ្សាយ នៅលើគេហទំព័រកាសែតបាងកកប៉ុស្តិ តុលាការព្រហ្មទណ្ឌថៃ បានចេញដីការឃុំខ្លួនបាតុករ២នាក់ ពីបទធ្វើសកម្មភាពរារាំង ក្បួនព្រះទីនាំងរបស់ព្រះអង្គម្ចាស់ក្សត្រីស៊ុធីតា ព្រះមហេសីរបស់ព្រះចៅវិជ្ជរ៉ាឡុងកន កាលពីរសៀលថ្ងៃពុធ។ ប្រភពដដែលបន្ថែមថា តុលាការថៃក៏បានបដិសេធ មិនព្រមទទួលប្រាក់ធានាឲ្យនៅក្រៅឃុំ ពីមេចលនាបាតុកម្ម៥នាក់ផ្សេងទៀត។
យោងតាមគេហទំព័រកាសែតបាងកកប៉ុស្តិដែរ ក្រុមបាតុករបានរំសាយគ្នា នៅវេលាម៉ោង១០យប់ ដោយពុំមានការប្រឈមមុខគ្នាដោយហឹង្សាធំដំ ជាមួយសមត្ថកិច្ចឡើយ។ យុវជនបាតុករ បានសន្យាថានឹងត្រលប់មកជួបជុំគ្នាម្តងទៀត នៅថ្ងៃសុក្រទី១៦តុលា។
ដោយឡែក លោកថាណាថន ប្រធានគណបក្សអាណាឃត់ម៉ៃ ដែលមានប្រជាប្រិយភាពខ្លាំង កាលពីក្នុងអំឡុងពេលបោះឆ្នោត បានចេញមកនិយាយជាលើកទីមួយថា រដ្ឋាភិបាលលោកប្រាយុទ្ធ ចាន់អូចា ត្រូវតែស្តាប់ និងឆ្លើយតប ចំពោះការទាមទារចង់បាន របស់យុវជនថៃ ពុំនោះទេ វិបត្តិនយោបាយនេះ នឹងកាន់តែធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ