រដ្ឋាភិបាលថៃចេញក្រិត្យបន្ទាន់ ហាមឃាត់បាតុកម្ម និងសារប្រឆាំងរដ្ឋាភិបាល លើបណ្តាញសង្គម
ក្រោយបាតុកម្មនៅទីក្រុងបាងកក កាលពីថ្ងៃពុធទី១៤តុលា រដ្ឋាភិបាលថៃ បានចេញក្រិត្យច្បាប់អាសន្នមួយ សំដៅហាមឃាត់ សកម្មភាពជួបជុំបែបនយោបាយ និងហាមឃាត់ រាល់ការសរសេរ សាររិះគន់ ឬប្រឆាំងរដ្ឋាភិបាល នៅលើបណ្តាញសង្គម។ នេះគឺជាវិធានការថ្មី ដ៏តឹងតែង ដែលរដ្ឋាភិបាលលោកប្រាយុទ្ធ ចាន់អូចា បានសម្រេច បន្ទាប់ពីមានបាតុកម្មទាមទារលទ្ធិប្រជាធិបតេយ្យ របស់យុវជននិងប្រជាជនថៃ ប្រមាណជិត៥ខែមកហើយនេះ។
ចុះផ្សាយនៅថ្ងៃ៖
ស្តាប់ - ០២:២១
ក្រិត្យច្បាប់អាសន្ន របស់រដ្ឋាភិបាលថៃ បានចូលជាធរមាន នៅវេលាម៉ោង៤ទៀបភ្លឺ ថ្ងៃព្រហស្បតិ៍ទី១៥តុលា។ ក្រិត្យនេះ ហាមឃាត់រាល់ការជួបជុំចាប់ពី៥នាក់ឡើងទៅ ព្រមទាំងហាមឃាត់ រាល់ការសរសេរ ផ្សព្វផ្សាយសារនយោបាយនៅតាមបណ្តាញសង្គម ដែលមានខ្លឹមសារ ប៉ះពាល់ដល់សន្តិសុខជាតិ។ នេះ បើផ្អែកតាមការបញ្ជាក់ឲ្យដឹង ពីសំណាក់ លោក ស៊ុនសឺន កែវគំនើត អ្នកនាំពាក្យរដ្ឋាភិបាលថៃ។
រដ្ឋាភិបាលបានសម្រេចចេញក្រិត្យច្បាប់នេះ ដោយផ្អែកលើហេតុផលថា សកម្មភាពបាតុកម្មកន្លងមកនេះ គឺជាអំពើប្រឆាំងនឹងរដ្ឋធម្មនុញ្ញ។ អាជ្ញាធរក៏បានលើកឡើងផងដែរថា សកម្មភាពរារាំង រំខានដល់ក្បួនព្រះទីនាំងរបស់ព្រះមហាក្សត្រ គឺជាអំពើមិនត្រឹមត្រូវ។
គួរបញ្ជាក់ថា កាលពីថ្ងៃអង្គារទី១៣តុលា ក្រុមបាតុករជាច្រើនពាន់នាក់ នៅក្បែរព្រះបរមរាជវាំង បាននាំគ្នាលើកដៃម្រាមបី ក្នុងពេលដែលក្បួនរថយន្តរបស់ព្រះចៅវិជ្ជរ៉ាឡុងកន បើកឆ្លងកាត់។ ដៃម្រាមបី គឺជាសញ្ញាបង្ហាញអំពីការតស៊ូ រើបំរះដើម្បីសិទ្ធិសេរីភាព របស់ប្រជាជនទន់ខ្សោយ ដោយយកតម្រាប់ តាមខ្សែភាពយន្តហូលីវូដ រឿងHunger Games។ ហើយនៅថ្ងៃពុធទី១៤តុលា ក្បួនរថយន្តរបស់ម្ចាស់ក្សត្រី ស៊ុធីតា មហេសីព្រះចៅវិជ្ជរ៉ាឡុងកន ក៏បានបើកកាត់ក្បែរបាតុករ ហើយបាតុករខ្លះ បាននាំគ្នាស្ទាក់ឈរពីមុខ និងលើកដៃម្រាមបី ធ្វើឲ្យក្បួនរថយន្តត្រូវឈប់ មួយសន្ទុះតូច។
សូមរំលឹកដែរថា នៅយប់ថ្ងៃពុធ ក្រុមបាតុករជាច្រើនពាន់នាក់ បាននាំគ្នាបោះតង់ នៅខាងមុខវិមានរដ្ឋាភិបាលថៃ មុននឹងមានដំណឹងថា រដ្ឋាភិបាលបានចេញក្រិត្យច្បាប់ ហាមឃាត់ការជួបជុំ។ នៅព្រឹកថ្ងៃព្រហស្បតិ៍ បាតុករភាគច្រើនបានចាកចេញពីទីនោះរួចទៅហើយ។ ប៉ុន្តែយោងតាមអ្នកនាំពាក្យរងនគរបាលក្រុងបាងកក គឺសមត្ថកិច្ចបានចាប់ឃាត់ខ្លួនមនុស្សជាង២០នាក់ និងបានរុះរើតង់របស់បាតុករផងដែរ។ ក្នុងចំណោមមនុស្សដែលត្រូវឃាត់ខ្លួន គឺមានមនុស្សសំខាន់ៗ៣នាក់ ដែលជាមេចលនាបាតុកម្មយុវជន គឺលោក Pharit Chivarak ហៅ Penguin លោក Anon Numpa និងកញ្ញា Panusaya Sithijirawattanakul ហៅ Rung។
នៅលើទំព័រ Facebook របស់ខ្លួន កញ្ញា Rung ដែលមានវ័យ២១ឆ្នាំ បានសរសេរអំពាវនាវ ឲ្យយុវជន និងប្រជាជនថៃ មកជួបជុំគ្នាធ្វើបាតុកម្មទៀត នៅថ្ងៃព្រហស្បតិ៍នេះ ចាប់ពីម៉ោង៤រសៀលទៅ នៅក្រុងបាងកក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ