ថៃ៖ សមត្ថកិច្ចប្រើកាណុងបាញ់ទឹកលាយសារធាតុគីមី បំបែកក្រុមបាតុករប្រជាធិបតេយ្យ
នៅយប់ថ្ងៃសុក្រ ទី១៦តុលា យុវជនថៃនៅតែបន្តមកជួបជុំគ្នា ជាច្រើនពាន់នាក់ នៅក្នុងសង្កាត់ជំនួញ កណ្តាលទីក្រុងបាងកក បើទោះបីមានក្រិត្យច្បាប់ថ្មីហាមឃាត់ក៏ដោយ។ សមត្ថកិច្ចថៃបានរារាំងការជួបជុំ និងបានបើកាណុងបាញ់ទឹក លាយសារធាតុគីមី បាញ់បំបែកហ្វូងបាតុករ។ នេះជាលើកទីមួយហើយ ដែលសមត្ថកិច្ចថៃ បានសម្រេចប្រើធម៌ក្តៅ ទៅលើក្រុមបាតុករ ដែលភាគច្រើនជាសិស្សវិទ្យាល័យ និងនិស្សិត។
ចុះផ្សាយនៅថ្ងៃ៖
ស្តាប់ - ០៣:០៥
យប់ថ្ងៃសុក្រ យុវជនបាតុករថៃ បានព្យាយាមជួបជុំគ្នា នៅលើកំណាត់ផ្លូវខ្វែង រ៉ាតឆាប្រាសុង កណ្តាលក្រុងបាងកក។ ក៏ប៉ុន្តែទីតាំងនេះ ត្រូវបានឡោមព័ទ្ធដោយកម្លាំងសមត្ថកិច្ចជាច្រើនពាន់នាក់ អមដោយរថយន្តធំៗថែមទៀតផង។ ទីបំផុតក្រុមយុវជនថៃ បានប្រមូលផ្តុំគ្នា នៅចំងាយប៉ុន្មានរយម៉ែត្រ ពីតំបន់រ៉ាតឆាប្រាសុង។
សមត្ថកិច្ចថៃ បន្ទាប់ពីបានប្រកាសហៅឲ្យក្រុមបាតុករ បំបែកគ្នាត្រលប់ទៅផ្ទះវិញ បានប្រើកាណុងបាញ់ទឹក លាយជាមួយសារធាតុគីមី បាញ់ទៅលើក្រុមបាតុករ ដែលកំពុងទទូលឆ័ត្រក្រោមមេឃរលឹមស្រិចៗ។ ទីបំផុត ម៉ោងប្រមាណជា៧និង៣០នាទីយប់ មេចលនាបាតុកម្ម បានស្រែកប្រកូកប្រកាស ឲ្យបាតុករបំបែកគ្នា ដើម្បីសម្រាក ត្រៀមយកកម្លាំងធ្វើសកម្មភាពនៅថ្ងៃខាងមុខ។
ឆ្លើយប្រាប់អ្នកកាសែតបារាំង កញ្ញា នីន និស្សិតអាយុ២១ឆ្នាំ បានលើកឡើងថា នាងត្រូវតែប្រមូលសេចក្តីក្លាហាន ហ៊ានប្រថុយគ្រោះថ្នាក់ ព្រោះថាបើនាងមិនចូលរួមទេនោះ គឺនឹងគ្មានការផ្លាស់ប្តូរឡើយ។ ចំណែកនិស្សិតស្រីម្នាក់វ័យ២០ឆ្នាំម្នាក់ទៀត ឈ្មោះ ភីម បាននិយាយដោយម៉ឺងម៉ាត់ថា នាងក៏ដូចជាយុវជនថៃទាំងអស់ មកធ្វើបាតុកម្ម គឺដោយសារមិនអាច បន្តទ្រាំមើលបាន នូវការជិះជាន់កេងប្រវញ្ច អ្នកមានកាន់តែមាន អ្នកក្រកាន់តែក្រីក្រ។
គួរកត់សំគាល់ថា តាំងតែពីផ្ទុះបាតុកម្មតវ៉ា របស់យុវជនថៃ ប្រមាណជាង៤ខែមកនេះ គឺនេះជាលើកទីមួយហើយ ដែលអាជ្ញាធរថៃ បានប្រើកម្លាំងបំបែក។ ប្រហែលមកពីឃើញសន្ទុះតវ៉ានេះ នៅតែបន្តមានកម្លាំង កាលពីយប់ថ្ងៃពុធរដ្ឋាភិបាលថៃ បានអនុម័តក្រិត្យច្បាប់បន្ទាន់មួយ ដោយហាមឃាត់រាល់ការជួបជុំចាប់ពី៥នាក់ឡើងទៅ និងបានហាមរាល់ការផ្សព្វផ្សាយសារប្រឆាំងរដ្ឋាភិបាល នៅលើបណ្តាញសង្គម។ លោក ប្រាយុទ្ធ ចាន់អូចា បានប្រកាសប្រាប់បាតុករថា លោកនឹងមិនលាលែង ពីតំណែងជាដាច់ខាត។
កាលពីថ្ងៃព្រហស្បតិ៍មានបាតុករជាង១ម៉ឺននាក់ បានមកជួបជុំគ្នា នៅកណ្តាលក្រុងបាងកក ដើម្បីប្រឆាំងនឹងច្បាប់អាសន្ននេះ ព្រមទាំងទាមទារឲ្យដោះលែងយុវជនមេចលនាបាតុកម្មជាង២០ ដែលកំពុងជាប់ឃុំ។ មានមនុស្ស២នាក់ ត្រូវជាប់ចោទពីបទធ្វើសកម្មភាពគម្រាម ព្រះកាយ និងសន្តិសុខរបស់មហេសីព្រះមហាក្សត្រ ដោយការរារាំងក្បួនព្រះទីនាំង កាលពីថ្ងៃពុធ។ ទោសដែលមានចែងក្នុងមាត្រា ១១០នៃច្បាប់ព្រហ្មទណ្ឌនេះ អាចផ្តន្ទាទោសឲ្យជាប់ពន្ធនាគារពី១៦ឆ្នាំ ទៅអស់មួយជីវិត។
ក្នុងចំណោមអ្នកដែលត្រូវគេចាប់ខ្លួន កាលពីថ្ងៃព្រហស្បតិ៍ គឺមាន លោក Anon Numpa មេធាវីអាយុ៣៦ឆ្នាំម្នាក់ ដែលបានចូលរួមយ៉ាងសកម្មក្នុងចលនាប្រជាធិបតេយ្យនេះ។ លោកត្រូវបានបានគេបញ្ជូនយកទៅដាក់ឃុំនៅឯទីក្រុងឈាងម៉ៃ កាលពីយប់ថ្ងៃព្រហស្បតិ៍។ ពីមន្ទីរឃុំឃាំង លោកបានអំពាវនាវ ឲ្យយុវជនថៃ បន្តចលនាដោយគោរពទ្រឹស្តីអហឹង្សា ហើយមិនត្រូវបាក់ស្បាត ខ្លាចការសម្លុតនោះឡើយ។
គណបក្សភឿថៃ បានចេញលិខិតប្រកាសមួយ អំពាវនាវឲ្យរដ្ឋាភិបាល ត្រូវលុបចោលជាបន្ទាន់ក្រិត្យច្បាប់អាសន្ន ដែលហាមឃាត់ការជួបជុំ ហើយត្រូវបញ្ឈប់រាល់សកម្មភាព គំរាមសម្លុត ទៅលើយុវជនបាតុករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ