សេដ្ឋកិច្ចចិនកើនឡើងកាន់តែលឿននៅត្រីមាសទី៣
តួលេខផ្លូវការ ចេញផ្សាយដោយការិយាល័យស្ថិតិចិន នៅថ្ងៃចន្ទនេះ បង្ហាញថា សេដ្ឋកិច្ចចិន នៅត្រីមាសទី៣ ឆ្នាំ២០២០នេះ មានកំណើនរហូតដល់ទៅជិត ៥%។ ជាកំណើនពីរត្រីមាសជាប់ៗគ្នា ហើយកើនកាន់តែលឿន ក្នុងពេលដែលសេដ្ឋកិច្ចបណ្តាប្រទេសមហាអំណាចជាច្រើនផ្សេងទៀត នៅទូទាំងពិភពលោក កំពុងប្រឈមនឹងវិបត្តិដោយសារកូវីដ១៩។
ចុះផ្សាយនៅថ្ងៃ៖
អត្រាកំណើន ៤,៩% ថ្វីដ្បិតតែទាបជាងអត្រា ៥,២% ដែលគេរំពឹងទុកបន្តិច ក៏ប៉ុន្តែ មានចំណុចសំខាន់ពីរ ដែលគេគួរកត់សម្គាល់។
ទីមួយ នេះជាកំណើនក្នុងរយៈពេលពីរត្រីមាសជាប់ៗគ្នា ហើយកំណើននៅត្រីមាសទី៣នេះ គឺកាន់តែខ្ពស់ ធៀបនឹងត្រីមាសមុន ដែលមានត្រឹមតែ ៣,២%។
លើសពីនេះទៅទៀត គេសង្កេតឃើញថា ថ្វីដ្បិតតែអត្រាកំណើនត្រីមាសទី៣នេះ មាន ៤,៩% គិតជាសរុបទាំង៣ខែ ក៏ប៉ុន្តែ គឺនៅខែកញ្ញាចុងត្រីមាសទី៣ ដែលអត្រាកំណើនមានសន្ទុះខ្លាំង ដែលនេះអាចជាតម្រ៉ុយវិជ្ជមានឆ្លងចូលទៅត្រីមាសទី៤ខាងមុខ។
គួរបញ្ជាក់ថា សេដ្ឋកិច្ចចិន ថ្វីដ្បិតតែមានអត្រាកំណើនអវិជ្ជមាន គឺរហូតដល់ទៅ -៦,៨% ក្នុងត្រីមាសទី១ ក៏ប៉ុន្តែ បើគិតជាសរុបទាំង ៩ខែ (ពីខែមេសា ដល់ខែកញ្ញា) នៃឆ្នាំ២០២០នេះ សេដ្ឋកិច្ចចិនកើនឡើងលើសពីឆ្នាំមុន ០,៧% ហើយមូលនិធិរូបិយវត្ថុអន្តរជាតិ ទើបតែបានកែប្រែការព្យាកររបស់ខ្លួន ដោយដំឡើងអត្រាកំណើនសេដ្ឋកិច្ចចិនប្រចាំឆ្នាំ២០២០នេះ រហូតដល់ ១,៩% ពោលគឺ ដំឡើងស្ទើរតែមួយជាពីរ ធៀបនឹងការព្យាករលើកមុន។ ហើយបើតាមមើលទៅ ចិនប្រហែលជាមហាអំណាចសេដ្ឋកិច្ចតែមួយគត់ ដែលអាចមានអត្រាកំណើនសេដ្ឋកិច្ចវិជ្ជមាន ក្នុងឆ្នាំ២០២០នេះ។
ក៏ប៉ុន្តែ បើទោះបីជាយ៉ាងនេះក៏ដោយ ការិយាល័យស្ថិតិចិនខ្លួនឯងផ្ទាល់ ថ្វីដ្បិតតែសាទរនឹងកំណើនសេដ្ឋកិច្ចពីរត្រីមាសជាប់ៗគ្នា ក៏ប៉ុន្តែ ក្នុងពេលជាមួយគ្នា ក៏បានបង្ហាញនូវភាពប្រយ័ត្នប្រយែងផងដែរ ដោយបានកត់សម្គាល់ នៅថ្ងៃចន្ទនេះថា សេដ្ឋកិច្ចចិននៅតែប្រឈមនឹងហានិភ័យមួយចំនួន។ ហើយជាការពិត អ្នកជំនាញសេដ្ឋកិច្ចខ្លះបានកត់សម្គាល់ទៅលើហានិភ័យ និងភាពមិនច្បាស់លាស់ពីរ ដែលចិនត្រូវប្រឈម។ ទីមួយ វិស័យនាំចេញ ដែលជាចលករដ៏ចម្បងបំផុតនៃសេដ្ឋកិច្ចចិន នៅតែស្ថិតក្នុងភាពផុយស្រួយខ្លាំង ដោយសារតែដៃគូពាណិជ្ជកម្មចម្បងៗ ដែលជាទីផ្សារសម្រាប់ការនាំចេញរបស់ចិន ជាពិសេស សហរដ្ឋអាមេរិក និងសហភាពអឺរ៉ុប នៅតែបន្តប្រឈមនឹងការរីករាលដាលកូវីដ១៩កាន់តែខ្លាំង ហើយទីពីរ ចិនខ្លួនឯងផ្ទាល់ ក៏មិនប្រាកដនៅឡើយដែរថានឹងអាចគេចផុតពីការផ្ទុះឡើងសាជាថ្មីនៃវិបត្តិកូវីដនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ