លោកប្រាយុទ្ធ ចាន់អូចាដកថយមួយជំហាន ដោយលុបចោលក្រិត្យច្បាប់អាសន្នដែលហាមឃាត់បាតុកម្ម
លោកនាយករដ្ឋមន្ត្រីថៃ ប្រាយុទ្ធ ចាន់អូចា បានសម្រេចលុបចោលវិញ នូវក្រិត្យច្បាប់អាសន្ន ដែលសំដៅហាមឃាត់ការជួបជុំចាប់ពី៥នាក់ឡើងទៅ និងហាមឃាត់រាល់ការផ្សព្វផ្សាយសារ ប្រឆាំងនឹងរដ្ឋាភិបាល នៅតាមបណ្តាញសង្គម។ នេះគឺជាការដកថយមួយជំហានរបស់លោកប្រាយុទ្ធ ចាន់អូចា ចំពោះមុខកម្លាំងចលនាបាតុកម្មរបស់យុវជនថៃ ដែលកាន់តែធំឡើងៗ ពីមួយថ្ងៃទៅមួយថ្ងៃ។ ក្រុមបាតុករ បានប្រកាសថា លោកប្រាយុទ្ធមានពេល៣ថ្ងៃ ដើម្បីលាលែងចេញពីតំណែង ពុំនោះទេ ពួកគេនឹងចុះផ្លូវ សាជាថ្មីទៀត។
ចុះផ្សាយនៅថ្ងៃ៖
ស្តាប់ - ០២:២២
ក្រិត្យច្បាប់អាសន្ន ដែលបានចូលជាធរមាន កាលពីថ្ងៃទី១៥តុលា ត្រូវអស់សុពលភាព នៅវេលាម៉ោង៥ព្រឹក ថ្ងៃព្រហស្បតិ៍ទី២២តុលានេះ។ លោកប្រាយុទ្ធ ចាន់អូចា នាយករដ្ឋមន្ត្រីថៃ បានប្រកាសថា ចាប់ពីពេលនេះទៅ ស្ថានភាពតានតឹង នឹងបានធូរស្រាលមកវិញ ហើយសមត្ថកិច្ចអាជ្ញាធររដ្ឋាភិបាល នឹងអាចអនុវត្តច្បាប់ដែលមានជាធរមាន តាមធម្មតាមកវិញ ព្រោះវិធានការពិសេស ត្រូវបានលុបចោលហើយ។
គួរកត់សំគាល់ថា នេះគឺជាការដកថយមួយជំហាន របស់លោកប្រាយុទ្ធ ចាន់អូចា ចំពោះមុខចលនាបាតុកម្មតវ៉ា របស់យុវជនថៃ ដែលមានសន្ទុះខ្លាំងឡើងៗ។ កាលពីយប់ថ្ងៃពុធ លោកប្រាយុទ្ធ ចាន់អូចា បានថ្លែងសារតាមទូរទស្សន៍ ដោយបានអំពាវនាវ ឲ្យម្ខាងៗ ត្រូវដកថយម្នាក់មួយជំហាន ដើម្បីបន្ធូរស្ថានការណ៍។ ចំណែកខាងរដ្ឋាភិបាល គឺបានត្រៀមលុបចោលក្រិត្យច្បាប់អាសន្ន។ លោកបានប្រកាសទៀតថា ក្រុមបាតុករ ត្រូវតែគោរពការស្វែងរកដំណោះស្រាយ តាមរយៈរដ្ឋសភា ដែលនឹងបើកសម័យប្រជុំវិសាមញ្ញមួយ នៅថ្ងៃចន្ទ ទី២៦តុលាខាងមុខ។
លោកស្រី Christine Cabasset អ្នកស្រាវជ្រាវនៅវិទ្យាស្ថានសិក្សាអាស៊ីអាគ្នេយ៍ បានលើកឡើងថា ការដកថយនេះ គឺដោយសារលោកប្រាយុទ្ធ ចាន់អូចា មិនអាចខ្មាស់ក្មេងៗ ជាយុវជនបាតុករ បានតទៅទេ។ ក្នុងរយៈពេលពេញមួយសប្តាហ៍មកនេះ លោកប្រាយុទ្ធ បានឃើញយ៉ាងច្បាស់ ថាច្បាប់អាសន្នដែលហាមឃាត់ការជួបជុំនោះ គ្មានប្រយោជន៍ទេ ហើយផ្ទុយទៅវិញ យុវជនថៃកាន់តែមានចិត្តប្តេជ្ញា មកចូលរួមធ្វើបាតុកម្មកាន់តែច្រើនឡើងៗ។
ដោយឡែក អ្នកវិភាគខ្លះទៀត យល់ឃើញថា ការសម្រេចលុបចោលក្រិត្យច្បាប់អាសន្ន ដើម្បីធ្វើឲ្យបាតុករស្ងប់ចិត្ត គឺគ្រាន់តែជាវិធី ដើម្បីចំណេញពេលវេលាតែប៉ុណ្ណោះ។ លោកប្រាយុទ្ធ ចាន់អូចា និងក្រុមយោធា ប្រហែលជាសង្ឃឹមថាអាចរក្សាអំណាច តាមរយៈស្នៀតនយោបាយ ចរចានៅក្នុងសភា។
កាលពីយប់ថ្ងៃពុធ ស្របពេលដែលលោកប្រាយុទ្ធ ចាន់អូចា ប្រកាសតាមទូរទស្សន៍ ពីបំណងលុបចោលក្រិត្យច្បាប់អាសន្ន នៅមិនឆ្ងាយប៉ុន្មានពីវិមានរដ្ឋាភិបាល មានក្រុមយុវជនបាតុករ ប្រមាណជិត១ម៉ឺននាក់ បានមកជួបជុំគ្នា។ ទោះបីពួកគេអបអរសាទរ នឹងការដកថយរបស់លោកប្រាយុទ្ធមែន តែក្រុមបាតុករ បានដាក់ឱសានុវាទ រយៈពេល៣ថ្ងៃ ឲ្យលោក លោកប្រាយុទ្ធ ចាន់អូចា ចុះចេញពីតំណែង។ ពុំនោះទេ មហាបាតុកម្មនឹងផ្ទុះឡើងម្តងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ