ចិន និងសហរដ្ឋអាមេរិកបញ្ចេញប្រតិកម្មវាយប្រហារគ្នាក្នុងរឿងជនជាតិភាគតិចអ៊ុយហ្គួ
នៅថ្ងៃពុធ ទី២៨ តុលា ប្រទេសចិនតាមបានបញ្ចេញប្រតិកម្មតបនឹងក្រុមសមាជិកព្រឹទ្ធសភាអាមេរិកដែលបានចោទចិនពីបទប្រល័យពូជសាសន៍លើជនជាតិភាគតិចអ៊ុយហ្គួអ្នកកាន់សាសនាអ៊ីស្លាមក្នុងខេត្តស៊ីងជាំង។ ប្រតិកម្មរបស់ចិនបានធ្វើឡើងដោយអ្នកនាំពាក្យក្រសួងការបរទេសលោកវ៉ាង វ៉េនប៊ីននៅក្នុងសន្និសីទកាសែត។ លោកវ៉ាង វ៉េនប៊ីនបានបរិហារលើការចោទប្រកាន់របស់ក្រុមសមាជិកព្រឹទ្ធសភាអាមេរិកដោយចាត់ទុកជារឿងប្រឌិតក្នុងបំណងបង្ខូចឈ្មោះចិន និងដើម្បីទាញយកប្រយោជន៍នយោបាយផ្ទាល់ខ្លួន។
ចុះផ្សាយនៅថ្ងៃ៖
៥ថ្ងៃមុនសហរដ្ឋអាមេរិករៀបចំបោះឆ្នោតប្រធានាធិបតីនៅថ្ងៃទី៣ វិច្ឆិកា សង្រ្គាមពាក្យសម្តីរវាងចិន និងសហរដ្ឋអាមេរិកហាក់មិនបានធ្លាក់ចុះទេ ទោះក្នុងរឿងពាណិជ្ជកម្ម បច្ចេកវិទ្យា សិទ្ធិមនុស្ស តៃវ៉ាន់ សមុទ្រចិនខាងត្បូង ឬមួយក៏រឿងជនជាតិភាគតិច។ រឿងជនជាតិភាគតិចនេះត្រូវបានក្រុមសមាជិកព្រឹទ្ធសភាអាមេរិកចោទចិនពីបទប្រល័យពូជសាសន៍លើពួកអ៊ុយហ្គួ រួមទាំងជនជាតិភាគតិចអ្នកកាន់សាសនាអ៊ីស្លាមផ្សេងទៀតដែលកំពុងរស់ក្នុងទឹកដីចិន។ តែផ្ទាំងស៊ីបរបស់ក្រុមសមាជិកព្រឹទ្ធសភាអាមេរិក គឺពួកអ៊ុយហ្គួដែលរស់នៅភាគច្រើនក្នុងខេត្តស៊ីនជាំង។
ការចោទប្រកាន់របស់ក្រុមសមាជិកព្រឹទ្ធសភាអាមេរិកនេះត្រូវបានចិនឆ្លើយបកវិញតាមរយៈអ្នកនាំពាក្យក្រសួងការបរទេសលោកវ៉ាង វ៉េនប៊ីននៅក្នុងសន្និសីទកាសែតមួយ។ « ក្រុមសមាជិកព្រឹទ្ធសភាអាមេរិកទាំងនេះនាំគ្នាប្រឌិតការភូតភរគ្រប់បែបយ៉ាងដើម្បីបង្ខូចកិត្តិយសចិន និងដើម្បីទាញយកប្រយោជន៍នយោបាយផ្ទាល់ខ្លួន » នេះជាសម្តីបរិហាររបស់លោកវ៉ាង វ៉េនប៊ីន។ អ្នកនាំពាក្យក្រសួងការបរទេសចិនរូបនេះដដែលបានបន្ថែមដោយចោទជាសំណួរថា ពីឆ្នាំ ២០១០ ដល់ឆ្នាំ ២០១៨ ពលរដ្ឋអ៊ុយហ្គួបានកើនពី ១០ ១៧០ ០០០នាក់ទៅ ១២ ៧២០ ០០០នាក់ តើក្រុមសមាជិកព្រឹទ្ធសភាអាមេរិកសំអាងលើភស្តុតាងអ្វីដែលហ៊ានចោទចិនថាបានប្រព្រឹត្តិអំពើប្រល័យពូជសាសន៍លើពួកអ៊ុហ្គួរ?។
បើផ្អែកតាមក្រុមអង្គការសិទ្ធិមនុស្សអន្តរជាតិ មានពួកអ៊ុយហ្គួជាង ១លាននាក់ត្រូវបានរដ្ឋអំណាចចិនចាប់ឃុំនៅក្នុងជំរំលត់ដំមួយ។ តែចិនតែងចេញមុខបដិសេធ និងបញ្ជាក់ច្រើនដងថា គឺជាមជ្ឈមណ្ឌលបណ្តុះបណ្តាលវិជ្ជាជីវៈដើម្បីជួយពលរដ្ឋអ៊ុយហ្គួឲ្យស្រួលរកការងារធ្វើ និងជួយពួកគេឲ្យស្ថិតឆ្ងាយពីក្រុមជ្រុលនិយមសាសនា ពោលមិនមែនជំរំលត់ដំ ធ្វើទារុណកម្មទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ