មហាក្សត្រថៃមានព្រះបន្ទូលអះអាងថា "ស្រលាញ់ប្រជានុរាស្ត្រថៃដូចៗគ្នា"
កាលពីល្ងាចថ្ងៃអាទិត្យ ទី១វិច្ឆិកា មានក្រុមអ្នកគាំទ្ររាជានិយមថៃជាច្រើនពាន់នាក់ គ្រប់គ្នាពាក់អាវលឿង បានមកជួបជុំគ្នានៅខាងមុខព្រះបរមរាជវាំងក្រុងបាងកក ដើម្បីសំដែងសេចក្តីស្មោះស ភក្តីភាពចំពោះព្រះមហាក្សត្រ និងក្រុមគ្រួសារព្រះញាតិវង្សថៃ។ ព្រះចៅវិជ្ជរ៉ាឡុងកន ព្រមទាំងមហេសី បានយាងចេញមកជួបអ្នកគាំទ្រ ហើយទ្រង់ថែមទាំងបានឆ្លើយសំណួរ របស់កាសែតទូរទស្សន៍អង់គ្លេសម្នាក់ផង ថាទ្រង់ស្រលាញ់ប្រជាជនថៃទាំងអស់ ដូចៗគ្នា។
ចុះផ្សាយនៅថ្ងៃ៖
ស្តាប់ - ០២:៣៦
ក្រុមអ្នកពាក់អាវលឿងរាប់ពាន់នាក់ បានមកជួបជុំគ្នានៅខាងព្រះបរមរាជវាំងក្រុងថេប នៅល្ងាចថ្ងៃអាទិត្យ ដើម្បីបានឃើញព្រះភ័ក្ត្រព្រះមហាក្សត្រ និងក្រុមគ្រួសារព្រះញាតិវង្សថៃឯទៀត។ នេះគឺជាការជួបជុំរបស់ក្រុមអាវលឿង ដែលស្រលាញ់គាំទ្រដោយឥតលក្ខខណ្ឌ ទៅលើស្ថាប័នព្រះមហាក្សត្រថៃ និងដើម្បីជាការឆ្លើយតប ចំពោះចលនាបាតុកម្ម របស់យុវជនថៃ ដែលរិះគន់ និងទាមទារឲ្យធ្វើកំណែទម្រង់ស្ថាប័ននេះ។
ព្រះចៅវិជ្ជរ៉ាឡុងកន ព្រមទាំងព្រះមហេសី ស៊ុធីតា បានយាងចេញមកជួប និងចាប់ដៃអ្នកគាំទ្ររាប់ពាន់នាក់ ដែលខ្លះលត់ជង្គង់ ខ្លះក្រាបនៅនឹងដី អមដោយសម្រែក « ជ័យោព្រះមហាក្សត្រ » និង « សូមទ្រង់មានព្រះជនយឺនយូរ » ជាដើម។ ពេលដែលព្រះចៅវិជ្ជរ៉ាឡុងកង និងមហេសីយាងទៅជិត ក្រុមប្រជាជនបានស្រែកថា « យើងទាំងអស់គ្នា រស់នៅដោយក្តីស្មោះស និងតាមដង្ហែរអង្គព្រះមហាក្សត្រ លុះអស់ជីវិត »។
មិនដឹងថា ជាការរៀបចំទុកមុន ឬជារឿងចៃដន្យនោះទេ អ្នកកាសែតរបស់ទូរទស្សន៍អង់គ្លេស Channel 4 ម្នាក់ បានប្រជ្រៀតឈានចូលទៅក្បែរព្រះមហាក្សត្រ និងបានសួរសំណួរថា តើព្រះអង្គយល់ដូចម្តេចដែរ ចំពោះការធ្វើបាតុកម្ម របស់យុវជនថៃរាប់ម៉ឺននាក់ ដែលទាមទារការធ្វើកំណែទម្រង់ ប៉ុន្មានខែមកនេះ។ ព្រះចៅវិជ្ជរ៉ាឡុងកន បានមានព្រះបន្ទូលតបថា ៖ « ព្រះអង្គស្រលាញ់ប្រជានុរាស្ត្រថៃទាំងអស់ ដូចៗគ្នា »។ អ្នកកាសែតអង់គ្លេស សួរបន្ថែមថា តើនឹងអាចមានច្រកចេញ ដោយការស្រុះស្រួលគ្នាទេ? ព្រះចៅវិជ្ជរ៉ាឡុងកន បានឆ្លើយថា « ថៃគឺជាប្រទេសនៃការស្រុះស្រួលគ្នា »។
As thousands of protesters in Thailand demand reform to the monarchy, the King has told Channel 4 News/CNN in an exclusive interview that "we love them all the same" and Thailand is "the land of compromise" - suggesting there may be a way out of the months long political standoff pic.twitter.com/GJoizuYZfz
— Channel 4 News (@Channel4News) November 1, 2020
គួររំលឹកថា ប្រមាណជាង៤ខែមកហើយ ដែលអ្នកប្រជាធិបតេយ្យ និងយុវជនថៃជាច្រើនម៉ឺននាក់ បានធ្វើបាតុកម្ម ទាមទារជាច្រើនចំណុច ក្នុងនោះ គឺការធ្វើកំណែទំរង់ស្ថាប័នព្រះមហាក្សត្រ ធ្វើកំណែទំរង់រដ្ឋធម្មនុញ្ញ និងទាមទារឲ្យលោកប្រាយុទ្ធ ចាន់អូចា ចុះចេញពីតំណែង។ ជាចលនាបាតុកម្ម ដែលមានលក្ខណៈសន្តិភាពនិយម ហើយដែលហាក់កាន់តែមានសន្ទុះកម្លាំងគាំទ្រ ខ្លាំងឡើងៗ ពីសំណាក់យុវជនសិស្សនិស្សិតថៃ ព្រមទាំងប្រជាជនទូទៅផង។
ដោយឡែក កាលពីថ្ងៃសុក្រទី៣០តុលា យុវជន៣នាក់ ដែលជាអ្នកចេញមុខដឹកនាំបាតុកម្ម គឺលោក Pharit Chiwarak លោក Panupung Jadnok និងកញ្ញា Panusaya Sithijirawattanakul ត្រូវបានតុលាការសម្រេចដោះលែង បន្ទាប់ពីជាប់ឃុំ អស់ប្រមាណ២សប្តាហ៍។ ក៏ប៉ុន្តែមន្ត្រីនគរបាលថៃ បានបញ្ជូនពួកគេ យកទៅសួរចម្លើយបន្ត នៅល្ងាចថ្ងៃដដែល ដែលប្រការនេះ បានបង្កឲ្យមានការតវ៉ា ឈានទៅប្រវ៉ាយប្រតប់គ្នា រវាងបាតុករ និងសមត្ថកិច្ច នៅខាងមុខស្នងការនគរបាលក្រុងបាងកក។ យុវជនមេចលនាបាតុកម្មទាំង៣នាក់ បានរបួស និងត្រូវបានគេបញ្ជូនទៅកាន់មន្ទីរពេទ្យ។ នៅថ្ងៃទី១វិច្ឆិកា តុលាការថៃបានបដិសេធ ការទាមទាររបស់នគរបាលថៃ ដែលចង់បន្តឃុំខ្លួន យុវជនមេចលនាបាតុកម្មទាំង៣នាក់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ