ចិនបង្ហោះយានអវកាស ទៅជីកយកថ្មនៅឋានព្រះចន្ទ មកសិក្សាស្រាវជ្រាវ
ព្រឹកថ្ងៃអង្គារទី២៤វិច្ឆិកា យានអវកាស ឆាងអឺទី៥ របស់ចិន ត្រូវបានបាញ់បង្ហោះឆ្ពោះទៅកានឋានព្រះចន្ទ ដោយនាំយកយានរ៉ូបូមួយ ដែលមានតួនាទីជីកយកថ្មនៅលើឋានព្រះចន្ទ យកមកសិក្សាស្រាវជ្រាវ។ គួរបញ្ជាក់ថា នេះជាលើកទី១ហើយ ដែលមានបេសកកម្មយកថ្មីពីឋានព្រះចន្ទ ដោយយានរ៉ូបូបែបនេះ បន្ទាប់ពីបេសកកម្មរបស់សហភាពសូវៀត បានធ្វើទៅដោយជោគជ័យម្តង កាលពីឆ្នាំ១៩៧៦។ សម្រាប់បេសកកម្មលើកនេះ វាក៏ជាឱកាសឲ្យចិន ធ្វើការសាកល្បង ដើម្បីត្រៀមបង្ហោះមនុស្សទៅឋានព្រះចន្ទផងដែរ។
ចុះផ្សាយនៅថ្ងៃ៖
ស្តាប់ - ០២:៤៨
ទីភ្នាក់ងារអវកាសចិន បានឲ្យដឹងថា នៅវេលាម៉ោង ៤និង៣០នាទី ព្រឹកថ្ងៃទី២៤វិច្ឆិកា យានអវកាសឆាងអឺទី៥ (Chang’e 5) ត្រូវបានបាញ់បង្ហោះដោយជោគជ័យ ចេញពីស្ថានីយ៍អវកាស វែនឆាង (Wenchang) លើកោះហៃណាន។
បេសកកម្មរបស់យានឆាងអឺ គឺនាំយកយានរ៉ូបូមួយ ទៅចុះចតនៅលើឋានព្រះចន្ទ ដើម្បីជីកយកថ្មចំនួន២គីឡូក្រាម ក្នុងជំរៅ២ម៉ែត្រ ពីឋានព្រះចន្ទ។ បន្ទាប់មកទៀត បំណែកថ្មនេះ នឹងត្រូវបញ្ជូនយកមកផែនដី ដើម្បីធ្វើការសិក្សាស្រាវជ្រាវលំអិត។ លោក Pei Zhaoyu នាយករងអង្គភាពសិក្សាព្រះចន្ទ នៃទីភ្នាក់ងារអវកាសចិន បានធានាអះអាងថា អ្នកវិទ្យាសាស្ត្រនៃប្រទេសផ្សេងទៀត ក៏អាចមានលទ្ធភាព បានទទួលបំណែកថ្ម ពីឋានព្រះចន្ទនេះ ទៅស្រាវជ្រាវដែរ។
សូមរំលឹកថា កាលពីដើមឆ្នាំ២០១៩ ក្រុមអវកាសចិន បានធ្វើឲ្យពិភពលោកស្ងើចសរសើរ បន្ទាប់ពីបានបង្ហោះយាន ឆាងអឺទី៥ នាំយកយានតូចមួយទៅចុះចតនៅ មួយចំហៀងផ្នែកងងិត នៃឋានព្រះចន្ទ ដែលមិនធ្លាប់មាននរណាធ្វើទេពីមុនមក។
គួរបញ្ជាក់ថា សម្រាប់បេសកកម្មលើកនេះ យានឆាំងអឺទី៥របស់ចិន មានទំងន់សរុប៨,២តោន ដែលផ្គុំដោយ៤ផ្នែក។ ផ្នែកទីមួយគឺជាផ្នែកដែលនៅអណ្តែតលើខ្សែគន្លងរបស់ព្រះចន្ទ ផ្នែកទី២គឺផ្នែកដែលត្រូវចុះចតលើព្រះចន្ទ ផ្នែកទី៣គឺជាយានដែលត្រូវហោះឡើងមកវិញពីឋានព្រះចន្ទ និងផ្នែកទី៤គឺជាយានកាប់ស៊ុល ដែលត្រូវហោះត្រលប់មកផែនដីវិញ។ តាមការគ្រោងទុក យានឆាងអឺ នឹងចុះចតនៅលើឋានព្រះចន្ទ ចុងខែវិច្ឆិកា ហើយត្រលប់មកដល់ផែនដីវិញ នៅរវាងពាក់កណ្តាលខែធ្នូ។
ខុសពីបេសកកម្មរបស់សូវៀតកាលពីឆ្នាំ១៩៧៦ ដែលយានត្រូវហោះត្រលប់ផ្ទាល់ពីព្រះចន្ទ មកផែនដីតែម្តង ចិនបានជ្រើសយកវិធីត្រលប់មកវិញ ដែលស្មុគស្មាញ និងលំបាកជាង។ ថ្មដែលជីកបានហើយ នឹងត្រូវបញ្ជូនតាមរយៈយានដែលត្រូវហោះឡើងពីឋានព្រះចន្ទ បន្ទាប់មកទៀត ថ្មនោះនឹងត្រូវផ្ទេរទៅកាន់យានកាប់ស៊ុល ដែលរងចាំនៅលើខ្សែគន្លងព្រះចន្ទ ដើម្បីដឹកត្រលប់យកមកផែនដី។
លោក Chen Lan អ្នកវិភាគនៅគេហទំព័រ GoTaikonauts បានលើកឡើងថា ការជ្រើសយកវិធីនេះ ក៏ដោយសារចិនត្រូវការអភិវឌ្ឍន៍បច្ចេកវិទ្យាខ្លួន ដែលចាំបាច់សម្រាប់បង្ហោះបញ្ជូនយានអវកាស ដឹកមនុស្សទៅឋានព្រះចន្ទ និងត្រលប់មកវិញដោយសុវត្ថិភាព នៅថ្ងៃអនាគត។ លោក Jonathan McDowell អ្នកអវកាសអាេមរិក នៅមជ្ឈមណ្ឌល Harvard-Smithsonian បានលើកឡើងថា វិធីបញ្ជូនត្រលប់មកវិញបែបនេះ មិនដែលមាននរណាធ្លាប់ធ្វើទេ។ ប្រសិនបើចិនធ្វើបានសម្រេចលើកនេះ មានន័យថា វាជោគជ័យធំណាស់ សម្រាប់បច្ចេកវិទ្យាអវកាសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ