ចិនបានសាកល្បងវ៉ាក់សាំងបង្ការកូវីដ១៩ លើពលរដ្ឋស្ម័គ្រចិត្តជនជាតិប៉ាគីស្ថានជាច្រើនពាន់នាក់
នៅក្នុងប្រទេសប៉ាគីស្ថាន ប្រភពផ្លូវការបានបញ្ជាក់ក្នុងថ្ងៃព្រហស្បតិ៍ ទី២៧ វិច្ឆិកាថា មានពលរដ្ឋប៉ាគីស្ថានអ្នកស្ម័គ្រចិត្តចាក់វ៉ាក់សាំងជាច្រើនពាន់នាក់បានចាក់សាកល្បងវ៉ាក់សាំងបង្ការកូវីដ១៩ របស់ចិនរួចហើយ។ វ៉ាក់សាំងបង្ការកូវីដ១៩ ដែលចិនកំពុងសាកល្បងក្នុងដំណាក់ការទី៣ ដែលជាដំណាក់ការចុងក្រោយនេះផលិតដោយមន្ទីរពិសោធន៍ CanSinoBio និងវិទ្យាស្ថានជីវៈបច្ចេកវិទ្យាចិន។ យុទ្ធនាការសាកល្បងវ៉ាក់សាំងបង្ការកូវីដ១៩ របស់ចិនពេលនេះបានធ្វើឡើង ក្នុងពេលដែលមានក្រុមហ៊ុនផលិតឪសថខ្លះបានប្រកាសពីប្រសិទ្ធិភាពដល់ទៅ ៩៥% នៃវ៉ាក់សាំងបង្ការកូវីដ១៩របស់ខ្លួន។
ចុះផ្សាយនៅថ្ងៃ៖
ស្តាប់ - ០២:៣២
ក្នុងចំណោមជនជាតិប៉ាគីស្ថានអ្នកស្ម័គ្រចិត្តធ្វើតេស្តិ៍វ៉ាក់សាំងបង្ការកូវីដ១៩ របស់ចិនទាំង ១០ ០០០នាក់ មាន ៧ ០០០នាក់បានចាក់រួចហើយ។ អ្នកស្ម័គ្រចិត្តម្នាក់ធ្វើការក្នុងមន្ទីរពេទ្យមួយក្នុងទីក្រុងអ៊ីស្លាម៉ាបាតមិនព្រមបញ្ចេញឈ្មោះបានថ្លែងថា លោកស្ម័គ្រចិត្តធ្វើតេស្តិ៍វ៉ាក់សាំងដើម្បីបុព្វហេតុដ៏ថ្លៃថ្នូrមួយដែលនឹងជួយមនុស្សជាតិ និងបន្ថែមថា មានមនុស្សជាច្រើនទៀតនឹងចូលរួមស្ម័គ្រចិត្តក្នុងបុព្វហេតុជួយជីវិតមនុស្ស។ អ្វីដែលអ្នកស្ម័គ្រចិត្តជាបុគ្គលិកពេទ្យរូបនេះចង់និយាយថា បើវ៉ាក់សាំងដែលលោកសាកពេលនេះផ្តល់លទ្ធផលល្អ គេអាចយកទៅចាក់បង្ការមនុស្សលោកកុំឲ្យឆ្លងកូវីដ១៩។
លោក Ejaz Ahmad Khan អ្នកស្រាវជ្រាវដែលទទួលបន្ទុកការសាកល្បងវ៉ាក់សាំងបង្ការកូវីដ១៩ បានបញ្ជាក់ថា លទ្ធផលដំបូងស្តីពីប្រសិទ្ធិភាពរបស់វ៉ាក់សាំងនឹងអាចដឹងនៅ ២ ឬ ៣ខែខាងមុខ។ វ៉ាក់សាំងបង្ការកូវីដ១៩ ដែលកំពុងធ្វើតេស្តិ៍លើអ្នកស្ម័គ្រចិត្តជនជាតិប៉ាគីស្ថានពេលនេះជាវ៉ាក់សាំងផលិតដោយមន្ទីរពិសោធន៍ CanSinoBio និងវិទ្យាស្ថានជីវៈបច្ចេកវិទ្យារបស់ចិន។ នៅប៉ាគីស្ថាន តួលេខផ្លូវការចុងក្រោយឲ្យដឹងថា មានអ្នកឆ្លងកូវីដ១៩ ចំនួន ៣២៨ ០០០នាក់ និងអ្នកស្លាប់ ៧ ៨០០នាក់។ តែក្រុមអ្នកជំនាញបានយល់ឃើញថា តួលេខពិតប្រាកដនៃចំនួនអ្នកឆ្លង និងអ្នកស្លាប់អាចមានច្រើនជាងនេះ ព្រោះការធ្វើតេស្តិ៍រកកូវីដ១៩ នៅមានកម្រិតតិចតួចខ្លាំង។
ចំណែកក្រុមវេជ្ជបណ្ឌិតបានបញ្ជាក់ថា មន្ទីរពេទ្យទាំងអស់ជិតអស់កន្លែងទទួលអ្នកជំងឺ និងមានមន្ទីរពេទ្យខ្លះចាប់ផ្តើមមិនទទួលអ្នកជំងឺតែម្តង។ ដោយឡែក រដ្ឋអំណាចសុខាភិបាលបានព្រមានក្នុងសប្តាហ៍នេះពីរលកឆ្លងលើកទី២ ដែលអាចមានមនុស្សស្លាប់ច្រើនជាងរលកឆ្លងលើកទី១ និងបានអំពាវនាវឲ្យប្រជាជនគោរពឲ្យបានត្រឹមត្រូវនូវគម្លាតសុវត្ថិភាព។ គួររម្លឹកថា ខណៈដែលមានមន្ទីរពិសោធន៍ខ្លះកំពុងបន្តសាកល្បងវ៉ាក់សាំងបង្ការកូវីដ១៩ របស់ខ្លួនក្នុងដំណាក់ការទី៣ ដែលជាដំណាក់ការចុងក្រោយ មានមន្ទីរពិសោធន៍ខ្លះទៀតបានប្រកាសពីប្រសិទ្ធិភាពវ៉ាក់សាំងរបស់ខ្លួន។
ជាក់ស្តែងក្នុងខែវិច្ឆិកានេះ មន្ទីរពិសោធន៍អាមេរិក អាល្លឺម៉ង់ Pfizer/BioNTech បានប្រកាសពីប្រសិទ្ធិភាព ៩៥% មន្ទីរពិសោធន៍អាមេរិក Moderna បានប្រកាសពីប្រសិទ្ធិភាព ៩៤,៥% និងមន្ទីរពិសោធន៍ AstraZeneca/Université d'Oxford បានប្រកាសពីប្រសិទ្ធិភាព ៧០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ