កាសែតអាមេរិក៖ អាលីបាបាបង្កើតកម្មវិធីសម្រាប់ស្គាល់មុខ ជនជាតិអ៊ុយហ្គួរ
ក្រុមហ៊ុនបច្ចេកវិទ្យាអាលីបាបារបស់មហាសេដ្ឋី ជែក ម៉ា កំពុងរងការចោទប្រកាន់ថា បានបង្កើតកម្មវិធីសម្រាប់ជួយស្គាល់មុខជនជាតិអ៊ុយហ្គួរ។ តាមការចុះផ្សាយរបស់កាសែតអាមេរិកាំង New York Times កាលពីថ្ងៃពុធ កម្មវិធីថ្មី របស់អាលីបាបានឹងជួយឲ្យអតិថិជនអាចកំណត់ស្គាល់មុខរបស់ជនជាតិអ៊ុយហ្គួរ ឬជនជាតិភាគតិចផ្សេងទៀត នៅក្នុង រូបថត ឬនៅក្នុងវីដេអូ។ ក្រុមហ៊ុនអាលីបាបា នៅមិនទាន់ឆ្លើយបកស្រាយយ៉ាងម៉េចនៅឡើយទេ ប៉ុន្តែ ក្រុមហ៊ុនបានដក លុបចោលទៅវិញ កម្មវិធីដ៏ចម្រូងចម្រាស ដែលសំដៅ ត្រួតពិនិត្យតាមដានជនជាតិអ៊ុយហ្គួរ មិនថា នៅក្នុងប្រទេសចិន ឬនៅ បរទេស។
ចុះផ្សាយនៅថ្ងៃ៖
ស្តាប់ - ០២:៣៤
នៅពេលចាប់ពង្រីកខ្លួនទៅក្នុងមុខជំនួញផ្សេងទៀត ដែលមានតាំងពីបច្ចេកវិទ្យាស្តុកទុកទិន្នន័យ ផ្សារទំនើប រោងកុន ទាំងនៅក្នុងប្រទេស និងបរទេស ក្រុមហ៊ុនចិន អាលីបាបា ដែលជាក្រុមហ៊ុនលក់ទំនិញអនឡាញដ៏ធំមហាសាល បានបង្កើតផងដែរ កម្មវិធីមួយ ដែលមានសមត្ថភាព ជួយ ឲ្យគេកំណត់បានមុខមាត់របស់ជនជាតិអ៊ុយហ្គួរ និងជនជាតិភាគតិចដទៃទៀត ដែលកំពុងស្ថិតនៅក្រោមតាមដានដ៏តឹងរ៉ឹងរួចទៅហើយរបស់អាជ្ញាធរចិន។
តាមការចុះផ្សាយរបស់កាសែត អាមេរិកាំង New York Times កម្មវិធី របស់ក្រុមហ៊ុនអាលីបាបា នឹងជួយឲ្យអ្នកប្រើប្រាស់ ស្គាល់មុខ អត្តសញ្ញាណរបស់ ជនជាតិ អ៊ុយហ្គួរ នៅក្នុងវីដេអូ ឬរូបថត ដែលមាននៅលើអ៊ីនធ័រនែត។ អត្ថបទដែលពន្យល់លម្អិតពីកម្មវិធី ត្រូវបានក្រុមហ៊ុនអាលីបាបាដកចេញពីវិបសៃតិ៍របស់ខ្លួន ប៉ុន្តែ ទីភ្នាក់ងារស្រាវជ្រាវអាមេរិកាំងមួយឈ្មោះ IPVM បានថតទុក និងបានចែកចាយជាមួយអ្នកកាសែត។ តាមកាសែតNew York Times ដដែល កម្មវិធីរបស់អាលីបាបាគ្រាន់តែជាការតេស្តសាកល្បង ប៉ុន្តែ មិនដែលត្រូវគេប្រើឲ្យច្រើនហួសពីហ្នឹងនោះទេ។
នៅសប្តាហ៍មុន ទីភ្នាក់ងារស្រាវជ្រាវ អាមេរិកាំង បាននិយាយថា ក្រុមហ៊ុនបច្ចេកវិទ្យា Huawei បានធ្វើ តេស្តកម្មវិធីមួយ ដែលជួយឲ្យគេ ស្គាល់មុខ ជនជាតិអ៊ុយហ្គួរ ហើយនិងផ្ញើដំណឹងនេះភ្លាម ទៅប៉ូលិស។ ក្រុមហ៊ុនHuawei បានបដិសេធការចោទប្រកាន់ ប៉ុន្តែ ក្រុមហ៊ុនមិនអាចបញ្ចុះបញ្ចូល កីឡាករបាល់ទាត់បារាំង នោះទេ។ Antoine Griezmann កីឡាករជើងឯងរបស់Barcelona បានសម្រេចកាត់ផ្តាច់កុងត្រា ឈប់ផ្សាយពាណិជ្ជកម្មឲ្យក្រុមហ៊ុនHuawei នៅក្រោយការបែកធ្លាយលើកនេះ។
ប្រទេសចិនកំពុងរងការរិះគន់ ពីសហគមន៍អន្តរជាតិ នៅក្នុងរឿងធ្វើទុក្ខបុកម្នេញ គាបសង្កត់ទៅលើជនជាតិអ៊ុយហ្គួររាប់លាននាក់ នៅ ខេត្តស៊ីនជាំង។ ក្រុមអង្គការការងារសិទ្ធិមនុស្សធ្លាប់បានចោទប្រកាន់ថា អាជ្ញាធរចិន បានចាប់ឃុំខ្លួន ជនជាតិអ៊ុយហ្គួរ ជាង ១លាននាក់ នៅក្នុងជំរំលត់ដំ និងការងារបង្ខំ នៅស៊ីនជាំង។ នៅក្រោយ បដិសេធ ជាច្រើន ដង ទីក្រុងប៉េកាំង បានទទួលស្គាល់ថា ពិតជាមានជំរំលត់ដំអប់រំ ប៉ុន្តែ ជាជំរំ ដែលមានគោលដៅ ជួយ ប្រជាជនអ៊ុយហ្គួរឲ្យរួចផុតពីការអូសទាញ របស់ក្រុមអ៊ីស្លាមជ្រុលនិយម។
នៅក្រោយ ភេរវកម្មសម្លាប់មនុស្សនៅ ស្ថានីយ៍រថភ្លើង នៅ គួនមិញ នៅឆ្នាំ ២០១៤ និងការបំផ្ទុះភេរវកម្មនៅ ទីក្រុងUrumqi រដ្ឋធានីរបស់ខេត្តស៊ីនជាំង រដ្ឋាភិបាលក្រុងប៉េកាំង បានបង្កើនការ រឹតបន្តឹង ត្រួតពិនិត្យកាន់តែខ្លាំងនៅ ស៊ីនជាំង។ នៅប៉ុន្មានឆ្នាំចុងក្រោយនេះ ប៉ូលិសចិន បានប្រើកម្មវិធីស្គាល់មុខ ស្កេនគ្រាប់ភ្នែក ប្រមូលADN ពីប្រជាជនអ៊ុយហ្គួរ និងយកលេស ប្រើកម្មវិធីបញ្ញាសិប្បនិម្មិតផ្សេងទៀត ដើម្បីការពារ ទប់ស្កាត់ការវាយប្រហារភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ