ថៃបិទខេត្តសាមុតសាខន ក្រោយរកឃើញករណីកូវីដ១៩ ជាង៨០០នាក់
អាជ្ញាធរសុខាភិបាលថៃ បានសម្រេចបិទខ្ទប់ខេត្ត សាមុតសាខន ដែលស្ថិតភាគខាងត្បូងក្រុងបាងកក បន្ទាប់ពីបានរកឃើញ ករណីវិជ្ជមានកូវីដ១៩ ចំនួនជាង៨០០នាក់ ពាក់ព័ន្ធជាមួយនឹងផ្សារលក់គ្រឿងសមុទ្រដ៏ធំមួយ។ នេះបើផ្អែកតាម តួលេខចុះផ្សាយដោយកាសែតបាងកកប៉ុស្តិ។ អាជ្ញាធរថៃ កំពុងធ្វើតេស្តទ្រង់ទ្រាយធំ ទៅលើមនុស្សប្រមាណជាង១ម៉ឺននាក់ ព្រមទាំងកំពុងពិចារណា បិទខ្ទប់ខេត្តផ្សេងៗផងដែរ។
ចុះផ្សាយនៅថ្ងៃ៖
ស្តាប់ - ០២:២៦
ផ្សារបោះដុំគ្រឿងសមុទ្រដ៏ធំមួយ ឈ្មោះម៉ាហាឆៃ នៅក្នុងខេត្តសាមុតសាខន ប្រទេសថៃ បានក្លាយជាជង្រុក នៃការផ្ទុះការឆ្លងរាលដាលកូវីដ១៩។ ស្ត្រីអ្នកលក់បង្គារ អាយុ៦៧ឆ្នាំម្នាក់ ត្រូវបានគេធ្វើតេស្តរកឃើញវិជ្ជមានកូវីដ១៩ មុនគេនៅក្នុងផ្សារនេះ មុននឹងធ្វើឲ្យផ្អើល ឈានទៅដល់ការធ្វើតេស្តទ្រង់ទ្រាយធំ។
យោងតាមលោក Taweesin Visanuyothin អ្នកនាំពាក្យនាយកដ្ឋានប្រយុទ្ធប្រឆាំងជម្ងឺឆ្លង នៃក្រសួងសុខាភិបាលថៃ គឺអាជ្ញាធរថៃ បានចាប់ផ្តើម ធ្វើតេស្តទ្រង់ទ្រាយធំ កាលពីថ្ងៃអាទិត្យទី២០ធ្នូ និងមានគម្រោងធ្វើឲ្យបានយ៉ាងហោច ១ម៉ឺននាក់ ពីនេះរហូតដល់ថ្ងៃពុធ។
គិតមកត្រឹមពេលនេះ ក្នុងចំណោមអ្នកដែលគេរកឃើញថាមានផ្ទុកកូវីដ១៩ ដែលពាក់ព័ន្ធនឹងផ្សារ លក់គ្រឿងសមុទ្រនេះ គឺភាគច្រើនជាពលករជនជាតិភូមា។ អាជ្ញាធរថៃ បានចេញវិធានការភ្លាមតាំងតែពីថ្ងៃសៅរ៍ ឲ្យពលករជនជាតិភូមាទាំងអស់នៅតំបន់នេះ ត្រូវធ្វើចត្តាឡីស័ក សំងំនៅក្នុងផ្ទះរៀងខ្លួន យ៉ាងតឹងតែងបំផុត។ យ៉ាងណាមិញ ពលករជនជាតិភូមាខ្លះ បានត្អូញត្អែរ អំពីការផ្សព្វផ្សាយសារ នៅតាមបណ្តាញសង្គម ដែលមានលក្ខណៈ ជេរប្រមាថ និងស្តីបន្ទោសថាពួកគេជាអ្នកនាំយកមេរោគកូវីដ១៩ មកចំលងរាលដាល នៅក្នុងប្រទេសថៃ។
អាជ្ញាធរ ក៏បានសម្រេចបិទខ្ទប់ ខេត្តសាមុតសាខន ដែលស្ថិតនៅកៀកបំផុតនឹងរាជធានីបាងកក អមជាមួយនឹងវិធានការ ដាក់បំរាមគោលចរ ហាមចេញដើរក្រៅផ្ទះ ចាប់ពីម៉ោង១០យប់ ដល់ម៉ោង៥ទៀបភ្លឺ។ វិធានការនេះ មានសុពលភាពរហូតដល់ថ្ងៃទី ៣ខែមករា ២០២១។
ដោយឡែក នៅព្រឹកថ្ងៃចន្ទ ទី២១ធ្នូ យោងតាមអ្នកនាំពាក្យនាយកដ្ឋានជំងឺឆ្លងថៃ គឺលោកប្រាយុទ្ធ ចាន់អូចា បានដាក់បញ្ជា ឲ្យរដ្ឋមន្ត្រីសុខាភិបាលថៃ ត្រូវពិចារណា អំពីការឈានទៅបិទខ្ទប់ខេត្តមួយចំនួនទៀត ដែលស្ថិតនៅជាប់ខេត្តសាមុតសាខន ឬក៏អាចបិទចរាចរណ៍គ្រប់ខេត្តទាំងអស់តែម្តង។ មានការព្រួយបារម្ភថា អាចមានមនុស្សច្រើននាក់ នៅខេត្តផ្សេងទៀត ដែលបានឆ្លងកូវីដ១៩ ពីទីផ្សារបោះដុំគ្រឿងសមុទ្រនៅសាមុតសាខននេះ។ យ៉ាងណាមិញ នៅរសៀលថ្ងៃចន្ទនេះ អ្នកនាំពាក្យសាលាក្រុងបាងកក បានបញ្ជាក់ប្រាប់កាសែតបាងកកប៉ុស្តិថា គេបានរកឃើញករណីកូវីដ១៩ ចំនួន២នាក់បន្ថែមទៀតនៅក្រុងបាងកក ពោលគឺសរុប៤នាក់ហើយ ដែលសុទ្ធតែជាមនុស្ស បានធ្វើដំណើរទៅផ្សារលក់គ្រឿងសមុទ្រ នៅខេត្តសាមុតសាខន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ