នាយករដ្ឋមន្ត្រីថៃបន្ទោសពលករបរទេសថាជាដើមហេតុនៃការផ្ទុះកូវីដក្នុងសហគមន៍
នៅថ្ងៃចន្ទ ២១ ធ្នូម្សិលមិញ លោកនាយករដ្ឋមន្រ្តីថៃ ប្រាយុទ្ធ ចាន់អូចា បានចេញមុខស្តីបន្ទោសពលករបរទេសថាជាដើមចមនៃការផ្ទុះឡើងជំងឺកូវីដក្នុងសហគមន៍នៅឯខេត្តសាមុតសាខន។ មកទល់នឹងពេលនេះ ករណីឆ្លងកូវីដក្នុងសហគមន៍ថៃកំពុងបន្តកើនឡើង ហើយអាជ្ញាធរបានបន្តដាក់ការប្រុងប្រយ័ត្នខ្ពស់នៅចំពោះមុខស្ថានការណ៍នៃការផ្ទុះកូវីដឡើងខ្លាំងមកវិញនេះ។
ចុះផ្សាយនៅថ្ងៃ៖
ស្តាប់ - ០២:១០
ប្រទេសថៃមានបង្កើនការប្រុងប្រយ័ត្នខ្ពស់បំផុតចំពោះកណីផ្ទុះឡើងនៃជំងឺកូវីដក្នុងសហគមន៍នៅខេត្តសាមុតសាខន ចាប់តាំងពីថ្ងៃព្រហស្បតិ៍នៅពេលដែលស្ត្រីអ្នកលក់បង្គាអាយុ ៦៧ ឆ្នាំម្នាក់នៅផ្សារលក់គ្រឿងសមុទ្រឈ្មោះម៉ាហាឆៃបានធ្វើតេស្តវិជ្ជមានកូវីដ១៩។
ក្រោយការរកឃើញនេះ អាជ្ញាធរសុខាភិបាលថៃបានចាប់ផ្តើមស្វែងរកអ្នកដែលមានទំនាក់ទំនងជាមួយស្ត្រីលក់បង្គាខាងលើ និងបានផ្តើមធ្វើតេស្តទ្រង់ទ្រាយធំ។ រដ្ឋាភិបាលថៃបានរាយការណ៍នៅថ្ងៃអង្គារនេះពីករណីឆ្លងវីរុសកូវីដថ្មីចំនួន ៤២៧ ករណី ក្នុងនោះមានពលករចំណាកស្រុកចំនួន ៣៩៧ នាក់។
ដូច្នោះគិតមកទល់នឹងពេលនេះ ករណីឆ្លងកូវីដដែលមានទំនាក់ទំនងនឹងផ្សារលក់គ្រឿងសមុទ្រដ៏ធំឈ្មោះម៉ាហាឆៃនៅខេត្តសាមុតសាខនភាគនិរតីទីក្រុងបាងកកបានកើនឡើងដល់ ១ ០៦៣ ករណីក្នុងចំណោមអ្នកធ្វើតេស្តសរុប ៦ ១៥៦នាក់។
អ្នកឆ្លងកូវីដថ្មីភាគច្រើនជាពលករមកពីប្រទេសភូមាដែលធ្វើការនៅលើទូកនេសាទគ្រឿងសមុទ្រនិងនៅក្នុងរោងចក្រកែច្នៃឧស្សាហកម្មគ្រឿងសមុទ្រថៃដែលមានទឹកប្រាក់រាប់ពាន់លានដុល្លារ។
កាលពីថ្ងៃចន្ទម្សិលមិញ លោកប្រាយុទ្ធ ចាន់អូចានាយករដ្ឋមន្ត្រីថៃបានស្តីបន្ទោសពលករបរទេសថាជាដើមចមនៃការផ្ទុះឡើងជំងឺកូវីដនៅក្នុងសហគមន៍នៅខេត្តសាមុតសាខន។ លោកបានលើកឡើងពីគ្រោះថ្នាក់ដែលរោងចក្រថៃមួយចំនួនបានជួលកម្មករចំណាកស្រុកខុសច្បាប់និងបណ្តាលឲ្យមានការលួចឆ្លងដែនខុសច្បាប់នៅតាមព្រំដែនភូមា-ថៃ។
គួរជម្រាបជូនថា គិតត្រឹមថ្ងៃអង្គារ ទី២២ ធ្នូនេះ ករណីឆ្លងកូវីដសរុបនៅទូទាំងប្រទេសថៃកើនឡើងដល់ ៥ ៧១៦ ករណី។ ខណៈពេលេនេះ អាជ្ញាធរថៃកំពុងថ្លឹងថ្លែងថាតើគួរដាក់ចេញនូវវិធានការបិទខ្ទប់ខេត្តក្រុងដទៃទៀតក្នុងទ្រង់ទ្រាយធំដែរឬយ៉ាងណា?
លោកនាយករដ្ឋមន្រ្តីប្រាយុទ្ធ ចាន់អូចា នឹងតាមដានមើលស្ថានការណ៍រយៈពេលមួយសប្តាហ៍។ ប្រសិនបើករណីឆ្លងរាលដាលកូវីដនៅក្នុងប្រទេសកាន់តែមានសភាពធ្ងន់ធ្ងរនោះវិធានការចាក់សោរទ្រង់ទ្រាយធំនឹងត្រូវដាក់ចេញនៅចំពេលប្រារព្ធបុណ្យឆ្លងឆ្នាំសកលជាចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ