អាជ្ញាធរចិនបើកអង្កេតលើក្រុមហ៊ុនអាលីបាបា របស់លោក Jack Ma
ជាដំណឹងដ៏គួរឱ្យភ្ញាក់ផ្អើលសម្រាប់ពិភពអ្នកជំនួញ ! នៅព្រឹកថ្ងៃព្រហស្បតិ៍ទី ២៤ ធ្នូ ២០២០នេះ អាជ្ញាធរចិនបានប្រកាសបើកអង្កេតប្រឆាំងនឹងក្រុមហ៊ុនអាលីបាបា ដែលជានិម្មិត្តរូបនៃភាពជោគជ័យរបស់ចិនក្នុងវិស័យសេដ្ឋកិច្ចឌីជីថល។ របបកុម្មុយនិស្តចិនសង្ស័យថាក្រុមហ៊ុនអាលីបាបា បានរកស៊ីផ្តាច់មុខ។ អាលីបាបា បានសន្យាសហការអង្កេតជាមួយអាជ្ញាធរ តែដំណឹងនេះបានរុញទីផ្សារភាគហ៊ុនអាលីបាបានៅហុងកុងឱ្យដាំក្បាលចុះអស់ជាង៨%ភ្លាម។
ចុះផ្សាយនៅថ្ងៃ៖
ស្តាប់ - ០២:០០
ជើងឯកផ្នែកពាណិជ្ជកម្មអនឡាញ អាលីបាបា ជាផ្ទាំងស៊ីបរបស់អាជ្ញាធរ បានរងគំនាបនិងការព្រមាន តាំងពីប៉ុន្មានសប្តាហ៍មកហើយ។ កាលពីដើមខែវិច្ឆិកា ពិភពអ្នកភាគហ៊ុនបានស្រឡាំងកាំងម្តងហើយ នៅពេលអាជ្ញាធរគ្រប់គ្រងទីផ្សារមូលប័ត្រចិន សម្រេចលុបឈ្មោះ នៅនាទីចុងក្រោយ មិនឱ្យក្រុមហ៊ុនអាលីបាបាមានចំណែកក្នុងភាគហ៊ុនរបស់ក្រុម Ant Group ជើងឯកពិភពលោកផ្នែកបង់ប្រាក់តាមប្រព័ន្ធអេឡិចត្រូនិក។ ការសម្រេចនេះកើតឡើងតែប៉ុន្មានថ្ងៃក្រោយពីលោក ជេក ម៉ា ស្ថាបនិកក្រុមហ៊ុនអាលីបាបា ដ៏ពេញនិយម បានថ្លែងរិះគន់សកម្មភាពរបស់ស្ថាប័នគ្រប់គ្រងទីផ្សារមូលប័ត្រចិន ពីទីក្រុងសៀងហៃ។ តាំងពីថ្ងៃនោះមក ខុសពីទម្លាប់ គេលែងឃើញ លោក ម៉ា លេចមុខជាសាធារណៈសោះ។
ក្នុងវ័យ៥៦ឆ្នាំ អតីតគ្រូបង្រៀនភាសាអង់គ្លេស លោក ម៉ា បានចូលនិវត្តន៍ និងលែងជាប្រធានក្រុមហ៊ុន ទៀតហើយ ជាផ្លូវការ ប៉ុន្តែលោកនៅតែមានឥទ្ធិពលខ្លាំងលើក្រុមហ៊ុនអាលីបាបា និង Ant Group ដដែល ព្រោះលោកមានភាគហ៊ុនធំ។ សកម្មក្នុងយុទ្ធនាការប្រយុទ្ធប្រឆាំងដើម្បីអាកាសធាតុ លោក ម៉ា ជាតំណាងជោគជ័យរបស់ចិននៅលើពិភពលោក ប៉ុន្តែអាជ្ញាធរចិនចាំបាច់ត្រូវពង្រឹងត្រួតត្រានិងទប់ស្កាត់ការពង្រីកមូលធន។ អាជ្ញាធរចិនខ្លាចឥទ្ធិពលរបស់អាលីបាបា និងជាពិសេសខ្លាចក្រុមហ៊ុនអាចជ្រៀតចូលក្នុងវិស័យកម្ចីប្រាក់តាមអនឡាញ ដែលអាចរំលងធនាគារសាធារណៈបាន។
ប្រព័ន្ធឃោសនាព័ត៌មានចិន បានថែមព្រលយអំពីគ្រោះហានិភ័យធ្លាក់ក្នុងភាពវឹកវរហិរញ្ញវត្ថុរបស់ក្រុមហ៊ុនអាលីបាបាផង និងក្រុមហ៊ុន Tencent ជាគូប្រជែងផង។ “ការបើកអង្កេតលើក្រុមហ៊ុនអាលីបាបា ជាវិធានការដ៏សំខាន់របស់ចិន ក្នុងការប្រយុទ្ធប្រឆាំងនឹងការរកស៊ីផ្តាច់មុខ តាមអ៊ីនធ័រនែត និងដើម្បីជំរុញឱ្យមានការអភិវឌ្ឍន៍ស្អាតស្អំក្នុងវិស័យសេដ្ឋកិច្ចឌីជីថលយូរអង្វែង”។ នេះបើតាមសំណេររបស់សារព័ត៌មានផ្លូវការបក្សកុម្មុយនិស្តចិន។
ការអង្កេតនេះបានបង្ហាញឱ្យឃើញថា ទោះអាលីបាបា មានអំណាចប៉ុនណា ទោះក្រុមហ៊ុនឯកជនមានបានយ៉ាងណា ក៏មិនអាចផ្ចាញ់បក្សកុម្មុយនិស្តបានទេ។ នៅប្រទេសចិន ច្បាប់ត្រូវស្ថិតនៅក្រោមការកំណត់របស់បក្សកុម្មុយនិស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ