ចិនទាញផលចំណេញសេដ្ឋកិច្ចបានច្រើនជាងគេពីវិបត្តិកូវីដ១៩
ក្នុងពេលដែលសេដ្ឋកិច្ចពិភពលោកកំពុងអូសជើងដោយវិបត្តិកូវីដ១៩ ពាណិជ្ជកម្មក្រៅប្រទេសរបស់ចិន មានកំណើន១,៩% នៅឆ្នាំ២០២០។ នេះបើតាមស្ថិតិផ្លូវការរបស់ស្ថាប័នពន្ធដារចិន។ “ចិនជាមហាប្រទេសតែមួយគត់នៅលើពិភពលោក ដែលមានកំណើនផលិតផលសរុបក្នុងស្រុកវិជ្ជមាន” នេះបើតាមការអះអាងរបស់លោក Li Kuiwen អ្នកនាំពាក្យនៃរដ្ឋបាលពន្ធដារចិន ក្នុងសន្និសីទកាសែតថ្ងៃទី ១៤មករា ២០២១។
ចុះផ្សាយនៅថ្ងៃ៖
ស្តាប់ - ០២:១៧
ចិនបានទទួលផលចំណេញពីវិបត្តិកូវីដ១៩ខ្លាំងជាងគេ។ រងគ្រោះមុនគេ តែដើរចេញពីវិបត្តិក៏បានមុនគេ។ តាំងពីដើមខែមេសា២០២០មក ចិនបានក្លាយជារោងជាងពិភពលោក។ ដោយហេតុកូវីដ១៩ រោងចក្រចិនមិនអាចលើកការងារទៅធ្វើនៅក្នុងបណ្តាប្រទេសនៅអាស៊ីខាងត្បូង ឬអាស៊ីអាគ្នេយ៍ដែលមានតម្លៃពលកម្មថោកជាងទេ។ រោងចក្រចិនបានទៅស្វែងរកនិងដឹកកម្មករទាំងឡានៗ ដែលជាប់កុននៅក្នុងតំបន់ និងខេត្ត ដោយហេតុបម្រាមបិទខ្ទប់ប្រទេសដើម្បីទប់ស្កាត់រលករាតត្បាតរបស់កូវីដ១៩។
វិធានការបិទខ្ទប់ប្រទេស ការណែនាំពលរដ្ឋឱ្យនៅតែក្នុងផ្ទះ គោរពគម្លាតសុវត្ថិភាព ចេះការពារខ្លួន បានពង្រីកតូនាទីពាណិជ្ជកម្មចិន និងបានជំរុញការនាំចេញចិន ឱ្យមានកំណើនយ៉ាងខ្លាំង។ ការនាំចេញម៉ាស់ និងសម្ភារៈសម្រាប់ការពារសុខភាព បានកើនឡើង៣១%។ ការនាំចេញនូវផលិតផលអេឡិចត្រូនិកក៏កើនឡើងខ្លាំង ដើម្បីបំពេញសេចក្តីត្រូវការរបស់អ្នកជាប់បង្ខាំងខ្លួននៅទូទាំងពិភពលោក។ ជាសរុប ចិនមានសល់ផលពាណិជ្ជកម្មឡើងដល់កំរិតកំពូល (នៅខែវិច្ឆិកា ៦១ពាន់លានអឺរ៉ូ, ៧៨ពាន់លាននៅខែធ្នូ) និងមានកំណើនសេដ្ឋកិច្ចប្រចាំឆ្នាំ៣,៦%។
សេដ្ឋកិច្ចចិនមានជោគជ័យលើគ្រប់ផ្នែក។ ជាមួយនឹងអាទិភាពស្វែងរកលំនឹងពាណិជ្ជកម្ម លោកប្រធានាធិបតីអាមេរិក ដូណាល់ត្រាំ បានប្រកាសសង្គ្រាមពាណិជ្ជកម្មជាមួយមហាយក្សចិន តាំងពីឆ្នាំ២០១៨មក និងទើបបានបិទបញ្ចប់នៅខែមករាឆ្នាំ២០២០ មុនផ្ទុះវិបត្តិកូវីដ១៩បន្តិច។ ថ្វីបើក្នុងកិច្ចព្រមព្រៀងចិនយល់ព្រមបង្កើនការនាំចូលផលិតអាមេរិក តម្លៃ២០០ពាន់លានបន្ថែមសម្រាប់រយៈពេលពីរឆ្នាំមែន ប៉ុន្តែបើតាមរបាយការណ៍របស់ស្ថាប័នពន្ធដារចិនចេញផ្សាយនៅមួយសប្តាហ៍មុនលោកត្រាំបញ្ចប់អាណត្តិ ការនាំចេញរបស់ចិនទៅអាមេរិកនៅឆ្នាំ២០២០នេះ បានកើនឡើង៧,១% ពោលគឺឡើងដល់៣១៦,៩ពាន់លានដុល្លារ។
បើទោះបីជារដ្ឋបាលលោកដូណាល់ត្រាំ បានបន្ថែមរនាំងពន្ធគយយ៉ាងណាក៏ដោយ ក៏តួនាទីចិនក្នុងទីផ្សារមូលប័ត្រកាន់តែត្រូវបានពង្រឹង។ កំណើនសេដ្ឋកិច្ចពិភពលោកបច្ចុប្បន្នរំពឹងលើចិនជាងពេលណាៗទាំងអស់។ គ្រាន់តែថាគំរូសេដ្ឋកិច្ចចិននៅមានកំរិត និងត្រូវការពេលវេលាយូរទៀតទម្រាំអាចឡើងមកស្មើនឹងសហរដ្ឋអាមេរិកបាន។ ប្រជាពលរដ្ឋចិនកាន់តែចាស់ វិស័យឯកជនរងគំនាបខ្លាំងពីរដ្ឋ មានបំណុលជាតិខ្ពស់ សុទ្ធសឹងជាកត្តាដែលអាចមកពន្យឺតចិនមិនឱ្យស្ទុះឡើងបានលឿនទៅវ៉ារអាមេរិកយកតំណែងជាមហាអំណាចសេដ្ឋកិច្ចទី១ពិភពលោកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ