ចិនបើកប្រតិបត្តិការរុករក ជួយសង្រ្គោះ កម្មករដែលជាប់គាំងក្នុងអណ្តូងរ៉ែមាស
ក្រុមជួយសង្រ្គោះ ចិន បានចាប់ផ្តើមជីកខួងរកច្រកចូលបីទៀត នៅថ្ងៃនេះ ដើម្បី អាចចូលទៅជួយ ក្រុមកម្មករ ដែលកំពុងជាប់គាំង នៅក្នុងអណ្តូងរ៉ែមាស នៅ ខេត្តស្ហានតុង ភាគខាងកើតប្រទេសចិន។ នៅក្រោយ ជាប់គាំង ក្រោមដី អស់ ៩ថ្ងៃ ដោយសារ គ្រោះថ្នាក់ផ្ទុះ បំផ្លាញ ផ្លូវចូល អណ្តូងរ៉ែ កម្មករអណ្តូងរ៉ែចិន ១១នាក់ បានបង្ហាញសញ្ញា ថា ពួកគេនៅរស់រានមានជីវិត និងបានសរសេរសំបុត្រ ទទូច សុំកុំឲ្យគេលះបង់ចោល ប្រតិបត្តិការរុករក កម្មករដែលកំពុងជាប់គាំងក្នុងអណ្តូងរ៉ែ។
ចុះផ្សាយនៅថ្ងៃ៖ កែប្រែថ្ងៃទី៖
តាមរយៈខ្សែពួរដែក ដែលក្រុមជួយសង្រ្គោះ បានទម្លាក់ ចូលកាលពី ថ្ងៃអាទិត្យ ក្រុមកម្មករ ដែលបានបាត់ខ្លួន អស់ជាច្រើនថ្ងៃ បានសរសេរសំបុត្របញ្ជូនមកខាងលើ ដោយប្រាប់ថា ពួកគេ មានគ្នីគ្នា ១១នាក់ កំពុងស្ថិតក្នុងជម្រៅដី ៥៤០ម៉ែត្រ និងបានអំពាវនាវសុំជំនួយ សុំស្បៀងអាហារ និងថ្នាំសង្កូវ សម្រាប់អ្នករបួស ៤នាក់។
ហេតុការណ៍ផ្ទុះ នៅមាត់ច្រកផ្លូវចូលការដ្ឋាន អណ្តូងរ៉ែមាស នៅខេត្តស្ហានតុង បានធ្វើឲ្យកម្មករចិន ប្រមាណ ២២នាក់ នៅ ជាប់ ក្នុងអណ្តូងរ៉ែ ជម្រៅជាង ៥០០ម៉ែត្រ តាំងពីថ្ងៃទី ១០មករា។ រហូតមកដល់ពេលនេះ គេនៅមិនទាន់បានដំណឹង ពីមនុស្សជាង១០នាក់ផ្សេងទៀត ដែលកំពុងបាត់ខ្លួន ក្នុងជម្រៅដី ជាង ៦០០ម៉ែត្រនោះឡើយទេ។
បន្ទាប់ពី ជីកខួង បានច្រកចូល ចំនួន ៣កន្លែង កាលពី ថ្ងៃចន្ទ ក្រុមជួយសង្រ្គោះ ចិនបានចាប់ផ្តើមខួងរកច្រកចូល ៣ផ្សេងទៀត នៅថ្ងៃអង្គារនេះ ដើម្បីរកផ្លូវ ទៅជួយកម្មករ ទាំង១១នាក់ ដែលកំពុងប្រឈមនឹង ទឹកឡើង ក្រោមដី។ តាមចៅហ្វាយក្រុង Yantai លោក Chen Fei ប្រតិបត្តិការជីងខួង ដើម្បីអាចចូលជួយសង្រ្គោះ កម្មករដែលនៅជាប់ក្នុងអណ្តូងរ៉ែ ត្រូវយឺតយ៉ាវ ដោយសារថា ថ្មនៅតំបន់នោះ ជាថ្មក្រានីត ដែលរឹង ពិបាកនឹងខួង។
តាមកាសែតក្នុងស្រុកចិន China Youth daily ក្រុមជួយសង្រ្គោះ បានបាត់បង់ពេលពេលាសំខាន់ ដើម្បី ជួយសង្រ្គោះ ព្រោះថា អាជ្ញាធរមូលដ្ឋានបានចំណាយពេល ចោលអស់មួយថ្ងៃ មុននឹងរាយការណ៍ពីគ្រោះថ្នាក់ ផ្ទុះ នៅ អណ្តូងរ៉ែមាស កាលពីថ្ងៃ ទី១០មករា។ ប្រធានក្រុមបក្សកុម្មុយនិស្ត ប្រចាំមូលដ្ឋាន ហើយនិងចៅហ្វាយក្រុង ត្រូវបានដកហូតចេញពីមុខតំណែង ចំណែកអាជ្ញាធរចាប់ផ្តើមស៊ើបអង្កេតរកមូលហេតុដែលធ្វើឲ្យផ្ទុះ បំផ្លាញច្រកចូលអណ្តូងរ៉ែ។
នៅប្រទេសចិន គ្រោះថ្នាក់នៅអណ្តូងរ៉ែ ឧស្សាហ៍កើតមានជាញឹកញយ ដោយសារគ្មានការគោរពក្បួនច្បាប់ ការពារសុវត្ថិភាព ត្រឹមត្រូវ។ កាលពី ខែធ្នូកន្លងទៅ កម្មករចិន ២៣នាក់ ស្លាប់ នៅក្នុងអណ្តូងរ៉ែធ្យូងថ្ម នៅខេត្តចុងឈីង ពោលគឺនៅតែ ប៉ុន្មានខែក្រោយ កម្មករ ១៦នាក់ផ្សេងទៀត ស្លាប់ដោយសារពុល សារធាតុCarbon Monoxide បន្ទាប់ពីជាប់គាំង ក្នុងអណ្តូងរ៉ែ ធ្យូងថ្ម ជាច្រើនថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ