ចិនផ្តាំប្រាប់ទៅអាេមរិកថា « កុំចង់រារាំងចិន ព្រោះវាជារឿងគ្មានថ្ងៃបានជោគជ័យ »
កាលពីថ្ងៃទី២៨មករា ក្រសួងការពារជាតិចិន បានផ្ញើសារបែបគំរាមមួយ ទៅកាន់រដ្ឋាភិបាលថ្មីរបស់អាេមរិក ដែលដឹកនាំដោយចូ បៃដិន។ ក្នុងសារនោះ ក្រសួងការពារចិនបានផ្តាំប្រាប់ទៅសហរដ្ឋអាមេរិកថា កុំចង់ទប់ ឬរារាំងចិនឲ្យសោះ ព្រោះវាជារឿងគ្មានថ្ងៃបានជោគជ័យទេ។ សារនេះគឺចិនបានផ្ញើទៅរដ្ឋាភិបាលលោកចូ បៃដិន ខណៈដែលរដ្ឋាភិបាលថ្មីនេះ កំពុងបង្ហាញជំហរយ៉ាងច្បាស់ ក្នុងការប្រឆាំងតទល់ជាមួយចិន ទាក់ទិននឹងវិស័យសន្តិសុខតំបន់អាស៊ីប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:០៥
លោក Wu Qian អ្នកនាំពាក្យក្រសួងការពារជាតិចិន បានលើកឡើងនៅក្នុងសន្និសីទកាសែត កាលពីថ្ងៃទី២៨មករាថា៖ វាជារឿងឥតប្រយោជន៍ទេ ដែលអាមេរិក ចង់មកទប់ ឬរារាំងដំណើរបោះជំហានរបស់ចិន។ អ្នកនាំពាក្យចិនរូបនេះ បន្ថែមថា៖ អាមេរិកគ្មានថ្ងៃបានជោគជ័យទេ ព្រោះថាបទពិសោធន៍កន្លងមក បានបង្ហាញឲ្យឃើញហើយ ថាចង់រារាំងចិន គឺមិនខុសពីយកកាំភ្លើងបាញ់ជើងខ្លួនឯងនោះទេ។
ទោះជាយ៉ាងណា អ្នកនាំពាក្យក្រសួងការពារចិនខាងលើ បាននិយាយអំពាវនាវ ឲ្យរដ្ឋាភិបាលថ្មីរបស់អាមេរិក ដឹកនាំដោយលោកចូ បៃដិន ត្រូវចាប់ផ្តើមកសាងទំនាក់ទំនងល្អ គោរពគ្នាទៅវិញទៅមក ជាមួយនឹងចិនឡើងវិញ។
សូមរំលឹកថា ទំនាក់ទំនងរវាងចិន និងអាមេរិក បានធ្លាក់ចុះស្រអាប់យ៉ាងខ្លាំង ក្នុងអាណត្តិលោកដូណាល់ ត្រាំ។ តែយ៉ាងណា គោលជំហរមានៈរឹងរូស ចង្អុរមុខចិនរបស់រដ្ឋាភិបាលលោក ដូណាល់ ត្រាំ មិនបានធ្វើឲ្យចិនរាថយទេ ទាក់ទិននឹងវិស័យការពារជាតិ។ ក្រៅពីបន្តពង្រឹងយុទ្ធសាស្រ្តក្នុងសមុទ្រចិនខាងត្បូង ចិនបានបង្កើនកម្លាំងសព្វាវុធកាន់តែខ្លាំង។
ក្រោយការចូលកាន់តំណែងរបស់លោកចូ បៃដិន គេសង្កេតឃើញថា គោលជំហរអាមេរិក ជាមួយនឹងចិន ហាក់ដូចជាមិនខុសឆ្ងាយ ពីរដ្ឋាភិបាលមុនឡើយ។ ប៉ុន្មានថ្ងៃចុងក្រោយនេះ គេសង្កេតឃើញ រដ្ឋាភិបាល លោកចូ បៃដិន បង្ហាញសញ្ញាណយ៉ាងច្បាស់ថា អាមេរិកមិនបណ្តោយឲ្យចិនអាងយ៉ាង នៅក្នុងតំបន់អាស៊ីប៉ាស៊ីហ្វិកទេ។
ជាក់ស្តែង កាលពីចុងសប្តាហ៍មុន នាវាផ្ទុកយន្តហោះចម្បាំងអាមេរិក Theodore Roosevelt បានធ្វើដំណើរចូលក្នុងសមុទ្រចិនខាងត្បូង ដើម្បីជាការបើកឆាក សម្ភោធអាណត្តិរបស់លោកចូ បៃដិន។ លោក Lloyd Austin រដ្ឋមន្ត្រីក្រសួងការពារជាតិអាមេរិកថ្មី បានទាក់ទងជាមួយសមភាគីកូរ៉េខាងត្បូង អូស្ត្រាលី និងឥណ្ឌា ដើម្បីរកយុទ្ធសាស្ត្ររួមទប់ទល់ជាមួយចិន។
ចំណែក កាលពីថ្ងៃពុធ លោកចូ បៃដិន បានទូរស័ព្ទទៅកាន់លោកនាយករដ្ឋមន្ត្រីជប៉ុន ដោយបានធានាថា ទោះមានរឿងអ្វីក៏ដោយ អាមេរិកនឹងចាំជួយការពារជប៉ុន រាប់ទាំងសំណុំរឿងប្រជុំកោះ Senkaku ដែលចិននិងជប៉ុនដណ្តើមគ្នាគ្រប់គ្រង។
លោក Zhao Lijian អ្នកនាំពាក្យក្រសួងការបរទេសចិន បានលើកឡើងថា៖ « អាមេរិកមិនត្រូវធ្វើខ្លួនដូចក្នុងសម័យសង្រ្គាមត្រជាក់ទេ។ បញ្ហាជម្លោះដែនកោះ គឺត្រូវតែដោះស្រាយដោយប្រទេសពាក់ព័ន្ធដោយផ្ទាល់ មិនរំពឹងលើខ្នងបង្អែកផ្សេងឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ