អ្នកកាសែតអូស្រ្តាលីលោកស្រីឆេង ឡីត្រូវបានរដ្ឋអំណាចចិនចាប់ខ្លួន និងចោទប្រកាន់ជាផ្លូវការ
នៅប្រទេសអូស្រា្តលី រដ្ឋមន្រ្តីក្រសួងការបរទេសលោកស្រីម៉ារីស ផេនបានប្រកាសក្នុងថ្ងៃចន្ទ ទី៨ កុម្ភៈថា ពិធីការនីទូរទស្សន៍អូស្រា្តលីលោកស្រីឆេង ឡីត្រូវបានរដ្ឋអំណាចចិនចាប់ខ្លួន និងចោទប្រកាន់ជាផ្លូវការពីបទទម្លាយព័ត៌មានសម្ងាត់របស់រដ្ឋទៅឲ្យបរទេស។ លោកស្រីម៉ារីស ផេនបានបញ្ជាក់ថា រដ្ឋាភិបាលចិនទើបបានប្រាប់លោកស្រីក្នុងថ្ងៃទី៥ កុម្ភៈកន្លងទៅពីការចាប់ខ្លួនលោកស្រីឆេង ឡីជាផ្លូវការ។ គួរបញ្ជាក់ថា លោកស្រីឆេង ឡីជាពិធីការនីរបស់ទូរទស្សន៍ចិននិយាយភាសាអង់គ្លេសឈ្មោះ CGTN និងត្រូវបានរដ្ឋអំណាចចិនចាប់ឃុំដោយគ្មានប្រាប់មូលហេតុតាំងពីខែសីហា ឆ្នាំ ២០២០។
ចុះផ្សាយនៅថ្ងៃ៖
ស្តាប់ - ០២:២៣
ក្នុងនាមជាពិធីការនីរបស់ទូរទស្សន៍ចិននិយាយភាសាអង់គ្លសេឈ្មោះ CGTN លោកស្រីឆេង ឡីបានធ្វើបទសម្ភាសន៍ជាមួយប្រធានក្រុមហ៊ុន រោងចក្រសហគ្រាសជាច្រើននាក់នៅទូទាំងពិភពលោក។ គេមិនដឹងថា តើមកពីបទសម្ភាសន៍ទាំងអស់នេះឬដែលរដ្ឋអំណាចចិនបានចាប់ឃុំលោកស្រីកាលពីខែសីហា ឆ្នាំ ២០២០។ អ្វីដែលគេអាចនិយាយបាន ការឃាត់ខ្លួនជនជាតិអូស្រ្តាលីរូបនេះកាលពី ៦ខែមុនបានធ្វើឡើង ក្នុងពេលដែលចិន និងអូស្រា្តលីកំពុងស្គាល់ភាពតានតឹងដល់កំពូល។ ទំនាក់ទំនងការទូតរវាងក្រុងប៉េកាំង និងក្រុងកង់បេរ៉ាបានធ្លាក់ដុនដាបខ្លាំងនៅដើមឆ្នាំ ២០២០ បន្ទាប់ពីអូស្រា្តលីបានទាមទារជាផ្លូវការឲ្យមានការបើកស៊ើបអង្កេតឯករាជ្យជុំវិញប្រភពដើមនៃការផ្ទុះជំងឺកូវីដ១៩ នៅក្រុងវូហាន ប្រទេសចិន។
បន្ទាប់មកទៀត អូស្រ្តាលីបានស្តីបន្ទោសចិនពីបទពង្រីក និងពង្រឹងឥទ្ធិពលរបស់ខ្លួននៅតំបន់អាស៊ីប៉ាស៊ីហ្វិក ចោទចិនពីបទបានលូកដៃនៅក្នុងកិច្ចការផ្ទៃក្នុងរបស់អូស្រា្តលី និងការដែលអូស្រ្តាលីបានសម្រេចមិនយកក្រុមហ៊ុនចិន Huawei ដើម្បីបំពាក់បណ្តាញទូរស័ព្ទ ៥G។ ជាប្រតិកម្មវាយបកនឹងអូស្រ្តាលីវិញ ចិនបានប្រើទណ្ឌកម្មសេដ្ឋកិច្ចប្រឆាំងនឹងផលិតផលអូស្រា្តលីមួយចំនួន ពិសេសផ្អាកការនាំចូលសាច់គោ ឬដំឡើងពន្ធលើការនាំចូលស្រាអូស្រា្តលីជាដើម។ ប្រមុខការទូតអូស្រា្តលីលោកស្រីម៉ារីស ផេនបានបញ្ជាក់ថា តាំងពីការចាប់ខ្លួនលោកស្រីឆេង ឡីក្នុងខែសីហា ឆ្នាំ ២០២០ មក ក្រុមមន្រ្តីការទូតអូស្រា្តលីបានទៅសួរសុខទុក្ខលោកស្រីឆេង ឡីចំនួន ៦ដងដែលលើកចុងក្រោយបានធ្វើឡើងកាលពីថ្ងៃទី២៧ មករា។
លោកស្រីម៉ារីស ផេនបានគូសបញ្ជាក់ថា រដ្ឋាភិបាលអូស្រ្តាលីតែងសម្តែងការព្រួយបារម្ភច្រើនដងពីលក្ខខណ្ឌនៃការឃុំខ្លួនលោកស្រីឆេង ឡី រួមទាំងសុខភាពរបស់គាត់។ នៅក្នុងន័យនេះ ប្រមុខការទូតអូស្រ្តាលីសង្ឃឹមថា គោលការណ៍គ្រឹះនៃយុត្តិធម៌ និងនីតិវីធីផ្សេងទៀតនឹងត្រូវបានគោរពត្រឹមត្រូវស្របតាមវិធានអន្តរជាតិ។ សូមបញ្ជាក់ថា លោកស្រីឆេង ឡីជាប្រជាជនអូស្រ្តាលីល្បីឈ្មោះទី២ ដែលត្រូវបានរដ្ឋអំណាចចិនចាប់ខ្លួន បន្ទាប់ពីការចាប់ខ្លួនអ្នកនិពន្ធម្នាក់ឈ្មោះយ៉ាង ហេងជុនក្នុងខែមករា ឆ្នាំ ២០១៩ ពីបទសង្ស័យធ្វើចារកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ