អូស្រ្តាលីទាមទារឲ្យចិនសុំទោសជុំវិញការបង្ហោះរូបភាពដែលបង្កប់អត្ថន័យមិនអាចទទួលយកបាន
នាយករដ្ឋមន្រ្តីអូស្រ្តាលីនៅថ្ងៃចន្ទទី៣០ វិច្ឆិកានេះ បានថ្កោលទោសចំពោះការចុះផ្សាយរូបភាពកាត់-ត លើបណ្តាញសង្គមធ្វីតធ័ររបស់អ្នកនាំពាក្យរដ្ឋាភិបាលចិន ពាក់ព័ន្ធនឹងសកម្មភាពទាហានអូស្ត្រាលីនៅប្រទេសអាហ្វហ្គានីស្ថាន។ លោកស្កុត ម៉ូរីសុន ប្រមុខដឹកនាំអូស្ត្រាលីបាននិយាយថារូបភាពនោះ មានបង្កប់នូវអត្ថន័យមិនល្អទាល់តែសោះនិងបានទាមទារឲ្យប៉េកាំងសុំទោសជាសាធារណៈទៀតផងជុំវិញការបង្ហោះរូបភាពបែបនេះ។
ចុះផ្សាយនៅថ្ងៃ៖
ស្តាប់ - ០២:១០
អ្នកនាំពាក្យក្រសួងការបរទេសចិនលោកលីជៀន ចាវ (Lijian Zhao) បានបញ្ឆេះអូស្ត្រាលីឲ្យមានការខឹងសម្បាជាខ្លាំង ក្រោយពេលដែលលោកបានបង្ហោះរូបភាពស្តីអំពីបុរសម្នាក់ស្លៀកពាក់ឯកសណ្ឋានជាទាហានអូស្ត្រាលី កាន់កាំបិតប្រឡាក់ដោយឈាមឈរនៅក្បែរក្មេងអាហ្វហ្គានីស្ថានម្នាក់ ដែលកំពុងកាន់កូនសត្វចៀម។
នាយករដ្ឋមន្ត្រីអូស្រ្តាលីលោកស្កុត ម៉ូរីសុន បានហៅការបង្ហោះផ្សព្វផ្សាយរូបភាពរបស់មន្ត្រីចិនថាជាការរំលោភបំពានក្រមសីលធម៌ ជាអំពើប្រមាថមាក់ងាយប្រឆាំងនឹងកងកម្លាំងប្រដាប់អាវុធអូស្ត្រាលី និងបានស្នើឲ្យក្រុមហ៊ុនធ្វីតធ័រលុបចោលរូបភាពនោះចេញវិញផងដែរ។
ក្រៅពីនេះ លោកស្កុត ម៉ូរីសុន បានចេញមុខទាមទារការសុំទោសជាផ្លូវការពីចិន និងថារដ្ឋាភិបាលក្រុងប៉េកាំង គួរណាស់តែមានការអៀនខ្មាស់ចំពោះទង្វើបង្ហោះរូបភាពបែបនេះ។ ជារូបភាពដែលបង្ហោះលើបណ្តាញសង្គមធ្វីតធ័ររបស់អ្នកនាំពាក្យក្រសួងការបរទេសចិន និងទទួលបានការចាប់អារម្មណ៍ពីមនុស្សរាប់ពាន់ក្នុងរយៈពេល៣ម៉ោង។
គួរបញ្ជាក់ជូនថា ទំនាក់ទំនងរវាងចិន និងអូស្ត្រាលី មិនល្អសោះឡើយនៅប៉ុន្មានខែចុងក្រោយនេះ។ ការបង្ហោះរូបភាពរបស់មន្ត្រីរដ្ឋាភិបាលចិនបានជំរុញឲ្យទំនាក់ទំនងរវាងប្រទេសទាំងពីរកាន់តែមានភាពតានតឹងនឹងគ្នាខ្លាំងឡើង។
រូបភាពកាត់-ត លើបណ្តាញសង្គមធ្វីតធ័ររបស់អ្នកនាំពាក្យរដ្ឋាភិបាលចិនលោកលីជៀន ចាវ សំដៅទៅដល់បទឧក្រិដ្ឋសង្គ្រាមរបស់ទាហានអូស្ត្រាលី ដែលបានសម្លាប់ជនស៊ីវិល និងអ្នកទោស អាហ្វហ្គានីស្ថានក្នុងពេលបំពេញបេសកកម្មនៅទីនោះ។
គួររំឭកជូនដែរថា កាលពីដើមខែវិច្ឆិកានេះ មានរបាយការណ៍មួយរកឃើញ "ព័ត៌មានគួរឲ្យទុកចិត្ត" ដែលបង្ហាញថាទាហានអូស្ត្រាលីចំនួន ២៥ នាក់បាន ជាប់ពាក់ព័ន្ធនឹងការសម្លាប់ជនស៊ីវិល និងអ្នកទោសអាហ្វហ្គានីស្ថានចំនួន ៣៩ នាក់ ក្នុងចន្លោះឆ្នាំ ២០០៩ និង ២០១៣។
ដំណឹងនេះ បានធ្វើពិភពលោក ក៏ដូចជាប្រជាជនអូស្ត្រាលីផ្ទាល់ មានការភ្ញាក់ផ្អើល និងថ្កោលទោសជាខ្លាំងចំពោះសកម្មភាពរបស់ទាហានអូស្ត្រាលី។ បច្ចុប្បន្ន ករណីនេះ កំពុងស្ថិតនៅក្រោមការស៊ើបអង្កេតរបស់ប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ