ម៉ាឡេស៊ីបណ្តេញជនអន្តោប្រវេសន៍ទៅភូមាវិញ មិនខ្វល់នឹងសេចក្តីសម្រេចរបស់តុលាការ
នៅថ្ងៃអង្គារទី ២៣កុម្ភៈ២០២១នេះ តុលាការម៉ាឡេស៊ី បានចេញដីកា សម្រេចឱ្យផ្អាកជាបណ្តោះអាសន្នសិន ការបណ្តេញជនអន្តោប្រវេសន៍ខុសច្បាប់មកពីភូមា ចំនួន ១២០០នាក់។ ជាគម្រោងបណ្តេញចេញជនអន្តោប្រវេសន៍ខុសច្បាប់ ភាគច្រើនជាជនជាតិភាគតិចរ៉ូហ៊ីងយ៉ា ដ៏ចម្រូងចម្រាសដែលអង្គការការពារសិទ្ធិមនុស្សបានបរិហារយ៉ាងខ្លាំង។ ប៉ុន្តែរដ្ឋាភិបាលម៉ាឡេស៊ីប្រកាសថាមិនគោរពតាមសេចក្តីសម្រេចរបស់តុលាការនេះទេ។ អន្តោប្រវេសន៍ជាង១ពាន់បានបញ្ជូនចូលទូកយោធាភូមារួចហើយ។
ចុះផ្សាយនៅថ្ងៃ៖
ស្តាប់ - ០១:៥៥
ខ្លះជាក្មេងមិនទាន់ពេញវ័យ ខ្លះបានដាក់ពាក្យសុំសិទ្ធិជ្រក ខ្លះជាជនជាតិភាគតិច ខ្លះកាន់សាសនាអ៊ីស្លាមរ៉ូហ៊ីងយ៉ា ត្រូវបានបញ្ជូនតាមឡានក្រុង ឡានទ្រុង ទៅមូលដ្ឋានយោធានៅMulutឆ្នេរខាងត្បូងម៉ាឡេស៊ីហើយ ដើម្បីត្រៀមឡើងទូកបញ្ជូនត្រលប់ទៅភូមាវិញ។
នេះមិនមែនជាលើកទីដំបូងទេ ដែលម៉ាឡេស៊ីបើកប្រតិបត្តិការបញ្ជូនជនអន្តោប្រវេសន៍ខុសច្បាប់ភូមា ប៉ុន្តែនេះជាប្រតិបត្តិការលើកទីមួយដែលរបបយោធាភូមាបានសហការជួយម៉ាឡេស៊ី។ នាវាយោធាភូមាបានមកដល់ឆ្នេរម៉ាឡេស៊ី នៅថ្ងៃទី ២១កុម្ភៈ២០២១។ ក្រោយរដ្ឋប្រហារទម្លាក់រដ្ឋាភិបាលលោកស្រីអ៊ុងសានស៊ូជី មេដឹកនាំយោធាភូមា បានបញ្ជូននាវាយោធាបីគ្រឿងទៅដឹកមកអន្តោប្រវេសន៍ទាំងនោះ។
សហរដ្ឋអាមេរិក និងអង្គការសហប្រជាជាតិ បានសម្តែងការរិះគន់យ៉ាងខ្លាំង គម្រោងបណ្តេញជនអន្តោប្រវេសន៍នេះ។ បើតាមអង្គការការពារសិទ្ធិមនុស្ស សូម្បីតែអ្នកបានដាក់ពាក្យសុំសិទ្ធិជ្រកកោនហើយ ហើយខ្លះទៀតមានកាន់ប័ណ្ណសម្គាល់ជាជនភៀសខ្លួនផ្តល់ដោយអង្គការHCRទៀតក៏មានឈ្មោះក្នុងបញ្ជីបញ្ជូនចេញទៅវិញដែរ។ ប៉ុន្តែទង្វើរបស់ម៉ាឡេស៊ីមិនខុសច្បាប់ទេ ព្រោះម៉ាឡេស៊ីមិនបានចុះហត្ថលេខាលើសន្ធិសញ្ញាការពារជនភៀសខ្លួនឆ្នាំ១៩៥១ទេ។
ក្រោយបណ្តឹងរបស់អង្គការការពារសិទ្ធិមនុស្សAmnesty International និងអង្គការ Asylum Access តុលាការកំពូលក្រុងកូឡាឡាំពួរបានចេញបញ្ជា នៅថ្ងៃអង្គការទី ២៣កុម្ភៈ ២០២១ឱ្យផ្អាកការបណ្តេញជនអន្តោប្រវេសន៍សិន ក្នុងពេលតុលាការកំពុងសិក្សាសំណុំក្តី។ តុលាការថែមទាំងបានអំពាវនាវឱ្យអាជ្ញាធរម៉ាឡេស៊ី បើកផ្លូវឱ្យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន អាចមានលទ្ធភាពជួបអ្នកជាប់ឃុំទាំងនោះ ដើម្បីកំណត់ថាតើនរណាអាចមានសិទ្ធជ្រកកោននៅម៉ាឡេស៊ីបាន។
ប៉ុន្តែដំណើរការបណ្តេញអន្តោប្រវេសន៍ទំនងជាប្រព្រឹត្តទៅតាមគម្រោង។ រដ្ឋាភិបាលម៉ាឡេស៊ី មិនគោរពតាមសេចក្តីសម្រេចរបស់តុលាការទេ។ អន្តោប្រវេសន៍ខុសច្បាប់១០៨៦នាក់ ត្រូវបានបញ្ចូនចូលដល់នាវាយោធាភូមាហើយ។ “ពុំមានទេអន្តោប្រវេសន៍ដែលបានសុំសិទ្ធិជ្រកកោនឬកាន់បណ្ណជនភៀសខ្លួនទេ និងគ្មានទេជនជាតិរ៉ូហ៊ីងយ៉ា។ អ្នកវិលត្រលប់ទាំងអស់នេះ សុទ្ធតែស្ម័គ្រចិត្ត ព្រមត្រលប់ដោយគ្មានការបង្ខំទាំងអស់។” នេះបើតាមការបញ្ជាក់របស់អាជ្ញាធរអន្តោប្រវេសន៍ម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ